Yingwe nengonyama kowomkhaya
Kuzocaca ukuthi yiliphi eliyimpaka yiliphi eliyinkukhu kwawaseManchester uma esetholana phezulu ngoMgqibelo
SELOKHU kuqale isizini iManchester City ibilokhu iqhwakele kulogi ye-English Premier League (EPL). Bekukhona ukukhuluma okuthi hleze isafudumalisela abathize indawo, kusengenzeka isuke. Nokho zizabalazile ezikaPep Guardiola kwaze kwacaca ukuthi yizona izinkunzi e-England.
Njengoba isisho sisho ukuthi imisebenzi yomuntu emihle iyamlandela, kubonakala izithukuthuku kanye nezinyembezi kuzale injabulo kumaCitizens njengoba sekusele amaphuzu amathathu kuphela zichonywe uphaphe lwegwalagwala ekubeni ngompetha be-English Premier League abasha kwazise iChelsea ihluleke yancama ukuvikela lesi sicoco esinqobe nyakenye.
Empeleni iCity lingashona elakusasa, isingompetha abasha balo mqhudelwano inqobo nje, uma ishaye izimbangi nomkhaya bayo iManchester United ecijwa yimbangi kaGuardiola, uJose Mourinho. Lo mdlalo uzobanjelwa ekhaya leCity, e-Etihad Stadium, ligamenxe ihora lesithupha ntambama.
ICity isesicongweni selogi ngamaphuzu angama-84, emidlalweni engama-31. IMan United isendaweni yesibili ngamaphuzu angama-68 emidlalweni efanayo. ILiverpool isendaweni yesithathu ngamaphuzu angama-66 emidlalweni engama-30. Lokhu kusho ukuthi iCity neMan United bahlukaniswe ngamaphuzu ali-16, ekubeni sekusele imidlalo eyisi-7 kuphela kugoqwe isizini. Kungakho uma ezikaGuardiola zingawaqoqa omathathu amaphuzu zizomenyezelwa ngokusemthethweni njengompetha abasha be-EPL.
Akuyona into efihlwayo ukuthi abalandeli bala maqembu omabili kabahoshelani kahle. Ngesikhathi amaRed Devils esacijwa uSir Alex Ferguson, lo mqeqeshi wabiza abadlali beCity “ngomakhelwane abakhulumela safuthi”. Lokhu wakusho ngesikhathi iCity imlobola ngamagoli ayi-6, e-Old Trafford. La magama ayeyizinkomba zokuthi mkhulu umsindo wokuklolodelana okhona phakathi kwalaba balandeli banhlangothi zombili.
Kungenxa yalokhu kanye, umdlalo wakusasa uzoba ngeminye ezobhekwa kakhulu umhlaba wonke jikelele. Okubukeka kuzokwenza kushube kulo mdlalo ukuthi uPep uzokuthokozela ukuthatha isicoco phambi kwezitha noma kweqembu elingazifuni ezakhe nalapho zihambe khona. Kanti ngakolunye uhlangothi uMourinho uzofuna ukuwona umcimbi weCity ngokuthi ayidlalise ngokulingana noma ayishaye.
Ekhuluma nezintatheli ngemva kokuthi ezakhe zishaye i-Everton ngamagoli ama-3 kweli-1, uGuardiola akafunanga ukukhuluma kabi ngeMan United ezintathelini zase-England.
“Kuyajabulisa ukuthi sesisebenze kanzima sazibeka kule ndawo esikuyo njengamanje. Ngiyawuzwa umbuzo wakho mawuthi ngabe ngizizwa kanjani ngokuthi kungenzeka ngiphakamise isicoco phambi kwezimbangi zethu nxa singathola amaphuzu amathathu. Ngokwami lo mdlalo sizowuthatha njengeminye eyejwalekile, uma sikwazile ukuthola amaphuzu amathathu kuyoba kuhle lokho. Kepha uma kungenzekanga, kuyobe kuchaza ukuthi sinethuba lokuhlanganisa amaphuzu amathathu emidlalweni eyisi-6, ngakho ngizama ukusho ukuthi asizofela enkundleni uma sesidlala neMan United ngoba nakhu sifuna ukuyihlabekisa,” kusho uGuardiola.
Umdlali weMan United oyibamba esiswini uJuan Mata, usabise ngokuthi uma iCity icabanga ukuthi izobahlabekisa iphakamise isicoco phambi kwabo, ayicabange kabusha ngoba bazolwisa okwengwe ngoMgqibelo, beqinisekise ukuthi abehlulwa.
“Awukaze walula umdlalo esiwudlala nabo (esho iCity). Siyazi ukuthi bazofuna ukuphakamisa isicoco phambi kwethu, kepha sizimisele ngokuthi silwe, bengawathathi amaphuzu aphelele,” kusho uMata.