UBukhosi bungayihola eyentuthuko emakhaya
▪Umdonsiswano wosopolitiki noBukhosi ngentuthuko emakhaya awunasidingo kubhala uMFO wakwaNOMAJALIMANE
INTUTHUKO yasemakhaya iya ngokuya iba yinoni ozinzweni lwezenhlalo nasekuthuthukeni kwezwe kwezomnotho. Sekuholele ekutheni imiphakathi yasemakhaya inakwe kakhudlwana ngabaningi abazibandakanya nentuthuko. Lena yinto enhle ngoba ivezela nabangazi ngenhlupheko nezifiso zemiphakathi yasemakhaya. Nokho kukhona okuthize othi uma usubheka ubone ukuthi akuhambi kahle.
Umdonsiswano phakathi koBukhosi, uhulumeni nabanye osopolitiki uphazamisa kakhulu intuthuko emakhaya. Futhi uma uthi uyabuka okubangwayo uthole ukuthi akukho, zinhlaka nje ezimbili ezithibelene. KwaZuluNatal njengakwezinye izifundazwe lo mdonsiswano awuyona imfihlo, osopolitiki emihlanganweni yabo abakufihli ukuthi abathandi ukuthi uBukhosi kube yibo obusekhaleni lentuthuko emakhaya. Kanjalo noBukhosi kabufihli ukuthi ‘amahalanjonjo’ lawa angosopolitiki akangasondeli. Imikhonto icije nhlangothi zozimbili.
Ngonyaka wezi-2012 iSILO sizama ukubhula lo mlilo sethula Ingonyama Rural Development (IRD) Forum. INhlangano yakhiwe ngokuhlanganisa abaholi boMdabu, abalimi, ongoti, abacwaningi, amabhizinisi nabakha inqubomgomo ababuthene ngokulandela isakhiwo sentuthuko yasemakhaya.
Ubunjalo bendlelakwenza beNhlangano i-IRD bunesisekelo esihlose ukuqhuba inqubo yentuthuko yasemakhaya kusukelwa emaphuzwini
amathathu.
Elokuqala iphuzu, izakhiwo zomdabu ngokwezimo zazo nangokwamazinga kufanele zihambise intuthuko yasemakhaya.
Lezi yizakhiwo ezididiyelelwe empilweni yabantu basemakhaya futhi kungakho ziqondwa kalula. Lokhu kudinga ukuthi abaholi boMdabu babe ngamanxusa oguquko nentuthuko ezindaweni zabo abaziphethe. Elesibili, intuthuko ingenziwa kahle ngokubambisana kwayo yonke iminxa nababambe iqhaza. Akukho munxa nowodwa okufanele ube nombono ubuye uwenze ngaphandle kokubandakanya bonke abathintekayo zisasuka amadaka.
Elesithathu, intuthuko ingumqondomsuka omagatsha ngakho-ke kufanele ithathwe ngendlela ewumumpu efaka inhlalo, abantu nomnotho.
Lo mqondo nombono weSILO wenanelwa nayi-African Union ngaphansi kohlelo lweNEPAD neyanele yezwa ukuthi selibubulile iBhubesi yase isondela . Ekusondeleni kwayo yamema iSILO ukuba siyokhuluma eBenin, phakathi kwabashayimthetho, nezifundiswa zase-Afrika.
Ukutshengisa ukuthi esabe sikusho kwabe kungenzeka, ngesikhathi simenywa yiNEPAD sama ekutheni ngeke silubeke eBenin ungekho uHulumeni waso. Nembala owayenguNdunankulu waKwaZulu-Natal wajuba uMnu uNhlanhla Ngidi owayenguMqondsi Omkhulu ukuba aphelezele Ongangezwe Lakhe.
Nakhona eBenin Omdala wavikela uNgqongqoshe uGugile Nkwinti esho khona ukuthi yize kusenzima kepha inqubomgomo yakuleli inazo izinhloso ezinhle ngentuthuko yasemakhaya. Sekungumlando ukuthi umhlangano waseBenin waphenduka uhlelo nenqubomgomo ye-AU okumanje namuhla i-Afrika inohlelo oluqondile mayelana nezolimo nentuthuko yezindawo zasemakhaya.
Okuyisifundo lapha wukuthi uBukhosi kanye nezinhlaka zabo bangayihola ngokukhululeka eyentuthuko nokuba ngcono kwezindawo zasemakhaya. Asikho isidingo sokuklwebhana phakathi koBukhosi noHulumeni uma kuziwa entuthukweni yomphakathi.
Zombili lezi zinhlaka zimqoka ekuqinisekiseni ukuthi konke okuyizifiso zomphakathi kuyafezeka.
Ukutshengisa ukuthi esabe sikusho kwabe kungenzeka, ngesikhathi simenywa yiNEPAD sama ekutheni ngeke silubeke eBenin ungekho uHulumeni waso