Izazelene ngomnotho kuChina ne-USA
ICHINA isikhombise ukuthi ngeke iyivumele ingcindezi eyifakelwa Yi-United States of America (USA) njengoba kunomdonsiswano ngodaba lokuhwebelana phakathi kwala mazwe. Ngonyaka odlule i-USA iphake impi kwezokuhwebelana neChina eyisole ngokungenzi izinto ngendlela uma kuziwa kwezokuhwebelana.
I-USA iphinde isole iChina ngokweba amalungelo obunikazi ezintweni zayo futhi ifuna ukuba leli zwe liguqule imigomo yalo yomnotho.
Isenzo sikaMengameli waseMelika uMnu Donald Trump sokubhala enkundleni yokuxhumana ngempelasonto asabise kuyo ngokuthi leli zwe lizoyenyusa intela ezimpahleni zaseChina zenani lamadola aseMelika angama-250 ezingena eMelika obekuthiwa kuzoqala namuhla ngoLwesihlanu siphazamise izingxoxo zokuhwebelana ebeziphakathi kwala mazwe obekunethemba elikhulu lokuthi zizophuma nesisombululo.
UTrump wesabise ngokuthi intela ezimpahleni ingase inyuke ifinyelele kumaphesenti angama-25 isuka kwalishumi.
I-USA isike yakwenza lokhu nakwamanye amazwe okubalwa iMexico, iCanada nangaphansi kwe-European Union (EU) kodwa nawo aphindisela ngokufaka intela ezimpahleni zaseMelika.
Kanti nayo iChina isike yakwenza ukuthi ifake intela yamadola ayi-100 ezimpahleni zaseMelika.
UTrump uthi izingxoxo phakathi kwala mazwe bezihamba ngonyawo lonwabu wasola iChina ngalokhu wathi ibifuna ukuthi kulokhu kubuyelwa kosekuxoxiwe.
Uthe i-USA ngeke isidansele isiginci seChina ngale kwalokho ngeke basebenzisane nayo. Lo Mengameli usho ngokuziqhenya ukuthi izwe lakhe lingakwazi ukuzikhiqizela izimpahla elizithola eChina.
IChina ekhombisa ukungancethezi, ithe lesi sinyathelo asihambisani nezakhamizi zakula mazwe nezomhlaba jikelele.
“Okubuhlungu kuthina ukuthi uma izinsongo zikaTrump zingagcina zenzekile iChina iyophoqeleka ukuthatha izinyathelo ezifanele,” kusho iChina kuleli sonto.
Kuqala le nyanga nje, bekunethemba elikhulu lokuthi lezi zikhondlakhondla zamazwe kwezomnotho zingafinyelela esivumelwaneni sokuhwebelana kulona leli sonto kodwa lawo mathemba ashabalale ngesikhathi izikhulu zaseMelika zisola iChina ngokwephula ukuzibophezela kwayo kanjalo nomyalezo kaTrump ngeSonto obusonga ngokwenyusa intela ezimpahleni zaseChina.
NgoLwesithathu uTrump uphinde wakugcizelea ukuthi yiChina emoshe umcimbi sekusele kancane ukuthi kuphothulwe uhlaka lwesivumelwano sokuhwebelana.
Uphinde wathi i-USA ngeke ilahlekelwe uma kungafinyelelwa esivumelwaneni futhi ngeke yaba nenkinga ngisho ukungqubuzana kulamazwe ngakwezokuhwebelana kuqhubeka.
UNdunankulu wase-Australia uMnu uKevin Rudd uthi umcabango we-USA wokuthi iChina isilangazelele isivumelwano naleli zwe awushayi emhloleni.
Uthe iChina iye kulezi zingxoxo umnotho wayo uzinzile uma kuqhathaniswa nezinyanga eziyisithupha ezedlule. Kunokukhathazeka ukuthi okwenzeka phakathi kwe-USA neChina kuzodala ungabazane kosomabhizinisi nabathengi okungaba nomthelela ongemuhle emnothweni womhlaba.
Ukungqubuzana kwe-USA neChina kuwuphazamisile umnotho womhlaba nowamazwe ahwebelana nala mazwe. I-International Monetary Fund (IMF) ithe ukuqonga kwempi yezokuhwebelana phakathi kwalawa mazwe omabili kube nesandla ekungakhulini komnotho emhlabeni ngasekupheleni konyaka odlule.
Nakuba kunalesi simo phakathi kwala mazwe kodwa isekhona inhlansi yethemba ngesivumelwano esizokwenelisa zonke izinhlangothi njengoba izolo ngoLwesithathu bekulindeleke ukuba ziqhubeke izingxoxo eWashington phakathi kwawo.
Izazi zomnotho zithi nakuba ziqhubeka izingxoxo, kodwa iChina ngeke iye kuzo iyoncetheza kulandela ukuphumela kwayo obala ithi izophoqeleka ukuthi nayo yenze okuthile uma uTrump eqhubeka nokwesabisa ukwenyusa intela zimphahleni zayo.