IZINGQALABUTHO ZAYIZOLO

UKUKHULUMA kwesiZulu okuthi umfundisi akamzali omunye umfundisi safakazeleka kuPotlako Kitchener Leballo owayeyindodana yomfundisi waseSheshi. Wazalwa zili-19 kuZibandlela ngowe-1915 eMafeteng eBasutoland eyaguqulwa yabizwa ngeLesotho. Akazange alandele ezithendeni zikayise ngoba ngonyaka we-1940 esafunda eLovedale College wangena embuthweni wezokuvikela wakuleli njengowoHlanga wabamba iqhaza nasezimpini zokuvikela izwe. Emuva kokuphela kwezimpi wazihlanganisa nombutho i-African National Congress engomunye wabaholi bophiko lwentsha eLovedale. Emuva kwesiteleka sabafundi waxoshwa kwaphoqeleka ukuthi ayoqhubeka nezifundo zakhe eWilberforce Institute waqala ukufundisa ezikoleni ezihlukene eTransvaal. Wayelandela kakhulu izimfundiso zabaholi bangaphambilini no-AP Mda no-Anton Lembede. Wafundisa ezikoleni ezihlukene eTransvaal nokwathi emuva kwezibhedu zangowe-1952 umuzi wakhe e-Orlando eGoli waphenduka ikhaya lamalungu e-ANC nabantu ababehlukunyezwa umbuso wobandlululo. Ngowe-1954 uLeballo wayesengumholi wophiko lwentsha lwe-ANC e-Orlando East. Emuva kokungaboni ngasolinye noKhongolose waxebuka kuwo wazihlanganisa nePan Africanist Congress (PAC) ngowe-1959. Wafika namalungu amaningi kuPAC okwenza wahlonishwa. Wadlula emhlabeni ngoMasingana we-1986 eGreenwich e-United Kingdom ngowe-1986. Uzokhunjulwa ngokuba uMengameli obambile wePAC Phakathi kowe-1962 nowe-1979