Umculo wengcwenga iBaroque 2000 usondezwa kubantu
IBAROQUE 2000, okuyiqembu lomculo wengcwenga lizobe lidlalela izihlwele iSurprise Symphony kaJoseph Haydn neFlute Concerto kaJohn Sebastian Bach izobe ibukhoma namuhla ngele-11 laphaya eMariannhill Monastery.
Umculo walolu hlobo awuqali ukuza eMariannhill Monastery. Kwenzekile nangonyaka wezi2015. Lokhu kuyisinyathelo esihle esithathwe ngabasezinhlelweni zomculo eMariannhill.
Kuyindlela yokulethela abathandi bomculo injabulo besemakhaya. Kuzokhumbuleka ukuthi ziningi izindawo ezakhele leli khaya lezenkolo iMariannhill.
Kunezindawo zaboHlanga ezifana neTshelimnyama, iDassenhoek, iMariannhill Park, kwaNdengezi neSt Wendolins. Lezi zindawo zinabathandi bomculo wengcwenga kodwa abakhutshazwa wukuthi umculo onjengalona ubanjelwa ezindaweni ezifana noThe Playhouse nakoSneddon Theatre eziqhelile futhi okumba eqolo ngokwemali yokugibela ukuya kuzo.
Abagqugquzeli bomculo eMariannhill badinga ukukhuthazwa ukuletha imisebenzi enjengalona emalokishini. Lokhu kungavumbulula amakhono amasha kubantwana nasentsheni eyakhele lezi zindawo.
Abathandi bomculo wengcwenga bayozibusisa ngomculo kaJohn Sebastian Bach iConcerto no 1 nokaHandel iWater Music. Lo mculo uzobe uphelezelwa yiSinfonia A 3 In C-Tucaria ngoJJ Fux.
Umsebenzi ozokwethulwa lapha yiTorelli Trumpet Concerto in D ngesoloist uMichel Schneuwly. Kukhona neConcerto kaVivaldi in G Minor RV 157 neConcerti Grossi kaCorelli, uMascitti no-Alessandro Scarlatti.
Uhlelo oluqala ngele-11.30 luhlanganise eminye imisebenzi emibili emikhulu okuyiConcerto A 4 “II pianto d’ Arianna” Op7 No.6 ne-IntroduzioneOp4 No.1, neCastrucci’s Concerto Grosso Op3 No.6.
Umculi ozobe ehamba phambili wuDkt uBridgette Rennie-Salonen oyodlala iFlute in D Minor kaKarl Philipp Emmanuel Bach. Ikhonsathi liyovalwa ngeSymphony No 94 kaJoseph Hadyn.
IBaroque 2000 iyobe iwethula ngendlela yawo ethe phecelezi lo msebenzi kaHadyn nokwethenjwa ukuthi abayobe behambele umculo bayokuthokozela.
Amathikithi azotholakala emnyango abiza i-R150 lilinye. Kuzobe kudayiswa ikhofi ngaphandle kwesonto. Ngeminingwane thintana noMichel ku-0823035241 noma kusursouth@i-africa.com.