Kwehlukene ukubandlululwa nokukhishwa inyumbazane
KUNCIKENE kakhulu ukubandlulula nokukhipha inyumbazane. Kungaze kufaniswe nesandla nengalo bese kubadida, kube kufanele, abaningi. Lokhu kugqame kwahlaluka ecaleni ebelithethwa yiNkantolo Yezabasebenzi yalinquma mhla lulunye ku Ndasa kophezulu. Lelo yicala le NUM obo Members vs Cullinan Diamond Mine, A Division of Petra Diamond (Pty) Ltd (JS102/14). Okwenzeka lapha ukuthi inyunyana yaxabana nalenkampani ezingxoxweni zemiholo yase ingenela isiteleka esisemthethweni, okusho ukuthi sasivikelwe ngumthetho. Esebenzisa amangwevu okubhekana nalesisimo ayesibona ukuthi sizokhinyabeza umkhiqizo wakhe, umqashi wabe esekhipha isaziso sokuthi angeke esayikhokha ibhonasi yomkhiqizo ngenxa yokuthi uzokhinyabezeka umkhiqizo njengoba kunesiteleka. Baqubeka nesiteleka abasebenzi, kodwa abanye abangenanga esitelekeni. Futhi abanye bajika phakathi sebeteleke isikhashana babuyela emsebenzini. Ingxabano nesiteleka kwaxazululeka emvu kwezinyanga, saphela futhi nesiteleka, babuyela emsebenzini abasebenzi ababesemzabalazweni.
Inkinga-ke yaqalwa ukuthi umqashi wabe eseklomelisa abasebenze ngokwandlulele (exceptional performance) ngenkathi kunesiteleka. Lomhlomulo akawubizanga ngokuthi yibhonasi yomkhiqizo ngoba wayekade ememezele ukuthi angeke awukhokhe ngenxa yokuthikamezeka komkhiqizo okwadalwa yisiteleka. Lo mhlomulo-ke watholwa yilabo ababesebenze kutelekiwe nalabo ababuya, bembuka esitelekeni bazoqhubeka nokusebenza. Icala esikhuluma ngalo lapha lafakwa yinyonyana egameni lamalunga ayo; icasulwa yilesi senzo eyayisibona njengobandlululo olujezisa labo abasishaya indiva isiteleka.
Isimangalo senyunyana sasigxile emaphuzwini amabili okuwukuthi lesisenzo somqashi kuwukwephula isigaba sesi 5 so Mthetho Wezobudlelwano Kwezokuqhashwa uNombolo 66 we-1995, esinikeza ilungelo kubaqashwa lokusebenzisa igunya labo lokuteleka eliqukethwe yilomthetho. Iphuzu lesibili ngelokuthi lesisenzo somqashi siwubandlululo ngokuchazwa esigabeni sesi 6 soMthetho Wezobulungiswa Kwezokuqhashwa uNombolo 55 we-1998.
Kulesisimangalo, inyonyana yabe isicela ukuba iNkantolo iphoqe umqashi ukuthi akhokhele namalunga ayo ayekade etelekile, lomhlomu wabasebenza ngokwandlulele.
Masikhumbuzane ukuthi luyini ubandlululo ngochaza komthetho. Izizathu ezibalwe ngumthetho okunqatshelwe ukubandlula umsebenzi ngenxa yazo yilezi: ngesobuhlanga; ngesobulili; ngesokukhulelwa; ngesokuthi uganile, uganiwe noma qha; ngesezibopho zomndeni; ngesemvelaphi yomuntu; ngesebala lesikhumba somuntu; ngesokuziphatha ocansini; esokukhubazeka; ngesenkolo; ngesesimo esimayelana nengculaza; ngesonembeza womuntu; esombono wezombangazwe; ngesolimi olukhulunywa ngumuntu okanye esimayelana nokuzalwa kwakhe.
Kanti kunezizathu futhi ezinqatshelwe kodwa zingabaluliwe ngumthetho. Zonake zichazwe ngokuthi “yinoma senzosini esehlisa isithunzi nokuzethemba kumuntu okwenza ukuba azeye yena, ahlukumezeke kabuhlungu”. Lencazelo ibanzi, ngakho-ke kufakwa noma yini enuka santungwana lokubandlulala emsebenzini. Yingakho nje nenyonyana yakusebenzisa kulelicala esikhuluma ngalo.
Masikhumbuzane futhi ukuthi isigaba sesi5 so Mthetho Wezobudlelwano Kwezokuqhashwa uNombolo 66 we-1995 sona sivikela ilungelo labaqashwa ukuba bebengamalunga ezinyonyana futhi bezibandakanye ezinhlelweni zomthetho ngaphandle kokwesaba ukuthi bazojeziswa, bekishwe inyumbazane noma bebandlululwe.
Isikhipha isinqumo sayo iNkantolo kuleli cala esikhuluma ngalo, isichithile isimangalo senyunyana yachaza ukuthi lesisenzo somqashi kasikhona ukubandlulula njengoba kuchazwe ngenhla. Inkantolo yachaza ukuthi lelilungelo lokuzibandakanya ezinhlelweni zenyonyana ezingaphansi komthetho ngaphandle kokwesaba ukujeziswa, nokukhishwa inyumbazane; lehlukile ekubandlululweni. Ukuteleka akulona uhlelo lwenyonyana kodwa kuyigunya labasebenzi eliqinisekiswe nguMthethosisekelo. Lelilungelo lokuteleka livikelekile ngaphansi koMthetho Wezobudlelwano Kwezokuqhashwa futhi kakulona elenyonyana kodwa ngelabasebenzi. Kanti ukubandlula “yinoma senzosini esehlisa isithunzi nokuzethemba kumuntu okwenza ukuba azeye yena, ahlukumezeke kabuhlungu”.
Inkantolo yathola ukuthi kulelicala kakukho okufakazela ukuthi inkokhelo yalomhlomulo wabasebenze ngokwandlulele uixhumene nesiteleka noma iphazamise ilungelo labasebenzi lokuteleka. Phela ubufakazi babucace bha, ukuthi Abasebenzi abavinjwanga ukungena esitelekeni bateleka abanye baze bazibuyela basebenza, isiteleka saze sazosombululwa ngakho ukuxoxisana. Babucacile futhi ubufakazi ukuthi nalabo abangena base bephuma ekutelekeni nabo bakhokhelwa lomhlomulo.
Lokho kwakusho khona ukuthi lomhlomulo wawungaqonde kujezisa abasebenzi abangena esitelekeni. Kanti futhi wawungekhona ukubakhipha inyumbazane ngenxa yokusebenzisa ilungelo labo lokumelwa yinyunyana ezingxoxweni ezaholela esitelekeni. Yehlulwa kanjalo inyonyana nabaqahwa emizamweni yabo yokuzuza kulomhlomulo wokusebenza ngokwandlulele ukugcina umkhiqizo ungalimalanga ngenkathi kutelekiwe.
Inyumbazana ukuphatha kabi noma ukuncisha ilungelo elithile okuncike esenzweni esithile esenzekile noma okudlinzwayo ukuthi siyenzeka noma sizokwenzeka. Inyumbazana ihlobene nobandlululo kodwa kayifanani ncimishi nalo.
Ihlobene nobandlululo ngoba umthetho kawuyivumeli nayo inyumbazana futhi uyibuka ngeso elifanayo nobandllululo. Zenzeka mihla yonke izigameko zenyumbazane emsebenzini. Kodwa kufanele engaxhamazeli othintekile kulezigameko aqoqe kahle bonke ubufakazi. Ngibona ukuthi kulelicala, yageja umgodi inyunyana isicasulwa ukwenza komqashi, kanti yena wakulungisela kahle wakuhlobisa lokhu akwenza ukuhlomulisa abasebenza ngenkathi kusatelekiwe.
ISigaba 187(1)(d) soMthetho Wezobudlelwana Emsebenzini kokunye sithi “Kungukuxoshwa okuvele kungenabulungiswa uma isizathu sakho kuwukuthi umsebenzi uthathe isinyathelo somthetho noma unenhloso yokuthatha isinyathelo somthetho ethathela umqashi ngaphansi kwalomthetho; noma uzibandakanye ezinhlelweni zomthetho ezilawulwa yilomthetho”. IziNkantolo seziwutolike ngezindlela eziningi lomthetho zitshengisa futhi zifakazela ukuthi lesisigaba yiso esinqabela ukukhipha inyumbazane ebudlelwaneni bomqashi nomqashwa.
Kuleli cala kuvuka izinkulumo eziningi esingeke sazibala kowanamuhla umbhalo. Kunokwenzeka ukuba abathintekile basazolendlulisela ezinkantolo ezinkulu leli cala. Nokho ngibona sengathi bayobe bazishaya ngendlebe etshenii noma bathela amanzi emhlane wedada.