Kulokhu kumele sonke seseke uRamaphosa
NGESONTO eledlule kuleli phephandaba isihloko ebesihamba phambili bekuyileso ebesikhuluma ngoDkt uNkosazana MaDlamini Zuma. Obekushiwo lapha wukuthi angaba lugange lukaMengameli uRamaphosa njengoba ababhali behlonze ukuthi ubhekene nezinkuzi ezimbili, enye inguKhongolose kanti enye inguHulumeni okumele awuhole. Uma ubuka umbhalo ucishe uvume ukuthi zombili ngezakwabo akudingi ongeyena uKhongolose azixake ngokungahle kwenzeke.
Esikhathini esingangesonto kube nokhetho sekubukeka sekukhona inkunzi yesithathu eze kabi kuRamaphosa nokungathi uma ingavinjwa imlimaze kanzima. Okubi nje ukuthi lapho imthela ngophondo le nkunzi iyobe isimdudulela kithi thina bakwabo okungazeki ukuthi siyobe sinjani lokhu kuyobe sekuyizinsuku zokugcina nje kithi. Le nkuzi yesithathu iyingozi ngoba ukwenza kwayo kwehlukile, inamandla futhi ezikhathini eziningi kugcina yona, uphondo ize ilugobe uma abantu bakulelo lizwe besukume bama ngezinyawo.
Le nkunzi ngabatshalizimali bamazwe abangavoti kepha ukuphawula kwabo ngezindaba zezwe nangenqubomgomo kwedlula okwethu sonke thina esabe sishaye ujenge siyovota. Seyiqalile nje ukuchukuluza uMengameli uRamaphosa naye futhi akasenasinqe. Kuthe kungaphuma imiphumela nayilapho uKhongolose ungenzanga kahle yazwakala le nkunzi isibhonga isho nokusho ukuthi izibalo anqobe ngazo uRamaphosa (qaphela lapha kabakhulumi ngoKhongolose kepha ngoRamaphosa), aziniki ithemba elitheni. Lokhu komunye bekungazwakala njengenkulumo ephoxayo kepha injalo nje kubo. Bona kuRamaphosa bebefuna uMengameli onamadla ngaphakathi nangaphandle kweqembu lakhe. Ongakwazi ukuba nodlebe lapho abatshalizimali bebubula ukuze abe yihawu labo. Babefisa nokuthi uRamaphosa lona abe namandla ukwedlula iqembu ukuze lapha kunqubomgomo kungabi nankinga.
Njengoba lokho kungenzekanga nje usenkingeni uRamaphosa nathi qobo sisenkingeni. Phela le nkunzi uma ingayitholi into eyifunayo iyajezisa. Singafa yindlala nje ngoba yona ingeneme. Abanye bathola unswinyo, kwenzinye izindawo le nkunzi igovuze abantu ukuba bavukele umbuso ukuze kuphathe lowo ozozwa yona. Ngamafuphi, muzi wakwethu, uMengameli wethu usenkingeni emangalisayo. Uncelisa amawele, thina bontembuzana kanye nezinkunzi lezi zohlobo. Kokunye ngoba uyindoda ebukeka sengathi ayizwani nomsindo ngeke asho yikho nje kumele sonke simeseke, hhayi ngoba sithanda yena neqembu lakhe, asikho lapho. Abebemthanda neqembu sebekwenzile lokho. Kepha ngithi nina boHlanga akasekwe ukuthi athathe izinqumo eziphusile ezivuna abakwabo. Ngumkhaya wethu lo singavumi adwengulwe ngamahalanjonjo ayekade edla abantu nohulumeni lapha phandle! Qina Ramaphosa!