Umsakazo awuthuthukise namaciko adwebayo
KUNINGI okuhle okwenziwa wumsakazo ukwenza ngcono impilo yamaciko ikakhulukazi lawo angabaculi. Likhulu iqhaza lokuwathuthukisa ngokudlala umculo wawo ukuze aziphilise ngemfalakahlana etholakala ngamaroyalties akhokhelwa lokhu okuthiwa yineedle time okuchaza ukudlalwa kweculo emsakazweni bese umninilo akhokhelwe ngabakwaSAMRO. Ngezikhathi zoKhisimusi kubheke kuNcibijane sekuze kwaba yisiko ukuqhudelana kwezingoma kuphikiswana ukuthi kambe iyiphi ezodla ubhedu imuke nesicoco se“Song of The Year”. Noma kukuningi ukukhohlakala okuye kubikwe kodwa okuncomekayo wukuthi kukhona okwenziwayo ukuthi imisakazo iphakamise umsebenzi wabaculi.
Lapho kuthule ngakhona yisemacikweni lawa aziphilisa ngokudweba nangokuqopha ngokhuni nangensimbi ukwenza imifanekiso enhlobonhlobo. Lapha kubukeka amaciko ayilolu hlobo ethwele kanzima impela. Umsakazo ubonakala ubakhipha iqhuzu uwabandlulula lawa maciko. Umbuzo ongaqhamuka yilowo wokuthi yikuphi okufanele kwenziwe wumsakazo ukungenelela emsebenzini wabadwebi nabaqophi kumbe abagwedi bokhuni. Ngiyavuma ukuthi impendulo yalo mbuzo ayilula njengoba umuntu engacabanga. Okokuqala nje abadwebi abagqamile njengabaculi emiphakathini yethu. Empeleni nasemiphakathini yethu, ngisho nasemindenini imbala abadwebi kusekhona ukubabuka njengabantu abaphambene ngokwemiqondo. Kwazinto abazidwebayo nabaziqophayo azenzi mqondo kumuntu ongawejwayele lo mkhakha wezobuciko. Manje-ke umsakazo ungalindeleka kanjani ukuthi ubambe iqhaza, omunye angabuza.
Impendulo ayilula neze futhi akulindelekile ukuthi kube ngezoshaya ncamashi emhloleni.
IBAYEDE inombono wokuthi indlela yokuqala yokungenelela empilweni yabadwebi wukuthi umsakazo uveze amathuba okuthi amaciko azozikhulumela ngenhloso yokuchaza kabanzi ngomsebenzi wawo khona emsakazweni.
Imisakazo emikhulu ngengoUkhozi FM no-Umhlobo Wenene kumele bathathe isibonelo emsakazweni iSAFM engenasihloko esigwemayo. Uma kungoLwesihlanu ekuseni lo msakazo uba nesikhathi sokuxoxisana nabantu abasemkhakheni wezobuciko noma obanhloboni kuhlangene nabo abadwebayo.
Lapho amaciko anikezwa isikhathi esanele sokuchaza kabanzi ngomsebenzi wawo nokuthi liyakwazi yini ukuziphilisa ngawo. Ngaphezulu kokuba likhuluma ngalo iciko liyakwazi nokwedlulisela iziluleko kwabanye abathandayo ukungena emkhakheni wobuciko bezokudweba. Ngalena kwalokho ukuvula ithuba elinjengaleli kusiza kulokhu okuthiwa yi ‘content,’ okuchaza ukuthi nomsakazo nawo ungazuza okuthile.
Uma imisakazo emikhulu ingavula uhlelo lwabadwebi kungavula umqondo kubalaleli ngomkhakha abangakawuqondi ngokuphelele. Emalokishini lapho aboHlanga bebaningi khona ngeke wafica kungekho sithombe esilenga odongeni. Umbuzo owokuthi leso sithombe esenani elingakanani, ngabe owasithenga wayeqonda ngokuphelele yini ukuthi yini lena ayithengayo.
Ngokusho kombiko we-2018 AfrAsia Bank South Africa Wealth Report, imakethe yezobuciko ingenisa umnotho oyizigidigidi ezingama-$75. Kule mali engaka iNingizimu Afrika ihlomula izigidi ezingama-$375. Intengo yemisebenzi yobuciko lapha ezweni yenyuke ngama-28% eshumini leminyaka eyedlule kwathi amanani emhlabeni jikelele amanani enyuka nge12%. Lokhu kukhombisa ngokusobala ukuthi imisakazo iziphuthisela kangakanani ngokungazihlanganisi namaciko adwebayo.
Umnotho ongaka ngeke nangengozi waziswela izinkampani ezizokhangisa zikhulise nesidingo sokuthi amaciko asebenze kakhulu ngoba labo abanezimali sebeyifuna imidwebo yawo.
Ngaphezulu kwalokhu umsakazo unesibopho sokufundisa, ukwazisa nokuthokozisa abalaleli. Kuningi singumphakathi esincisheka khona ngokwemfundo, intokozo nolwazi ngokuqhela kwemisakazo kulolu hlobo lobuciko.