Usuku lokubungaza i-Afrika kumele lube yisikhumbuzo
KUSASA zingama-25 kuNhlaba ezwenikazi i-Afrika wusuku olukhulu lokuyibungaza olwaziwa nge-Africa Day. Lapha kusuke kubhekwa emuva lapho i-Afrika esuka khona, kubhekwa negxathu eselihanjiwe ekuphuculeni impilo yabantu ezwenikazi nasekuhlanganiseni lawo mazwe asaphenduka imihlambi eyalanayo ngenxa yobuzwe nokungahoshelani kwezepolitiki.
Emlandweni wezwekazi, iGhana kwaba yizwe lokuqala ukuzuza inkululeko emazweni aseNingizimu yeSahara ziyisithupha kuNdasa ngowe-1957. Leli lizwe ngaphansi kobuholi bukaKwame Nkrumah owaba ngowokuqala ukulihola emuva kwenkululeko, laba nomnikelo omkhulu ekulweni nenqubo yobukoloni nokusiza amanye amazwe ayesacindezelwe ukuthi aphume emaketangweni abacindezeli.
INingizimu Afrika ibe yizwe lokugcina ezwenikazi ukuthola inkululeko ngowe-1994 emuva kweNamibia ngowe-1990 okungephikwe ukuthi amazwe amaningi kuleli zwekazi abambe iqhaza elikhulu emzabalazweni weminyaka wokukhulula elakuleli ngokwezepolitiki. Njengoba sibungaza lolu suku njengama-Afrika singakusho ukuthi kwezepolitiki imiphumela yenkululeko iyabonakala, kodwa kwezomnotho akhona amazwe asathwele kanzima, kwamanye izithelo zenkululeko yezomnotho njengeRwanda, i-Uganda, iTanzania nayo iGhana ziyabonakala.
Ukusungulwa kwezinhlangano ezinjengeEconomic Community of West African States (ECOWAS) okungamazwe asempumalanga yezwekazi neSouthern African Development Community (SADC) okungaseningizimu ngenye yezinto ezidinga ukunconywa ngoba zaba wumphumela wobumbano lamazwe ngaphansi kwe-Organisation of African Unity (OAU) esiyaziwa nge-African Union (AU).
Lezi zinhlangano zinomthwalo onzima wokuqeda isihlava esadalwa amakoloni sokwakha imingcele phakathi kwezizwe e-Afrika ngenxa yokwehlukana ngezilimi, amasiko nenkolo ngisho nangendlela yokuphila. Phakathi kwethu base-Afrika sisodwa isekhona le nsila yengcindezelo yokuthi mina ngingowesizwe esithile akumele ngithathe umyalelo kumuntu oqhamuka kwesinye isizwe. Lokho kuyinto engasiyisi ndawo. Njengoba sibungaza lolu suku namuhla kumele sizifundise ukuguqula ukwenza siyeke ukugxeka njalo inqubo yobukoloni ngoba izwekazi selisezandleni zethu. Izimpi ezikhungethe amanye amazwe ezwenikazi ezinye zazo ziwumphumela wokungalikhulumi iqiniso kwabaholi bamazwe nokuhlukanisa abantu phakathi ngoba benezinhloso zabo zokuqhubeka nokuhlala emandleni.
Iphupho labaholi bangaphambili lokubumba amazwe ezwenikazi nokuqeda imingcele ekhona siyethemba ukuthi liyofezeka ngelinye ilanga. Uma lingagcina lifezekile lingaba nomthelela ekuqedweni kwezigameko zokucwasana kwama-Afrika.