Kunuka uhlofu kwesikaJordaan befuna ukuneka amahlazo
KUBUKEKA iqonga ingcindezi yokuthi uDanny Jordaan aphume esikhundleni sokwengamela iSouth Africa Football Association (SAFA) njengoba kuvela ukuthi maduze nje kukhona abasezinhlelweni zokuneka amahlazo enhlangano yakhe.
Umthombo weBAYEDE uveze ukuthi sekukhona ukudideka kwezinye zezifunda ebeziseka uJordaan ngaphambi kokhetho.
Uqhuba uthi lokhu kudalwa yizinsolo ezishaqisayo ezilokhu ziqhamukile ngoMengameli wenhlangano.
Lo mthombo uthi kunemibiko ezungezayo ngaphakthi kuSAFA ethi kanabathile abahlongoza ukuneka obala umbiko oveza obala ukuphathwa budlabha kwezimali kuSAFA.
Uqhuba uthi kaliveli igama likaJordaan kodwa uma lokhu kungaphathwa kahle kwezimali kuyiqiniso kuzomshaya ngoba kwenzeke ngaphansi kobuholi bakhe.
“Noma ngingeke ngithi sekukhona izifunda esezihlongoza ukumjikela uJordaan kodwa kukhona asebezwakala beqala ukudideka ukuthi ngabe umphathi wabo uyasukelwa noma zonke lezi zinto uzenzile na,” kubeka umthombo.
Imizamo yokuthola uhlangothi lweSAFA kayiphumelelanga njengoba ucingo lukaDominic Chimhavi belukhala lungabanjwa.
Kuvela lezi zindaba nje, uJordaan ubhekene nezinsolo zokudlwengula uJennefer Ferguson owayeyilungu lePhalamende ngaphansi kweAfrican National Congress (ANC). Lona wesifazane uthi uJordaan wamdlwengula ngowe-1994.
Iqembu elizibiza ngeMillion Man March seliveze ukuthi uJordaan kumele ehle esikhundleni ngenxa yalezi zinsolo.
Ngokwemibiko kuthiwa uMengameli weSAFA ushaya phansi ngonyawo ngokwehla kulesi sikhundla.
UChimhavi ucashunwe ethi: “Angithandi ukuphawula ngodaba lwaleli qembu ngoba lingabantu abasekucasheni, abafuna ukuzakhela udumo ngegama leSAFA.”
Empeleni nguNcobo owaqala ukuveza izinsolo zokungaphathwa kahle kwezimali kuSAFA.
UNcobo wakusho lokhu engakahoxi embangweni wokubangisa uJordaan kwesobumengameli.
Ngenxa yokuveza izinsolo ngoJordaan, lo nompempe wadalula ukuthi yena nomndeni wakhe sebethola izinsolo zokubulawa.
Sekungumlando ukuthi ngemuva kokuba uNcobo uhoxile embangweni lwahlehlela osukwini olungaziwa ukhetho lweSAFA obekumele lube ngenyanga edlule.