Masicele isipho sokuphenduka kuNkulunkulu
“NGIYAKUNIFAFAZA ngamanzi ahlambulukileyo, nihlambuluke, nginihlambulule kukho konke ukungcola kwenu nakuzo zonke izithombe zenu. Ngiyakuninika inhliziyo entsha, ngifake phakathi kwenu umoya omusha, ngikhiphe inhliziyo yetshe enyameni yenu, ngininike inhliziyo yenyama.
Ngiyakufaka umoya wami phakathi kwenu, ngenze ukuba nihambe ngezimiso zami; niyakugcina izahlulelo zami, nizenze.” uHezekeli 36:25-27.
Evesini lethu lanamuhla kucacile ukuthi akekho ongaguqula inhliziyo yetshe engaphakathi komuntu ngaphandle kukaNkulunkulu ophilayo.
Wuye ohlambulula umuntu ekungcoleni kwakhe. Wuye futhi okwazi ukufaka umoya omusha kumuntu. KunguNkulunkulu onamandla ukufaka umoya waKhe phakathi kwabantu. Wuye futhi ongakwenza ukuthi sihambe ngezimiso zaKhe, sigcine izahlulelo zaKhe, sizenze. Kuchaza ukuthi yonke insindiso yethu ingomusa kaNkulunkulu Oziquntathu kuphela. Asikwazi siyizoni, ukuzikhulula obhishini esikulo ngamandla ethu!
Sidinga ongaphandle kwesimo esikuso ukusihlenga asikhiphe, abeke izinyawo zethu edwaleni elingunaphakade. Kuchaza ukuthi, uNkulunkulu uyakwazi ukusindisa noma ubani, yize inhliziyo yalo muntu ilukhuni njengetshe eliqinile. Bheka nje ukuthi uSawulu owaba umzingeli webandla likaJesu Khrestu waguqulwa engafunanga ukumlandela uJesu Khrestu. uMoya Ongcwele uyakwazi ukufinyelela lapho ngaphakathi komuntu, athambise konke okuqinile kuye.
Bheka nje, indoda yaseGadara eyaba namademoni amaningi, engafunanga kuJesu ukuthi ayisindise, noma ayikhulule emandleni obumnyama. Kodwa kwahluleka uSathane ukubamba esigqileni sakhe esiyileya ndoda. uJesu waguqula yonke impilo yayo engacelanga.
Unamandla uNkulunkulu, yize umuntu engamcelanga ukumsindisa. Ngamazwi angenhla bakwethu, uJehova uyaduduza isizwe saKhe esasisekudingisweni ezweni elikude ku-Israyeli. Uyaduduza uNkulunkulu.
Namuhla bakwethu, ngifuna ukukhuthaza onke amaKristu ukuvuma ukuthi uNkulunkulu ophilayo unguSomandla onganabo ubuthakathaka nobuncane nje! Uyakwazi ukuguqula isimo sezwe lethu ngezwi elilodwa vo! Ngabe siyazwisisa ukuthi uNkulunkulu akazange azame ukwenza okuthize? Thina abantu, siyazama, kodwa uNkulunkulu oZiquntathu akazami nhlobo, uyakwenza! Akakho ongamelana necebo laKhe elamiswa kungakadalwa izulu nomhlaba.
Ngabe siyazwisisa ukuthi uMdali wethu akanalo isu lesibili, uma isu laKhe lokuqala lihlulekile na? Kungoba isu lokuqala likaNkulunkulu liyaphumelela njalo. Yithina abantu abadinga amasu namaqhinga amaningi ekuzameni kwethu ukuphumelela, hayi uNkulunkulu. Uma sizwisisa, sikholwe konke lokhu, kuyasisiza njani na?
Bakwethu, uma sikholwa okushiwo ngenhla, kuchaza ukuthi kukhona ithemba kuNkulunkulu ngezwe lethu namuhla! Nampaya abantu bekhononda ngabaholi abakhwabanisa imali yethu. Nasi isinengiso sobutabane esamukelwa ngabantu ezweni lethu. Nangu umuntu okhalela izingane zethu ezibulawa ngokuhushulwa kwesisu! Nangu umfundisi owexwayisa ukuthi kungavunyelwe ngokomthetho ukudayiswa kwemizimba yamadodakzi ethu! Kodwa! uNkulunkulu unamandla ukusipha singabantu beNingizimu Afrika isipho sokuphenduka.
Isipho lesi, sokuphenduka, sivume izono zethu, siyisipho esisidinga kakhulu namuhla bakwethu! Izwe lethu liyasidinga kakhulu isipho sokuphenduka, ngoba ngenxa yethu igama likaNkulunkulu ophilayo liyahlanjalazwa ngamahedeni, athi: “Hawu, iningi labantu eNingizimu Afrika lithi bangamaKhrestu.
Kodwa bheka nje okwenziwayo lapho! Unjani pho uNkulunkulu walabo bantu?” Isipho sokuphenduka siyasidinga futhi, ngoba lapha phambi kwethu sibona izwe lethu lihlehle kancane kancane emgodini ojulile kakhulu.
MaKhrestu! Masingalahli ithemba. Masincenge kuYe okwazi ukukhipha inhliziyo yetshe, afake inhliziyo yenyama, ukuthi enze okufanayo nakubantu bezwe lakithi!
Masithandaze, simcele ngesibindi esikhulu egameni likaJesu Khrestu ukusipha singabantu beNingizimu Afrika isipho sokuphenduka. Impumputhe eqonda eweni entabeni, uma ingaphenduki, iyowohloka ife nya! Yingakho, uma sithi sidinga isipho sokuphenduka, kuchaza ukuthi uma izwe lethu eliyimpumputhe kulezi zinsuku lingaphenduki, kuzolandela ukuwohlaka okukhulu kuzulazule amanqe, kufika namagwababa.
Thandazani maKhrestu, nivume nezono zenu, nicele kuNkulunkulu ophilayo isipho lesi esiyigugu elikhulu kakhulu. Celani kuYe ukuthi asinike imvuselelo yangempela, noguquko oluvumelana ncamashi neZwi laKhe elingcwele-ngcwele. Yebo, siyafakazela abantu, kodwa onamandla ukuguqula konke, kunguNkulunkulu wethu kuphela.
Masicele kuYe ukuguqula izinhliziyo zabaholi nezezakhamuzi zezwe lethu. Khona sizoba naso isiqiniseko sokuthi izingane zethu zinekusasa elibusisekile nguNkulunkulu!
MaKhrestu, uJehova, uNkulunkulu oyedwa vo, Oziquntathu – uBaba, neNdodana, noMoya Ongcwele anibusise. Amen.