Iyolala ibonene, kungacashi muntu, kungahluthukwa!
SEKUKHONA abalala bengalele. Asebephupha usuku lokhetho. Okwakobani ukuphoxeka ngosuku lapho kuphuma khona imiphumela umuntu engasekho kwabazongena ePhalamende! Abanye basuke sebebalile, sebehlele ngisho usuku lokubonga kwabadala ngalokhu ngezinkonzo, abanye bavalelise lapho kade betohoza khona.
Nezichwensi namapikoko abaholi namalungu abempongoloza besho khona ukuthi yibo yibo ngalesi sikhathi (sokubala amavoti) basuke bengabonwa.
Nobuchwepheshe sebalekelela ngoba onenhliziyo ethambile nje akasaphoqelekile ukuthi ayohlazeka emzini osuke unethelevishini noma umsakazo ingani nakhona lapha ocingweni lwesandla seyiyaphuma imiphumela.
Umuntu usedlulisa amehlo nje esegunjini noma endlini yangasese bese ubona ngokucisha noma ukukhanya kukagesi nolaka ukuthi kuhambe kanjani .
Okumqoka kimi ngalolu suku wukuthi wonke umuntu usuke etshala akuvunile ngayizolo. Phela awuzovotela i-African National Congress bese kuphumelela i-Inkatha Freedom Party. Kuphumelela loyo abantu abamvotele. Ngamafuphi uma ungavoti ungakhali ngamuntu.
Uma ungakhankasanga ukuze abantu bakuvotele ungamemezi muntu. Lokhu nje ozokuthola emuva kokhetho wumvuzo wokwenzeke ngayizolo. Uma selikulahlile ungethuki, ungadangali futhi ungabe usuba nephika. Khokha umoya nje uqale usuku lokuqala ungasekho ePhalamende wena neqembu lakho.
Yejwayela impilo entsha ngalo belu ithemba lokuthi iminyaka emihlanu izoshesha ukuze ubuye ube nethuba lokuzama. Akungathethiswa izingane, kuhlaliswe kabi abalobokazi. Nakuwe lokhu kuzodlula, ungazilimazi.
Ngabe ngenza iphutha uma ngingaxwayisi laba abazophumelela ukuthi ekujabuleni kwabo bangonakalelwa wusuku. ikhona phela nengozi yokujabula kuze kweqe bese ulahlekelwa ngokuthi, okuvamile kuba yisithunzi kuthi uma kukubi kube ngamazinyo ngoba usuklolodele abangaklolodelwa.