IZINGQALABUTHO ZAYIZOLO
ABABANINGI abaphila kulesi sikhathi abanomlando ngeqhaza alibamba emzabalazweni wakuleli uClements Kadalie. Wazalwa ngoMbasa we-1896 esifundeni iNkhata Bay eNyasaland namuhla esiyaziwa ngeMalawi. Ngowe-1912 wathola iziqu seHonours esikhungweni iLivingstonia Missionary Institute eneminyaka eli-16 waqala ukusebenza efundisa ezikoleni zendawo. Ngenxa yokufuna impilo engcono walifulathela elakubo wazozinza eKapa eNingizimu Afrika nalapho aqala khona ukuzihlanganisa nomzabalazo wabasebenzi. Emuveni kokunikwa izeluleko ngababengaphambi kwakhe njengoDkt uLaws amluleka ukuba asungule inyunyana i-Industrial and Commercial Union (ICU) ngowe-1919 okwathi ngokuhamba kwesikhathi yaguqulwa yabizwa ngeCommercial Workers Union of Africa. Abaningi baqala ukumhlonipha emuva kwesiteleka sabasebenzi esadonsa kakhulu eKapa lapho babephikisana nokugcwaliswa kwempahla yangaphandle ezweni. Zingama-20 kuLwezi ngowe-1924 uKadalie waboshwa kwakhishwa nencwadi yokuba adingiselwe eMalawi, wanqunyelwa izinsuku ezintathu ukuba aphume aphele. Wakushaya indiva lokho nokwathi ngoNhlaba we-1927 wamela i-Industrial and Commercial Union emhlanganweni i-International Labour Conference eGeneva. Ekubuyeni kwakhe kulo mhlangano emuva kokuhlala izinyanga eziyisithupha khona waxebuka ku-ICU nalapho waqokwa khona esikhundleni sikaMgqugquzeli we-African National Congress e-East London. Wayethathwa njengomunye wosomaqhinga nezinjululwazi kuKhongolose. Wagcina engawulandelanga umyalelo kaHulumeni wobandlululo wahlala e-East London waze washadelwa khona baba nezingane ezinhlanu. Wadlula emhlabeni ngowe-1951. Imisebenzi yakhe emihle iyohlala imlandela.