Iziteleka zizwa ezinye kubasebenzi eThekwini
UMKHANDLU iTheku ungaphansi kwenkulu ingcindezi kulezi zinsuku ngenxa yeziteleka ezilandelanayo zabasebenzi eziphazamisa ukusebenza kukhinyabezeke nomnotho kuleli dolobha. Emasontweni edlule abasebenzi abasophikweni lwamanzi nabaqoqa imfucuza bamise nse ukusebenza befuna ukunyuselwa amaholo idolobha lonke nezindawo ezilakhele zagcwala imfucuza ebingasalawuleki.
NgoLwesithathu kuphinde kwaqubuka esinye isiteleka sabashayeli bamaloli eDurban Container Terminal lapho abashayeli bevale imigwaqo kwaphazamiseka ukuhamba kwezimoto kwakhinyabezeka nomkhiqizo wosuku. Abashayeli bavale imigwaqo emikhulu okuwuBayhead noLangerberg befuna ukukhokhelwa ngokusebenza amahora engeziwe kanye nesikhathi eside abasichitha belinde ukungena emtateni.
Abashayeli bathi bafuna kube nohlelo olwenziwayo ukuze bakwazi ukuzikalela isikhathi, okungenani amaloli ashintshane ngokungena njalo emuva kwehora. Omunye wabashayeli ocele ukungadalulwa uthe ezivumelwaneni ezenziwa emihlanganweni yangaphambilini eminyakeni eyishumi edlule ukuthi kube nesikhathi esibekiwe sokungena nokuphuma kwamaloli ukuze kudedelwane. “Isikhathi esisilindayo singaphandle side kakhulu ekubeni akukho ngisho nezindlu zangasese, nezitolo siyaphoqeleka ukuhlala emalolini,”
kusho lo mshayeli.
Okunye okukhalise abashayeli ukuthi kunezinkampani ezithile ezaziwayo ngokuthi amaloli azo awalindi. Bathi bavika imibhikisho yomphakathi nokushiselwa amaloli okubeka impilo yabo engcupheni kuzona zonke izindawo, bese bephinda bezolindiswa ingxenye yosuku ngaphandle emtateni.
IMeneja esabambile yeKwaZulu-Natal Containers, uMnu uDean Moodley uthe, “Nakuba sazi futhi sisiqonda isimo nezinselelo eziphakanyiswe abashayeli bamaloli futhi osekunesikhathi eside bezibeka, kodwa asihambisani nokuvalwa kwemigwaqo ngoba kukhinyabeza umnotho kubeke engcupheni nemisebenzi yabo.”
Khonamanjalo izolo abasebenzi abaqashwe ngaphansi kohlelo lukahulumeni kuMasipala waseThekwini i-Expanded Public Works Programme (EPWP) bangenele isiteleka banqumela umkhandlu umnqamulajuqu ukuba uphendule ngezikhalo zabo zingakapheli izinsuku eziyisikhombisa.
Laba basebenzi bamashele eCity Hall eThekwini lapho bedlulise khona uhlu lwezikhalo emahhovisi eMeya uNkk uZandile Gumede.
Phakathi kwezikhalo abasebenzi bafuna ukufakwa ngaphansi kukaMasipala ukuze baqashwe ngokugcwele ikakhulukazi labo abangena kulolu hlelo ngonyaka wezi2014 nowezi-2015. Bafuna ukungena ngaphansi kombutho wamaphoyisa kaMasipala, uphiko oluqoqa imfucuza iDurban Solid Waste (DSW), onogada, ophikweni lwamanzi nakweminye imikhakha ukuze babe nesiqiniseko sokuthi imisebenzi yabo iphephile.