Usizi seluphinde lwalelesela kwabezindaba
Okwaqala eminyakeni emibili eyedlule kuyaqhubeka nokukhinyabeza imboni, kubhala uLUVUYO THAHLA
NGALESI sikhathi abantu baseNingizimu Afrika kanye nabakwamanye amazwe betusa ukuqhutshwa kahle kokhetho lwangoLwesihlanu olwedlule, abanye abenze kwaba njalo bazikhotha amanxeba. Kuleli sonto kuqinisekiswe ukuthi inkampani iTiso Blackstar izongagcini nje ngokudiliza izisebenzi kepha izovala nephephandaba langesonto iSunday World. AbeTiso Blackstar bangabashicileli beSowetan, iBusiness Day, iThe Herald kanye neDaily Dispatch.
Kwenzeka konke lokhu nje izisebenzi kwaSouth African Broadcasting Cooperation (SABC) zibambe amazinyo njengoba kungaziwa ukuthi iyozala nkomoni ngodaba olwabe luhlongozwa lokudilizwa kwazo. Yize uNgqongqoshe uStella Ndabeni amemezela ukuthi lokhu ngeke kwenzeke, kukhona ukukhuluma okuthi lokhu wabe ekusho nje ngoba kusondele ukhetho kepha ukudilizwa kuzoqhubeka uma sekwedlule ukhetho.
Izintatheli eziningi zivele zisenkingeni njengoba izinkampani iMedia24, i-Independent Media ne-AfroWorldview nazo zadiliza zaphinde zavala namaphepha afana neThe Times neHuffPost eyabe ikhiqiza izindaba kusizibalwembu. Kukhona ukwesaba ukuthi lokhu kuxhuga nokuntenga komnotho embonini yabezindaba kungasho lukhulu ekukhiqizweni kwezindaba jikelele.
Ziningi izimbangela zokwehla komnotho embonini yabezindaba kepha akhonjwa kakhulu wudaba lokwehla kwezikhangisi, nokuqubuka kwebhizinisi lezikhangisi eliqhoqhotshelwe yizinkampani uFacebook noGoogle. Khona lapho ukwehla kwamandla omnotho kubathengi kuvezwa njengenye into emqoka njengoba kuyibo abafundi abenza iphephandaba lelo liqhubeke nokwenza inzuzo.
Ephawula ngesinqumo
sabakwaTiso Blackstar kanye nokudilizwa embonini jikelele, lowo onguSihlalo wenhlangano yabahleli kuleli iSouth African National Editors Forum (SANEF), uNks uMahlatse Mahlase uthe itshe limi ngothi nokukhomba inhlekelele.
“Iyzikhathi ezinzima lezi embonini yabezindaba yalapha. Ikhathazekile iSANEF ngokwehla kwenani lezikhungo zabezindaba, okoshicilelo kanye nokuncipha kwezintathele okwenza ukubika, imibono nenkulumompikiswano kwehle ezweni.
“Sikhomoza abanikazi bezikhungo zezindaba ukuba bacabange ngokwakhayo nokukhathalela ekwenzeni okusha, amabhizinisi asimemeyo, ukwakha ubuqotho nokwethembeka kubafundi, ababukeli nabalaleli abathembele kithina ukubika izindaba ngaphandle kokwesaba nokwenzelela.
Ngakolunye uhlangothi, ephawula ngalesi simo uMphathi we-Igunundu Press eshicilela iBayede, ElaboHlanga kanye noBukhosi, uMnu uNhlanhla Mtaka uthe ngeshwa umlando uyaziphinda waphawula nokuthi mhlawumbe nabezindaba kumele bazinuke amakhwapha.
“Akukhona okokuqala lokhu njengoba eminyakeni eyedlule kuleli nasemhlabeni jikelele sike sabona ingcindezi embonini yabezindaba. Umbuzo omkhulu ngothi ngabe imboni inazo yini izinhlelo zokubhekana nalesi simo. Akekho ongazi ukuthi inselelo elethwa yizinkampani ezifana noFacebook, uTwitter noGoogle zingaba nomthelela onjani embonini yabezindaba. Umbuzo uthi sikuhlelele yini lokho. Lo mbuzo awuzi kithi nje kuphela njengabaphathi bezinkampani kepha uya nakuzo izintatheli uqobo kanjalo nezikhungo zemfundo. Njengentatheli zibuze ukuthi uzicija ngamakhono asilungele yini isikhathi esikuso kanjalo nezikhungo azizibuze ukuthi izifundo zazo zikulungele yini ukukhiqiza abafundi abakulungele ukungena kule mboni eguquguqukayo”, kusho uMtaka.
Umfo wakwaNomajalimane ubuye waphawula ngokuthi kwenzeka konke nje lokhu abazolimala kakhulu yilabo abazimele .
“IsiZulu sithi ‘kuwa imithi emikhulu emincane iyaziwela’. Njengoba kudiliza uTiso Blackstar no-Independent okuyibo abakhulu nabadala kule mboni, kukhulu okwenzeka ezinkampanini ezizimele kakhulu zaboHlanga okungabikwa ngazo. Kunzima! Sonke sikhala siqinise imihlathi siye phambili ngalo belu uthando esinalo ngale mboni kanye nabafundi bethu abayinsika yakho konke esikwenzayo,” kusho uMfo wakwaNomajalimane.