Imizwa eyahlukene kuvulwa iSishayamthemtho
Lokho sizokwenza ngomfutho omkhulu ngoba yilokho abantu abakulindele kuthina
ULA masonto amathathu edlule ezitaladini zoMgungundlovu bekuphithizela yimibhikisho yokunganeliseki kwezakhamizi. Nokho ngoLwesithathu lesi simo siguqukile njengoba bekugcwele izicukuthuthwane ebezihambele ukuhlala kokuqala kweSishayamthetho Sesithupha saKwaZulu-Natal.
Ngesikhathi kumatasa eSishayamthetho kufungiswa amalungu, kuqokwa uNdunankulu omusha, uSomlomo neSekela lakhe, ngaphandle kwalesi sakhiwo bekunezakhamizi ebezingazi nokuthi kwenzekani ngaphandle kokubona kuphithizela izicukuthwane kuvalwe nezinye izindawo okujwayele ukupaka kuzo izimoto.
“Ngibona kuphithizela amaphoyisa nezimoto kugcwele nabantu kodwa angazi ukuthi kwenzekani,” kusho uVusi Dladla ohlala emigwaqeni yedolobha uMgungundlovu. Ubephendula umbuzo weBAYEDE wokuthi ngabe uyazi yini ukuthi kwenzekani njengoba bekuphithizela abantu nabezindaba kule ndawo.
Phela osopolitiki bebebuthene kule ndawo obekuwusuku lokuqala lokuhlala kweSishayamthetho Sesithupha sesifundazwe emuva kokhetho lwamhla ziyisishiyagalombili kuNhlaba nonyaka.
UVusi ongavotanga kulolu khetho ngoba alahlekelwa umazisi wakhe uthi ukuba ubenawo nakanjani ubezovotela i-African National Congress (ANC) ngoba unethemba lokuthi ingayiguqula impilo yabantu abafana naye.
Nokho uthi uma kuphithizela eSishayamthetho njengoba bekwenzeka ngalolu suku, bayakwazi ukuthola amasentshana ngokuqapha izimoto zabasuke befikile abapaka emigwaqeni. “Ngiyazi ukuthi thina esihlala emigwaqeni sithathwa njengabantu ababaleka emakhaya kanti sinezizathu zethu ezahlukene ezasiphoqa ukuthi sigcine silapha. Bengingajabula uma uhulumeni nathi engasibhekelela ngokuthile noma amatoho ukuze sikwazi ukuziphilisa,” kusho uVusi owale waphetha ukuthi kuvezwe ubuso bakhe ephephandabeni.
U-Aieh Muhamed (23) odayisa izithelo emgwaqeni uLangalibalele lapho iSishayamthetho sizinze khona, uthe uqale ukudayisa lapha ngowezi-2017 kodwa yena nabanye abazisebenzayo kule ndawo noma kwezinye izikhathi kubahlomulisa ukuba khona kweSishayamthetho lapha abakutholi ukwesekwa okwanele uHulumeni.
Okwale nsizwa engeyokufika kuleli kodwa engathandanga ukudalula ukuthi idabuka kuphi, kwehlukile kunokukaVusi ngoba yona ithe iyazi ukuthi bekufungiswa amalungu eSishayamthetho.
Isicelo sika-Aieh kuHulumeni Wesifundazwe nakuNdunankulu waso omusha uMnu uSihle Zikalala ukuthi abadayisi basemgwaqweni bakhelwe imipheme abazosebenzela kuyona. Ukhale ngokungabi nezinqola abazisebenzisa ukwehla benyuka emigwaqeni bedayisa.
“Uma uHulumeni engasisiza ngokusakhela imipheme singajabula. Akukho okunye engikulindele ngaphandle kwalokho ,” usho kanje.
Ngaphakathi eSishayamthetho belilikhulu isasasa kumalungu, abezofungiswa ehleka kuvela elomhlathi.
Ngaphambi kokuba kuqalwe umsebenzi wosuku, kuvulwe ngemikhuleko yezinkolo ezahlukene. Kuthe kungaqedwa uMengameli wamaJaji KwaZuluNatal uMehluleli u-Achmat Jappie wawuqala umsebenzi wokufungisa amalungu. Kuqalwe ngoZikalala, uNkk uNomusa MaDube Ncube, uMnu uMluleki Ndobe noMnu uJames Nxumalo. Kube sekulandela amanye amalungu e-ANC nawamanye amaqembu. Kungenwa esigabeni sokuqokwa kukaNdunankulu Wesifundazwe, uMaDube uphakamise igama likaZikalala elesekelwe uMnu uSipho Hlomuka ohlekise abaningi echaza uZikalala njenge-“son of the soil”.
UZikalala ube esebuzwa ukuthi ngabe uyakwamukelwa yini ukuqokwa kwakhe waphendula ngokuthi “yebo ngiyakwamukela” kwasho kwaduma izandla kwaduma ihlombe endlini.
Kucaca ukuthi awekho amanye amagama aphakanyiselwe kulesi sikhundla, uZikalala ube eseqokwa njengoNdunankulu okulandelwe ingoma ethi “Phakama ixesha lifikile”. UZikalala kulindeleke ukuthi ngoMsombuluko amemezele ikomiti lesigungu sakhe. Kugcinwe ngokuthi kufungiswe amalungu amaqembu amancane iMinority Front (MF), i-African Transformation Movement (ATM) ne-African Christian Democratic Party, (ACDP) amelwe uNkk Thakur-Rajbansi, uMnu uMxolisi Phakathi noMbhishobhi u-Eric Manqele ngokwehlukana. Ukuzibophezela kwamaqembu Amaqembu ayingxenye yeSishayamthetho aveze ukuthi azimisele ukusebenzela umphakthi owathume ukuba awumele.
UMnu uVelenkosini Hlabisa we-Inkatha Freedom Party (IFP), uthe uyalibophezela iqembu lakhe ekusebenzeleni ukuyisa isifundazwe phambili. Kubonakala ukuthi wenyukelwa umoya, wexwayise uZikalala ngokuthi kasoze awubhala kabusha umlando waKwaZulu-Natal. “Uma ungeve uqhutshwa yinzondo uzokhumbula ukuthi koNdunankuku baKwaZulu-Natal owokuqala kwakunguDkt uMdlalose walandelwa uDkt uNgubane owalandelwa wuDkt uMtshali. Lowo wumlando ongeke wabhalwa kabusha. I-IFP iyakucela Khuzeni ukuthi ukuze izinto zilunge kule ndlu, musa ukusebenzisa inzondo ngoba kuzoba nzima ukuthi lesi Sishayamthetho sithole ukwesekwa okugcwele yi-IFP,” kusho uHlabisa.
Lokhu ukusho kulandela ukuthi uZikalala encome oNdunankulu abake baphatha lesi sifundazwe kodwa wangababalula abe-IFP.
Umholi we-Economic Freedom Fighters (EFF) uMnu uVusi Khoza, uthe bayazibophezela ukusebenza ngokuzikhandla ukuzuza abakuthunywe abantu baKwaZulu-Natal. “Lokho sizokwenza ngomfutho omkhulu ngoba yilokho abantu abakulindele kuthina,” usho kanje.
Uthe uyethemba ukuthi lesi sifundazwe sizozibeka phambili izinto ezithinta abantu njengokuqashwa ngokugcwele kwabantu nokuvalwa kohlelo lwe-Expanded Public Works Programme (EPWP) ngoba luyindlela yesimanje yokugqilaza abantu.
IDemocratic Alliance (DA) ngomlomo kaMnu uZwakele Mncwango, ithe iyethemba ukuthi udaba lokuhlinzekwa kwezidingongqangi luzobekwa eqhulwini kuliwe nenkohlakalo kulesi sifundazwe. Ubale nokucutshungulwa kwempilo yamalungu eSishayamthetho nokulungiswa kwesimo sikaMasipala iTheku ngokufakwa kwawo ngaphansi komlawuli.
UNkk Shameen ThakurRajbansi weMF uthe kule minyaka emihlanu ezayo bazosebenza kanzima kwazise bafundile emaphutheni esikhathi esedlule.
UMbhishobhi u-Eric Manqele uthe bazoqinisekisa ukuthi lukhona uzinzo eSishayamthetho nokuthi abantu abahlwempu banakiwe.
UMnu uMxolisi Phakathi we-ATM uthe bazimisele ukusebenzisana namanye amaqembu ukuze izinto okufanele zifinyelele kubantu zifinyelele kubo.
Ne-ANC ngomlomo kaZikalala izibophezele ekusebenzeni namanye amaqembu.