Umthetho uthi abantu abanikwe ithuba lokufakaza
KUVAMISILE ukuthi abantu abasuke behlukunyeziwe ngezindlela ezahlukene kube yibona abazithola sekumele behlele ngezansi ngenxa yengcindezi abayitholayo kubahlukumezi kokunye bagcine bengasawavulanga namacala. Noma icala lokuhlukumeza selize lafinyelela enkantolo umthetho uyakucacisa ukuthi izinhlangothi zonke ezithintekayo kumele zinikwe isikhathi zethule ubufakazi bazo ngendlela ezozanelisa, ngaleyo ndlela kuyobe kwenziwe ubulungiswa.
Lapho inkantolo ibona khona ukuthi ohlukunyeziwe kumele anxeshezelwe ngumsolwa isuke igwema isimo lapho umsolwa ezonikwa khona isigwebo eside okungaba ukudonsa ejele kugcine sekudla uHulumeni imali yabakhokhintela nezinto zalowo olahlwe yicale zime ngenxa yokuboshwa. La maphuzu ayevezwa ngabameli ecaleni leKumkani yabaThembu uBuyelekhaya Dalindyebo ngokuthi isinqumo sokumgquma ejele ngecala alivuma wawunxephezela nomndeni kamufi kwakuzokhinyabeza uhulumeni nabakhokhibentela ngoba uzodonsa iminyaka ejele kulahleke nokwakhe okuningi.
Le ndlela iyasiza ngoba inika nomsolwa isikhathi esanele sokuqoqa imali yesinxephezelo. Umyalelo wesinxephezelo unemibandela ngokweSigaba 297 no 300 seCriminal Procedure Act. Lo mbandela uthi uma umuntu elahlwe icala elidale ukuthi lowo olinyaziwe aze alahlekelwe impahla okungaba umuzi, imali, inkantolo ingabheka isicelo salowo ohlukunyeziwe noma izwe okushiwo umshushisi egameni lommangali bese inquma ukuthi kumele akhokhelwe. Kusobala
ukuthi inkantolo ingenza isiphakamiso sokuthi kukhokhelwe ohlukunyeziwe emuva kokuba ummangalelwa eselahlwe icala.
Kusemandleni enkantolo ukuthi yenze isinqumo sokukhokhelwa kohlukunyeziwe noma angakhokhelwa. Inkantolo ayikwazi nje ukuthi isingathatha isinqumo esizovuna ohlukunyeziwe ngoba nakhu kusho umthetho, kodwa kusemahlombe ohlukunyeziwe ukuba afake isicelo sokunxeshezelwa uma ummangalelwa eselahlwe yicala. Lapho umshushisi efaka isicelo sokuba kunxeshezelwe ngokuyalela komthetho, kumele kucace ukuthi lokho kwenziwa ngokunxusa kukammangali.
Ecaleni likaS v King elingunombolo 8R elenzeka ngoZibandlela wezi-2014, inkantolo yasichitha isigwebo esakhishwa yiMantshi kumsolwa ngezizathu zokuthi kwakucaca ebufakazini obuqoshiwe ngesikhathi kuqhubeka icala ukuthi isinqumo sokunxephezela esenziwe yiMantshi isicelo saso sasifakwe nguMshushisi ngesikhathi kukhishwa isigwebo.
UMshushisi akazange akucacise ukuthi ngesikhathi efaka isicelo, lokho wayekwenza egameni likammangali. Inkantolo yabuye yanquma ukuthi ummangali anikwe ithuba lokuhola ubufakazi noma anekele inkantolo ngesicelo sokunxeshezelwa. Ngasekuqaleni kwaleli cala umsolwa wayenganikwanga leli thuba. ISigaba 300 soMthetho sithi isinqumo sokunxephezela esenziwe ngokulandela lo mthetho singaba nomthelela esinqumweni esingakhishwa yimantshi. Uma umsolwa ehluleka ukukhokha lokho anqunyelwe khona yinkantolo, ummangali unawo amandla okuphoqa ukuthi akhokhe ngokulandela umthetho akhishelwe incwadi egunyaza ukuboshwa kwakhe ekhishwa yimantshi ephethe kuleyo ndawo.
Ecaleni likaVaveki v S langowezi-2010 kwanqunywa ukuthi lapho inkantolo inqume khona ukuthi ifisa ukunika umsolwa ithuba lokugwema ukuboshwa ngokuthi akhokhe imali noma olunye uhlobo lokunxephezela, kumele ibheke ukuthi lowo muntu angakwazi yini ukukhokha leyo mali ngesikhathi esinqunyiwe. Kuleli cala inkantolo yathola ukuthi imantshi yehluleka ukubhekisisa leli cala ngokuthi umsolwa uzokwazi yini ukukhokha imali yesinxephezelo ngesikhathi esibekiwe noma cha ukuze ahambisane nemibandela yesigwebo. Isigwebo esakhishwa yimantshi sachithwa emuva kokuphonselwa inselelo esikhundleni saso kwaphasiswa isigwebo esasingahlangene nesikhathi esinqunyiwe okungakhokhwa ngaso isinxephezelo.
UMehluleli wakubeka obala ukuthi isinxephezelo ngaphansi kweSigaba 300 singaba yingxenye yokuzicelela ukuthethelelwa kanjalo nengxenye yesinqumo sesigwebo. Esinye iSigaba soMthetho esingunombolo 297 sithi lapho inkantolo ilahle khona ngecala umsolwa ngakwenzile kodwa kubonakala ukuthi isigwebo anganikwa sona asikho ngaphansi komthetho, inkantolo inganquma ukukuhlehlisa ukukhipha isigwebo ngesikhathi esingaba ngaphansi kweminyaka emihlanu, umsolwa akhululwe ngemibandela ethile. Uma sesikhishiwe isinqumo ngesinxephezelo, ummangali angakwazi ukuthi zingakapheli izinsuku ezingama-60 abhale phansi indlela afisa ukunxeshezelwa ngayo. Uma ummangali engenelisekile ngesinqumo senkantolo mayelana nesinxephezelo anganquma ukuthi ngokwakhe esingakanani isinxephezelo abesilindele.