Kuhlukene ukuphawula ngesinqumo ngoMabuza
Mhleli UMFO kaMabuza asicacise ukuthi nje okokuqala ubaziwa futhi mhlawumbe ethandwa eMpumalanga esenguNdunankulu khona. Kuthe uma esengena ePhalamende laseKapa kwaqapheleka ukuthi ngakwezombusazwe kazwelonke akanalo ugazi. Lokhu kucaca ngisho nangaphakathi kuKhongolose.
Ngakho ngithi nakuba kungelula ukuthi uRamaphosa amqhelise kwesokuba yiPhini likaMengameli, kodwa mangisho ukuthi uma kungake kwenzeke lokho angiboni kungaphazamisa i-ANC ekubuseni kwayo.
Ngisho nezinhlelo zowe-2021 angicabangi ukuthi kukhona abangazifadabalisa, ngoba nje bethi bangena udaba lukaMabuza. Ngikusho lokhu ngoba okokuqala wangena ngewindi kwesokuba yiSekela ngenxa yokuthi wavukela uDkt uNkosazana Dlamini Zuma esiswini njengotshwala. Ngamafuphi mina ngithi uRamaphosa angamgcina ngoba nje ethanda, hhayi ngoba kukhona okubi okungenzeka uma engamkhomba indlela. Angiboni enesithunzi nesisindo esingasusa umsindo noma sehlise amavoti kaKhongolose ngokhetho lohulumeni bezindawo ngowezi-2021 uma kungaphenduka amatafula adilike kulesi sikhundla. - nguSipho Mbatha Mhleli BALIBELE ukujikelana okotshwala busesiswini kunokuba basebenzele izwe. Engabe bayabona yini labo abavotele i-ANC njengoba naseZimbabwe iZanu PF yaliguqisa kanjena izwe. Sikhuluma nje ingxenye enkulu yabantu baseZimbabwe igcwele eNingizimu Afrika abanye babo bayizigebengu. - nguBongaz Khumalo Mhleli AKOGAWULA abheke uRamaphosa angalenzi lelo phutha. Ukuba khona kukaMabuza laphaya kubalulekile ngoba ungenye yezinsika ezimise uKhongolose emva kwenkomfa yangonyaka odlule. Le nto eyenzekayo izobhibhisa izilonda kubantu nabasengxenyeni ethile. Unyaka wokhetho lwezi- 2021 ususemome. Abayongena lapho bexhuga bayobonakala. - nguCebo KaKhali Ozivundla Mbatha Mhleli ISAZODLALA, yabona le ndoda yaKwaDakwadunuse yasho kuthi kophenyeka ibheshu kwabaningi njengoba iminwe yayikhomba yena ngenjumbane, kunjani namhlanje. - nguMandla Nsiba Sibanyoni Mhleli NGIBONA uMabuza engaba uMengameli wezwe ngonyaka wezi2024. Bona-ke laba abakhonjwayo bayolunga yini njengoba amadolo eqina namaqakala evuvukala nje.
Ngiyasola lokhu kungabikhona kophiko lwentsha kufadabalisa izinto. - nguSibonakaliso Mngoma