UMaduro uthi kusenguye ophethe noma kukubi
NJENGOBA isimo siqhubeka nokushuba eVenezuela, labo abaphikisana noHulumeni kaMengameli uNicholas Maduro baboshwa mihla namalanga, abanye bayabaleka ezweni bangene komakhelwane. UMaduro uzama ngakho konke ukukhombisa ukuthi kusenguyena uMengameli futhi usalilawula izwe naphezu kwemizamo engaphumelelanga yokumqumba phansi ngeledlule.
Umholi weqembu eliphikisayo uMnu uJuan Guaidó uthathe ulawulo lemigwaqo emikhulu esizwa yidlanzana lamasosha elihambisana naye emizamweni yokuketula esikhundleni uMaduro.
Kukhona abaphikisana noMaduro abathi angeke bayivumele ingcindezi yakhe yokuba baze bashiye izwe noma baboshwe. Laba sebegobe amadlangala ezindlini zamanxusa amazwe okuyinto okuthiwa yake yenzeka emlandweni waseVenezuela ngeminyaka yama1970 ngesikhathi owayephethe engundlovukayiphikiswa eqotha bonke ababengahambisani naye. Abantu bagcwala ezindlini zamanxusa beyofuna ukuvikelwa. Ezinsukwini eziyishumi ezedlule, uMaduro ubonakala ezama ukudambisa ulaka lwalabo abamfuna ephumile esikhundleni.
Izazi zomthetho ezintathu kuleli lizwe seziqube ezindlini zeNxusa lase-Italy nelaseArgentina. Omunye umholi weqembu eliphikisayo uMnu uLeopoldo López, oshaye indiva umyalelo wokumbophela endlini, yena useqube nomndeni wakhe ohlala eZindlini Zombuso waseSpain.
Abantu bacashe ezindaweni ezifihliwe ngenxa yesimo sokuphepha kwabo. Amasosha asezikhundleni eziphezulu ali-18 ahambisana noGuaidó acashe ezindlini zeNxusa zasePanama. Akekho noyedwa kula masosha osecele ukuyohlala kuleli lizwe, nakuba amazwe aseLatin America aziwa ngokubasiza kakhulu abantu abazithola sebehlukumezeka emazweni abo ngezizathu zezepolitiki. Zikhona izinhlelo ezikhona zokuthi bahlale okwesikhashana kula mazwe bangene kuwo njengezivakashi kuze kube umbuso kaMaduro uqumbeka phansi.
“Ngifana nomuncwi endlini ehlaselwe yimimoya. Angikwazi ukunyakaza kodwa uma ufuna ngize ungakhuluma,” kusho yena.
Isinqumo sikaGuevara sokufuna ukukhoseliswa ezindlini zenxusa bekuyisidingo futhi kuyiqhingasu lezepolitiki.
Waqala wazibonakalisa kwezepolitiki esengumfundi lapho abafundi babhikishela uHugo Chavez eminyakeni elishumi eyedlule waqonga ngokushesha eqenjini elaliphikisa emveni kokuboshwa nokubhaca komakadebona. Njengesekela likamengameli weqembu eliphikisayo waba ngomunye wabaholi ababhikisha bephikisa uMaduro ngowezi-2017 lapho kwafa khona abantu abangaphezu kwe-130. Ekugcineni umbuso usudambise umbhikisho uGuevara waseqhulwini lwabafunwa uthuli.
UGuevara uthi walunywa indlebe ngokuthi uzoboshwa ngamacala okususa uthuthuva yimantshi yaseNkatolo Enkulu kodwa waphulukundlela ngomnyango wangemuva wendlu yakhe njengobawayenovalo lokuthi amaphoyisa ezepolitiki eSEBIN ayezogasela noma kunini.
Wanxusa ukuvikelwa yiChile ngethemba lokuthi kuzobathinta ngabantu abaningi abamanqika nokubhekana noMaduro kodwa manje sekuthathwa uGuaidó njengofanele ukuhola izwe, okuwukuzuza ngobungcuphe enhlekeleleni yepolitiki nezomnotho.
“Wonke umuntu oyisakhimthetho ohlala ezindlini zamanxusa uhlale ekhumbuza lelo lizwe, abezindaba balo nabantu bakhona ukuthi uNicolás Maduro akasiyo inkinga kuphela kubantu baseVenezuela,” kusho uGuevara. “Awucabange nje uma uNancy Pelosi ubezogijima ayokhosela ezindlini zenxusa ngoba uMengameli uTrump efuna ukumbopha, noma umholi weqembu eFrance bekufanele libhace ezindlini zenxusa laseSpain ngenxa kaMacron.”
Wemukelwa ngezandla ezimhlophe yinxusa laseChile langaleso sikhathi uPedro Ramirez, eseveli esamukele umengameli weqembu iCOPEI uRoberto Enriquez, Sekuphele iminyaka emibili u-Enriquez elaphaya.
Kuke kwaba khona isikhathi lapho uRamirez akhoselisa khona abehluleli abahlanu ababeqokwe ukuba bayohlulela enkantolo ephezulu uMaduro wabanqabela. Abehluleli abacela ukubhaciswa bashiya lapho bekhoseliswe khona beqa umngcele emveni kokuba uHulumeni kaMaduro wabenqabela ukuba bavunyelwe ukuya ekudingisweni.
KuRamirez owayenguNgqongqoshe kuKhabhinethi kuHulumeni wamasocialist owawuholwa uSalvador Allende, kwakuyithuba lokuba naye assize. Ngesikhathi u-Allende eketulwa ngowe-1973, uRamirez waboshwa wadonsa iminyaka emithathu ngaphambi kokuba adingiselwe eVenezuela, okwadlula nemiphefumulo engamashumi ezinkulungwane yabaseChile kulandela indlovuyangena. UChavez wayeyintandokazi kuRamirez kodwa emveno kwalokho wabona owamelama njengowuzwilakhe emveni kokuba esebuyele eVenezuela njengenxusa ngowezi-2014.
“IVenezuela kimina ifana nekhaya lesibili,” kusho uRamirez esenhlokodolobha yaseChile. “Kungizwisa ubuhlungu ukubona okwenzekayo. Akuchazeki.”
Kuyacaca uGuevara ungcono kunabangama-857 baseVenezuelan, kubandakanya nabalingani bami abayizakhimthetho, abathathwa njengeziboshwa zepolitiki ngamaqembu endawo amalungelo abantu. Izinkuzimalanga zezimfudu nezinyoni ezinswininizayo amaguacharaca kuzulazula engadini enhle enezitshalo ezinhlobonhlobo kukhona nendawo yokubhukuda lapho esebenza khona zonke izinsuku. Izisebenzi zenxusa ziyamphekela, zidumise injini uma kuhamba ugesi ocisha njalo abuye enze imisebenzi echitha isikhathi sezimpunyela zaseVenezuela kulo mnotho owayo obonakala ngezinga eliphezulu lokwenyuka kwezindleko kanye nenswelo ethe sakalala ezweni.
Okududuzayo kunakho konke wukuthi ukweswela nakho kuyisimo sempilo. Akakwazi ukuhambela umndeni ohla emazweni aphesheya futhi wehlulekile ukuya emigcagcweni yabangani ababili lapho kwakufanele abe yimpelesi khona. Akufanele abeke uvo ngezepolitiki, yize uNgqongqoshe Wezangaphandle wathi akeze azophendula imibuzo esithangamini esiyivelakancane iThe Associated Press.
Usathule nje ngamasu akhe. Kamuva nje ucele isithandwa sakhe esiyisishoshovu ukuba bagcagce ngoba ngeke asukumela ukuba impilo yakhe ilawulwe uMaduro. Unethemba lokuthi bazogcagca emveni kombuso kaMaduro eVenezuela, esekhululekile kulokho akubiza ‘ngesithumbanja segolide’, ekupheleni konyaka.
“Ingxenye yokungavumeli ukuqonelwa kuyindlela yokuphila,” usho kanje.
Okwamanje uthola amandla ngokuzivocavoca egxuma abuye afunde ibhuku lemikhuleko yansuku zonke eyayikhonzwe ngu-Abraham Lincoln alithenga kuma-U.S. National Archives eWashington.
“Inkululeko yinto engaphakathi kumuntu, akwanele nje ukuba nophahla ekhanda lakho, ube nokhukho nokudla,” kusho yena. “Lokhu kungisizile ukuqonda ukuthi kungani ubukhomanisi buphambana nemvelo yomuntu. Njengoba iBhayibheli lisho. ‘Umuntu akaphili ngesinkwa sodwa.’”