Imfuyo ibalulekile kuZuku kubeNguni nakuma-Afrika jikelele
PHILANI nina beNkone! Awu ake sikhuzeni bo nakhu sesaphuza nezibhidi nethombonkala asisacwengi. Impela sesiphenduke izidindi zokucentwa. Ekufikeni kwempucuko sibe neshwa lokufela ngamathe iziko saze satshatshazela nezikhonkwane zethu imbala. Umuntu ozinsuluge ngezidwedwe waze wazibopha ngontanjana entanyeni ubizwa ngencwasimende bese kuthi lowo ozivunulele abizwe ngeqaba. Angiyiphathike eyomuntu owelusa izinkomo kuthiwa uneququ lobulongwe, kuchaphana yona njalo indlu ensundu, aboHlanga.
Empeleni ubungemkhulu umehluko obungenzeka ukuba izingane zethu zifundisekile ngokubaluleka kwemfuyo. Ubona le minqolo ehamba ngezimoto ezingomasuza aqhume ziqonywa kangaka nje yingoba izingane zethu azihlonyisiwe ngolwazi lwembaluleko yemfuyo. Zize zigijimise izimoto nje ngoba sesathengisa ngobuzibulo bethu ngenxa yenjabulo yesikhashana esingayiqondi futhi imvelaphi yayo. Isibaya sisodwa nje ekhaya siluphawu lomnotho kanye nesiguqo nethempeli lomuzi.
Kusuke kuwumhlola noma isiga uma uzwa kuthiwa izimeshe zigule zafa zonke, ngakho-ke ngeke sacasha ngokufa nokwebiwa kwazo.
Akuvuselelwe uthando lwemfuyo bese kuhlanganiswa amaqhingasu okumelana nezifo ezikhonkobalisayo. Inkece yinhle yona kodwa ayanele ngoba imfuyo ibuyisela amandla iqholo nobuqhawe kowoHlanga. Uma ungake ulalele amahubo esizwe nawezibongo uzosizwa lesi sikhalo ngezinkomo lapho kuthiwa ‘uNdaba angazidla izwe lonke izinkomo zamadoda’.
Imfuyo ipha umuntu ithuba lokufunda ukunakekela.
Yingakho kudala umfana wayelusa bese kuthi uma esekulungele ukuganwa anikwe inkomo ebizwa ngesisinga. Lokhu kwakumkhuthaza ukuba afunde ukuphemba imfuyo, kube kuyisibusiso esivela kuyise. Endulo wayehlonishwa umuntu onesibaya esiminyene kodwa namhlanje kuhlonishwa ohamba ngethuna, ngisho bona omasuza aqhume abasishiya sizigoga nezinqekle. Ekubeni inkomo iwungilonde kusukela ugcagcelwa umakoti uqhoyiswa ngayo noma esekhehlwa. Ngisho unecece ekhaya, noma usuphangalele ufihlwa ngayo, noma ngabe usukhushulwa kusetshenziswa yona.
Angiqonde kufaka mbonqa kuleli cansi sekuphele lona ikhwani kwazise lomisile kulezi zinsuku. Ake ngiqhubeke nezihemfu zakithi Eshowe, khumu Ndlu yakwethu ayixabene MAKWANDE!!!!