Usabisa ngokuneka obala amahlazo eNFP oxoshiwe
WESABISA ngokuqhumbuza ithumba ngeNational Freedom Party (NFP) umholi wayo KwaZulu-Natal omiswe ngemizuzu yokugcina ukuba afungiswe njengelungu leSishayamthetho salesi sifundazwe ngoLwesithathu.
UMnu uVikizitha Mlotshwa bekulindelwe ukuba afungiswe kanye namanye amalungu eSishayamthetho kodwa kwamangala abebehambele lo mcimbi uma engasabonwa kwabebefungiswa uMengameli wamaJaji KwaZulu-Natal u-Achmat Jappie.
Ngaleso sikhathi uMlotshwa ubesephuthume kubameli bakhe kulandela ukuthi etshelwe wuNobhala weSishayamthetho ukuthi ngeke afungiswe ngoba iqembu lakhe selithumele incwadi ekuvimbayo lokho labalula ukuthi selimxoshile eqenjini.
Abameli bakhe babe sebefaka isicelo esiphuthumayo eNkantolo eNkulu yaseMgungundlovu ukuthi ichithe incwadi yobuholi obuphezulu beqembu.
Ilungu leNFP lokuqina igama lalo esiligodlile, litshele iBayede ukuthi bathole ukuthi encwadini ethunyelelwe iSishayamthetho ebisayinwe uMengameli weqembu uNkk uZanele KaMagwaza Msibi noSihlalo obambile uMnu uBonginkosi Dlamini bekukokothelwe ukusayina kukaNobhala weqembu uMnu Hamilton Sibisi.
“Uthuke woma uSibisi obesePhalamende likazwelonke eKapa eyofungiswa njengelungu ezwa ukuthi kunencwadi esayinwe nguye exosha uMlotshwa eqenjini futhi ethi akufanele afungiswe. Le ncwadi ibingenalo usuku ebhalwe ngalo,” kusho leli lungu.
Liveze ukuthi inkantolo iyichithile ngakho sekukuSomlomo weSishayamthetho uNkk Nontembeko Boyce ukuba asho usuku azofungiswa ngalo uMlotshwa.
Leli lungu likhale ngabantu abangaphakathi eqenjini abangafuni ukwamukela ukuthi abangenanga eSishayamthetho asebesebenzisa uKaMagwaza ngoba engaphilile.
“Imiphumela yokhetho esiphuma kulo bekungafanele ibe njena kodwa ngenxa yalaba bantu sizithole sesinesihlalo esisodwa eSishayamthetho. Manje iqembu sekufanele lisebenze ukulungisa lokhu,” lisho kanje.
Ethintwa uMlotshwa ukuqinisekisile ukuthi efika eSishayamthetho ekuseni ngoLwesithathu utshelwe wunobhala waso ukuthi bathole incwadi evela kuNFP enqamula ubulungu bakhe ngakho ngeke esafungiswa.
Ukuqinisekisile futhi ukuthi abameli bakhe bafake isicelo esiphuthumayo enkantolo yabavuna.
UMlotshwa obezwakala ukuthi uthukuthele, uthe usefuna uKaMagwaza ukuthi aphumele obala achaze ukuthi iNFP ekabani.
“Sekufike esikhathini lapho kufanele ngidalule yonke into ngeNFP. Sekufanele kucace ukuthi uZanele usakulungele yini ukuhola nokuthatha izinqumo,’ kusho uMlotshwa. Okhulumela iqembu uMnu uSimo Mkhwanazi, uthe iNFP ibingakayitholi incwadi yenkantolo ebaphoqa ukuthi babuyisele uMlotshwa eqenjini nokuthi kumele afungiswe njengelungu leSishayamthetho.
UMkhwanazi uthe iqembu lathatha isinqumo sokukhomba indlela uMlotshwa nyakenye kwaba nguye ocela ukuqhubeka kuze kudlule ukhetho. Uqhube wathi imiphumela emibi etholwe yileli qembu okhethweni lwangoNhlaba ngokunye okwenze ukuthi iNFP ingabe isamamukela.
“Siyezwa ukuthi uye enkantolo futhi siyabona ezinkundleni zokuxhumana kodwa thina njengeqembu asikayitholi incwadi yenkantolo. Nathi sesixhumene nabameli bethu ukuze sifake isicelo enkantolo sokuthi kuzwakale uhlangothi lwethu ngoba okwamanje inkantolo izwe olwakhe kuphela,” kusho uMkhwanazi.
Uveze ukuthi sebesibhalele iSishayamthetho besazisa ukuthi bafisa lolu daba lusonjululwe.
Uphinde wakhala ngommeli obemele uMlotshwa enkantolo wathi bekungafanele akwenze lokho ngoba wayeyingxenye yokubhalwa kohlelo okwakuhloswe ngalo ukuhlanganisa izinhlangothi ezazingaboni ngasolinye kuNFP.
Uzichithile izinsolo zokuthi kukokothelwe ukusayina kukaSibisi encwadini ethunyelelwe iSishayamthetho.
Udalule ukuthi sebenaye umuntu abazomjuba eSishayamtheto okunguMnu uSibusiso Mkhabela.
Sekunesikhathi umdonsiswano ngobuholi beNFP KwaZuluNatal waqala. Emuva kokuba sekwenziwe imizamo yokuxazulula lesi simo, uqhekeko luhlale obala ekuqaleni konyaka ngesikhathi linesithangami sabezindaba eThekwini lapho kwakuphikiswana ngomholi walo kulesi sifundazwe.
Kukhona ababethi wuMlotshwa abanye bekhomba uMnu uNhlanhla Khawula.