INingizimu Afrika inesibalo esikhulu saMakhosi
ENingizimu Afrika isimiso soBukhosi sivikelekile ngokoMthethosisekelo. Nokho kusuka ngonyaka we-1994 leli lithola inkululeko bekulokhu kunempikiswano ngalokho okungabizwa ngomsebenzi namandla aMakhosi. Ngonyaka owedlule ebika ngoBukhosi kuleli lowo owayenguNgqongqoshe uMnu uVan Rooyen, wathi kusuka ngoNhlangulana wezi-2018, uBukhosi bubalelwa eshumini nane ezweni ezifundazweni ezinhlanu eNingizimu Afrika. Ngokombiko eLimpopo (3) eFree State (2), eMpumalanga (2), eEastern Cape (6) kanti kwaZuluNatal (1).
Ngaphezu kwalokho kunamakhosana angama-844 ezweni ezifundazweni eziyisi-8 ngaphandle kweWestern Cape abe mabili kuphela eGauteng kuthi angama-277 abe KwaZulu-Natal. Lolu luhlu lumi kanje: eFree State (12), eNorthern Cape (8), eMpumalanga (56), eLimpopo (201), eNorth West (50), KwaZuluNatal (277), eGauteng (2) kuthi i-Eastern Cape (238).
Yize uMthethosisekelo uvuma ukuba khona kwaMakhosi noBukhosi, ukungacaci ekusebenzeni kudala ukungaboni ngasolinye ikakhulukazi koHulumeni bendawo lapho amakhansela naMakhosi bebanga ukwenza imisebenzi ethile.
Muva nje uDkt uZweli Mkhize osenguNgqongoshe woMnyango Wokubusa Nokubambisana Nezindaba Zomdabu (Cooperative Governance and Traditional Affairs [Cogta]) ubize umhlangano wokubonisana phakathi kukaHulumeni naMakhosi ngenhloso yokuthola isixazululo lapho kunezinkinga khona kanjalo nokusebenzisana ekuhlelembeleni intuthuko kakhulu ezindaweni ezibhekwe nguBukhosi.
Yize kusesekuseni kukhona ithemba lokuthi lo mhlangano uzolungisa izinto kepha khona lapho kukhona aMakhosi abuka lokhu njengokuchitha isikhathi uma ngabe awaqoshwa ngokusemthethweni amandla aMakhosi.