U-Eric Tinkler usecabanga ngomdlalo wezakhe neRoyal Eagles
UMQEQESHI weMaritzburg United u-Eric Tinkler uthumele umyalezo emazweni azoncintisana koweCosafa Cup eThekwini ngesonto elizayo ukuthi abheke engxenye. Lokhu kungenxa yomqansa ezakhe ezibhekene nawo njengoba zizolwela ukufa nokuphila ukuze zihlale esigabeni esikhulu i-Absa Premiership. IMaritzburg (Team of Choice) idlale ngokulingana ngelilodwa nhlangothi zombili neBaroka FC ngoMgqibelo odlule ePolokwane.
“ICosafa Cup kimi ayisho lutho. Lezo zicelo zizokwehla ezindlebeni eziyizithulu. Uma omunye wabadlali bethu ebizelwa kuCosafa Cup, ngizothi cha.”
UTinkler ukude kakhulu nokucabanga ngemidlalo yeCosafa Cup ngoba ngalesi sikhathi uzobe ecabanga imidlalo yamaplay- off namaqembu amabili eNational First Division (NFD), iRoyal Eagles kanye neTshakhuma Tsha Madzivhandila (TTM).
Maphakathi nomcintiswano
we-Absa Premiership, leli qembu lase lithathwe njengeseliphumile kuPSL. Kwabuya ithemba kufika uTinkler sekusele imidlalo eli-12.
Kubukeke kuwumsebenzi omkhulu, kodwa uTinkler uhamba lapho kungekho khona ofuna ukuya khona. Futhi unamava, wabuyisa ukuzithemba kubadlali baseMaritzburg, kanti ngoMgqibelo uFarook Kadodia umnikazi weqembu walithatha nezinkumbi zabalandeli baya enhlokodolobha yaseLimpopo ngenkolelo yokuthi uzobe esenguSihlalo weqembu elidlala emazingeni aphakeme.
Basondela ekufezeni lokho ngesikhathi uFortune Makaringe elivalela phakathi ngesiwombe sokuqala, kodwa uMduduzi Mdantsane walinganisa ngesiwombe sesibili. Lokhu kwaguqula izinto.
Ngokuvamile, uTinkler uyakwazi ukulwa nakuba evuma ukuthi kuyoba inselelo enzima.
“Ukudlala namaqembu akwiNFD kuba umdlalo ohlukile, kufanele ube nendlela ehlukile. Ukwesaba kwami ukuthi uqala ukwehlisa izinga lakho, kanti awukwazi ukukwenza lokho. Kumele ugcine uzinga eliphakeme, lezinga lePSL. Uma ungakwenza lokho, ungayinqoba imidlalo uma usubhekene namaqembu eNFD kodwa uma wehlisa izinga lakho, uzozithola usenkingeni.”
Ukhuluma ngento ayaziyo, njengoba eseke wadlala imidlalo yobungani namaqembu asemazingeni aphansi.
“Umdlalo wethu wokuqala usekhaya sobe sibhekene neRoyals, bese senza uhambo oluya eVenda. Leyo midlalo emibili ibaluleke kakhulu. Lokho esizokuthola ekhaya nasekuhambeni kubaluleke kakhulu.
“Kungenxa yokusinda kwethu. Umsebenzi osemkhulu. Abadlali bazohlala lapha enye inyanga lapho kufanele baya kwikhefu. Kodwa ngibalungiselele lokhu, ngakho-ke bakulungele nangokwenqondo,” kuphetha uTinkler.
Imidlalo yamaplay- off iqale ngoLwesithathu lapho iRoyal Eagles ibhaxabule iTTM ngegoli elilodwa eqandeni. IMaritzburg United ibikhona enkundleni iwubukela lo mdlalo.
Umdlalo olandelayo uphakathi kweMaritzburg United neRoyal Eagles ngesonto ntambama eHarry Gwala Stadium.