Asephelile amahlathi kwabaxhaphaza abasebenzi
EMIBHALWENI eminingi eyedlule sabhala kabanzi ngoMthetho Wemifelandawonye Yabasebenzi (Workers’ Cooperatives). Kuzokhumbuleka ukuthi kulemibhalo sasihlaba umkhosi wokuthi Abasebenzi baxhashazwa bebhekile nangemvume yomthetho owashaywa nguhulumeni wethu. Kweminye yalemibhalo sagcina sibalisa ukuthi kulolubhubhane lokuxhashazwa kwesizwe sabohlanga sekuyolamula uMongameli Wezwe ngokusayina isichibiyelo soMthetho Wemifelandawonye sangonyaka wezi-2013 ebesilikhu saphasiswa yiPhalamende kodwa uMengameli engasisayinile. Lesi sichibiyelo soMthetho Wemifelandawonye siqonde ukuvimba le mikhuba sasicilelelwa saphasiswa ngowezi-2013 okuthiwa yiSigaba 71 seCo-operatives Amendment Act 6 of 2013. Kodwa besisaduve eHhovisi likaMengameli ukuba asigunyaze njengomthetho osebenzayo.
Kuyathokozisa ukuthi uMongameli useze wasayina isimemezelo sokuthi lesisichibiyelo soMthetho Wemifelandawonye sangonyaka wezi-2013 sesiyasebenza kusukela lulunye kuMbasa kophezulu. Lesi sichibiyelo sisho ukuthi asephelile amahlathi kwabebexhaphaza abasebenzi ngemifelandawonye mbumbulu. Kafuphi isichibiyelo sithi wonke amalunga nabangewona amalunga abazibandakanya kumifelandawonye benelisa incazelo yokuba ngabasebenzi, ngokoMthetho Wezobudlelwana Emsebenzini unombolo 66 wezi1995; bangabasebenzi. Lokhu kusho ukuthi sebevikelekile ngokwemithetho yonke elawuwula ukuphathwa namalungelo Abasebenzi.
Masikhumbuzane ukuthi uMthetho Wemifelandawonye uNombolo 14 wezi-2005 usungula imifelandawonye yabasebenzi (Workers’ Co-operatives). Esigabeni sokuqala soMthetho Wemifelandawonye, eyabasebenzi ichazwe ngokuthi “Yizinhlangano ezizimele zabantu bebumbene ngentando yabo ukufeza izidingo zezomnotho nezenhlalakahle ngaphansi kohlaka olulawulwa ngamalunga ngokwentando yeningi nangokwemigomo yemifelandawonye”. Bonke –ke abasebenzi abangamalunga emifelandawonye kabasebona abasebenzi abavikelwe nguMthetho Wezobudlelwana Emsebenzini uNombolo 66 we-1995. Lokhu kusho ukuthi uma bexoshwa kabakwazi ukumangalela umqashi ezinkundleni ezifana noCCMA, nemiMikhandlu. Kusho futhi ukuthi lababasebenzi kabasenasabelo nalungelo ezivumelwaneni zokuxoxisana kuhlanganyelwe ezisayinwa yizinyonyana nabaqashi ezilawula imivunzo nemiholo okumele ikhokhelwe abasebenzi ezimbonini ezahlukene. Kanjalo nemiholo egunyaziwe ngokwezimboni ngaphansi kweZinqumo Zezimboni (Sectoral Determination) abasenamhlomulo kuyo.
Masikhumbuzane futhi ukuthi isihluku sokuxhashwazwa kwabasebenzi esasikubabaza emibhalweni eyedlule ukuthi lemifelandawonye ibivumbuka okwamakhowe ngenhloso yokuxhaphaza nokwenza imigunyathi, inkohlakalo nokunye okuphambene nomthetho. Abaqashi abangamaShayina babevele beguqule izinkampani zabo zibeyimifelandawonye mbumbulu noma eyichilo (sham) ngokuchaza kweziNkantolo. Abasebenzi babesayiniswa ngenkani ukuthi sebengamalunga alemifelandawonye-mbumbulu. Izinhloso kwabe kuyilezi: ukugwema ukuholela abasebenzi umholo onqunywe nguMkhandlu Wemboni Yezingubo; ukukhipha abasebenzi ekubeni ngamalunga ezinyonyana zabo; ukugwema ukukhokha ingxenye yeminikelo ezikhwameni zoMkhandlu, sokuhlinzeka ukugula, somhlalaphansi, nokubamba imali yobulunga bezinyunyana emaholweni abasebenzi. Esinye isihluku salomkhuba ukuthi babexoshwa noma yikanjani, noma yinini abasebenzi ngoba kabasavikelwe ngumthetho wezabasebenzi, ibe nomthethosisekelo womfelandawonye nawo awubavikele ngoba yimifelandawonye yomgunyathi engaphethwe ngokomthetho.
Masikucacise ukuthi imifelandawonye yabasebenzi iyuhlelo olunenhloso enhle, engazuzisa abasebenzi abaningi ezweni lakithi uma nje kunganqandwa amaqola nenkohlakalo ukuthi kungaxovi loluhlelo. Masikucacise futhi ukuthi uMthetho wemifelandawonye kawushayisani nowabasebenzi. Zakuchaza lokho izinkantolo kula macala esawahlaziya, esiwabalule ngenhla. Imifelandawonye iyuhlelo olusha lokunika ithuba kumalunga emifelandawonye lokusebenza bengabanikazi benhlangano yabo beyiphethe ngokwentando yeningi. Inkinga yile mifelandawonyembumbulu nenkohlakalo eyenziwa ngaphansi komthetho wemifelandawonye.
Iyancomeka imizamo yoMkhandlu Wezimboni Zezingubo ngoba yiwo owafaka amacala amabili eziNkantolo ngalolu daba. Awudinwa futhi loMkhandlu ukuqhubeka nokuhlola, uhlonze yonke imifelandawonye mbumbulu uyifakele amacala koKhomishana ngezenzo ezahlukene yemikhuba yalababaqashi abangamaqola. Ziyancomeka futhi izinyathelo zoMnyango Wezabasebenzi zokusungula uhlelo oludidiyela yonke iminyango ethintekayo noMkhandlu Wemboni Yezingubo okuthiwa yi-ICOREF.
Injongo yalolu hlelo ukuqapha, ukuhlola nokubopha bonke abaqashi abephula imithetho eyahlukene okuxuba neyezabasebenzi. Umnyakazo wokuhlola kuhlanganyelwe, owenziwe ngaphansi kwalolu hlelo ngoNhlaba kophezulu, uvumbulule amanyandululu okuxhashazwa kwabantu ngalemifelandawonyembumbulu.
Kufanele masexwayise ukuthi lesisichibiyelo siqeda amahlathi kubaxhaphazi babasebenzi, ngakho-ke sibephuca iqatha emlonyeni. Angeke besonge izandla laba abebenenhloso yokuhlanekezela uMthetho. Bazocabanga amaqhinga amasha becije amangwevu okuqhubeka nezenzo zabo ezingabusisekile. Ngakho-ke lemizamo yoMkhandlu Wezimboni Zezingubo neyoMnyango Wezabasebenzi akumele iyekwe, kodwa kufanele ziqhubeke lezinhlelo yize usuchitshiyelwe uMthetho.