ABEBALA BALOKHU BELUQHOTHO EZIKHUNDLENI ZELOMBHOXO
AMAGAMA abantu amenyezelwe ngenyanga edlule, abazongenela ukhetho lwezikhundla zeSouth Africa Rugby Union (SARU) oluzoba namuhla ngoLwesihlanu angicacisele kahle ukuthi kusazothatha iminyaka ukuthi aboHlanga bavunyelwe ukuba yingxenye yalo mdlalo.
Owakhumbula kahle amazwi kaMark Alexander ngesikhathi engena esikhundleni sokwengamela le nhlangano nongakawaboni amagama okuzokhethwa phakathi kwawo namuhla angangiphikisa alale ngomhlane uma ngimtshela ukuthi kalikho nelilodwa igama lowoHlanga kuwo. Kugcwele amaKhaladi nabeLungu kuphela.
Phezulu eqhulwini u-Alexander weValke ufakelwe inselelo kwesobuMengemeli nguAndre May weLeopards.
KwesobuSekelamengameli kukhona uFrancois Davids weBoland ozobanga noJan Marais weGriffons. Emagameni esigungu esiphezulu kukhona uVivian Lottering wayo iValke, uSchalk Liebenberg weKZN, uHein Mentz wePumas, uLindsay Mould weFree State, u-Arthob Peterson weBoland, uJJ der Mescht weBlue Bulls noThelo Wakefield weWestern Province.
Ngesikhathi u-Alexander engena kulesi sikhundla okwasula kuso isigubhukane u-Oregan Hoskins wathi: “Kithina udaba loguquko kumbhoxo wakuleli yinto ebalulekile, kasizukuyenza ngoba sigcina icala. Sizosebenzisana ngokuphelele noMnyango Wezemidlalo ukwenza isiqiniseko sokuthi lokhu kuyenzeka. Sizophinde futhi silwe ngakho konke esinakho ukuletha kuleli iNdebe Yomhlaba yangowezi-2023.
Ngesingami u-Alexander uhluleke kukhona konke eyekuthembisile njengoba sekungumlando ukuthi neNdebe Yomhlaba yangowezi-2023 ayayethembisile seyizodlalelwa eFrance.
Nasodabeni lokufaka uguquko kulo mdlalo kuyacaca nje ukuthi wayemane ethenga amehlo kaFikile Mbalula owayenguNgqongqoshe Wezemidlalo ngaleso sikhathi.
Ngesingami ukube u-Alexander wagxuma wahlala kokwakuphakanyiswa nguMbalula ngabe izifundazwe zeSARU kazisaqhoqhobelwe ngabaMhlophe njengoba kwenzeka.
Njengoba umbhoxo wakuleli ushona phansi izinhlaka eziwakhile kazikufundanga yini ukuthi akuwona amaKhaladi nabeLungu kuphela abangayisa umbhoxo phambili?
Nsuku zaphuma emisakazweni nakuthelevishini sihlale sibeleselwa yibo abeLungu ngokuphatha ngobunono umdlalo wombhoxo kwabantu abanjengoSinethemba Zweni weDurbanville Bellville Rugby Club yaseWestern Cape. Yibo abahlale besitshela ngokuba abaholi kwabanjengoSiseko Jafta weKZN Club Rugby.
Ngaphandle kokushiywa ngaphandle kwaboHlanga, kungani silokhu sifunzwa ngamakhehla aneminyaka yobudala eyeqile kwengama-50 ekubeni iNingizimu Afrika inezigidi zentsha yezinhlanga ezahlukeni. Ubani owathi abesifazane kabavunyelwe ukuba yingxenye yabathatha izinqumo kulo mdlalo?
Mihla namalanga kuhlale kutuswa imisebenzi yabanjengoViwe Qegu, uNomsebenzi Tsotsobe, uMandisa Williams, uWillemien van der Merwe. Kuyacaca ukuthi izinhlaka zombhoxo wakuleli kazishaywanga ngamahloni ngesikhathi iWorld Rugby iqokela esikhundleni esiphezulu intokazi yakuleli uWendy Luhabe.
Okubuhlungu kakhulu wukuthi kule minyaka emibili ezayo la makhehla asazoqhubeka nokuthatha izinqumo eziqhubekayo nokushonisa phansi izinga lo mbhoxo wakuleli.
Nakuba ngikholelwa ekutheni akukho obekungenziwa wuTokozile Xasa onguNgqongqoshe omusha Wezemidlalo kuleli kodwa ngezwa inhliziyo yami insonsotha ngenxa yezinhlungu ngingamuzwa noma egxeka ukungabibikho kwaboHlanga emagameni okuzokhethwa kuwo namuhla.
Ngiyamzwela ngoba ungene ezicathulweni zikaThulas Nxesi ngesingami engikholelwa ekutheni ubengazi ukuthi liyaphuma noma liyashona kwezemidlalo. Nakuba naye uXasa engaziwa kwezemidlalo kodwa nginesiqiniseko sokuthi uma engalwa nokugxisha uguquko emidlalweni asathathwa njengeyabelungu angaphenduka intandokazi.