ISishayamthetho Sesi-6: Isiqalo esisha kithi sonke
USUKU lwangoLwesithathu belumqoka ekhalendeni lepolitiki yakuleli. Ngalolu suku kuzwelonke nasezifundazweni bekuqalwa umsebenzi wokwakha iPhalamende nezifundazwe ezintsha ngokwenqubo kaHulumeni okuthiwa yiPhalamende noma iSishayamthetho Sesithupha. Lapha amalungu asuke eqokwe ngamaqembu awo ayafungiswa ukuze abe ngamalungu ngokugcwele. Yize umsebenzi kahulumeni ungami ngoba kunokhetho noma kuthatha omunye uhulumeni, lesi kusuke kuyisigaba sokuqala kabusha kuhulumeni namalungu amasha asuke efungiswa.
Akuyona imfihlo ukuthi iPhalamende Lesithupha lakhelwe phezu kwezinto ezingamachilo ezifaka inkohlakalo ekhonjwa kuwo amalungu ePhalamende neZishayamthetho. Uteku lapha wukuthi laba ngabantu umthetho nenqubo yePhalamende othi ababizwe ngaBahlonishwa. Akuyona futhi imfihlo ukuthi kuvotwa nje abantu kabaneme ngezinga lempilo kuleli.
Ukuvela kwezibalo zakamuva zokulahleka kwemisebenzi kuthunuke isilonda ebese sivele sibhibha kubantu bakuleli; lesi yisilonda sobubha obubikwa kuzo zonke izingxenye zezwe ikakhulukazi kwaboHlanga.
ULwesithathu lokufungiswa lufike nje ubudlelwano phakathi kwabezindaba nababusi bezwe abubuhle ngoba kuyanukwana. Nobudlelwano phakathi kwezakhamizi zakuleli kanye nabangaphandle ikakhulukazi abavela maphakathi ne-Afrika abubuhle. Izigameko ezibikwayo zokungqubuzana kufakazela khona lokho. Okunye ukungqubuzana okomphakathi nezinhlaka kanjalo nabaholi kuHulumeni. Ukubhujiswa ngebhomu likaphethilolo komuzi wekhansela neligcine lendele koyisemkhulu kufakazela ukucija kwemikhonto phakathi kwamalungu omphakathi kanye nalabo abaqokelwe ezikhundleni. Amakhansela wona ayavelelwa ngoba ulaka lonke luphumela kuwo ngisho kone omunye.
Sonke kuyoba kuhle ukuba sibuke iPhalamende Lesithupha njengesiqalo esisha kithi sonke. Kusuka ekulungiseni ubudlelwano phakathi kwezinhlaka zikahulumeni, abezindaba nomphakathi kuya ekubuyiseni ukwethenjwa yizinhlaka zikahulumeni namalungu ahloniphekileyo ePhalamende nakuziShayamthetho. Lokhu singakwenza ngempumelelo inqobo nje uma sonke sivuma ukuthi eminyakeni engama-25 kukhona amaphutha enzekile kuleli nafuna thina njengezakhamuzi siwalungise ngale kobuqembu. Seliqalile iPhalamende Lesithupha ingcabha ingakithi, sonke.