Liyadingeka ikhono lokuphatha umhlaba kwaboHlanga
ABOHLANGA abazinuke amakhwapha babeneqiniso kubona kuqala bese beyazibuza ukuthi ngabe bazokwazi yini ukuqhubeka nokuyisebenzisa imihlaba abangena kuyona kungavunyelwananga noma kuvunyelwene baze banikwe nezinsiza nguHulumeni. Kanti eminye imihlaba babeyizisebenzi,behlala khona kodwa bagcina ngokuvilapha, bahluleke ukuwunakekela uma ususezandleni zabo, kuze kumile izikhotha namahlathi, izindlu zibe yimihume yabaphangi.
Phambilini ngalubalula udaba lokuthi aboHlanga bafuna ukubuyiselwa umhlaba wokhokho babo. Nokuthi abababoni osopolitiki neqeqebana labantu noma selidlala ngemizwa yabo, sebebavukuza ngolomhlaba, bengabanikanga aboHlanga izinsiza zokuhlangabezana nezidingo zaleyo mihlaba abasuke sebengene kuyo ngenkani. Bagcina sebevela kuthelevishini, begxeka befuna usizo ezinhlakeni zikaHulumeni engabe bagxeka osopolitiki neqeqebana labantu elalibagqugquzelile ekuqaleni. Nganxusa kanti nanamanje
ngisamnxusa uMengameli uCyril Ramaphosa ukuba alivule ithuba lokwamukelwa kwalezo zicelo zokunxeshezelwa kwabantu abasuswa ngendluzula ezindaweni ezahlukene.
Uma sesihlabela phambili ngomlando siyathola ukuthi aboHlanga emakhaya babekukhonze kabi ukulima. Ngapha emalokishini ahlukahlukene babenezindawo ezincane zokulima emagcekeni ngeminyaka yowe-1960,1970 nowe-1980, belima nomhlaba ongekho emagcekeni lokhu abangasakwenzi manje.
Njengaselokishini KwaMashu kwa-H, okwakunobaba uNgcobo kanye nomakhelwane wakhe uNtshebe ababelime ummbila nokunye ngowe-1970 ngasemigwaqweni uMkhombe noBhejane manje osekwakhiwa izindlu. Kube ngumkhulu kaThulani Docrain Mpisi kwa-F emgwaqeni uZulu ngonyaka ofanayo wayelime ummbila nobhatata lapho sekwakhiwa khona iKwesethu High School. Kwa-D emgwaqeni iNgome, kwakunensimu yamaklabishi okwagcina sekuyisitobhi ababesibiza ngokuthi kusemaklabishini. Insimu yavaleka ngenkathi kwakhiwa umgwaqo uQueen Nandi Drive.
Singakhohlwa ukuthi emakhaya kwakunabelungu ababenezitolo bewusizo kakhulu emphakathini. Kuyahlaluka ukuthi aboHlanga behluleka ukunakekela umhlaba owawukade ukubelungu.
Emakhaya sithola ukuthi aboHlanga behluleka ukunakekela umhlaba ababebuyiselwe wona. Ingani Eshowe oSungulweni eMpaphala, KwaDaka, KwaDlani, eMvuzane kwakunomlungu uJoni owayewusizo emphakathini, enezitolo, enamasimu ezithelo zama-olintshi nawomoba, edayisa izinkukhu namaqanda nokunye okuningi, eqashe aboHlanga baseShowe namaphethelo njengomlungu uBond wakwaNongoma. Amaolintshi ayedayiswa eNingizimu Afrika naphesheya kwezilwandle. Uma sesidlulile isikhathi sawo bese aboHlanga beqhubeka nokuyosebenza ezinkukhwini.
Kwaqhubeka uParker, lakhula ibhizinisi waze waqoqela eduzane izidingo eziningi kwabasoSungulweni, eMpaphala, KwaDaka, eMvuzane nakwezinye izindawo. Izitolo zakhe zanda,waze waba negaraji, indawo lena yacishe yafana nezinxanxathela yezitolo ezinkulu bangabe besasibona isidingo sokuyothenga edolobheni Eshowe. Umlungu wayebadayisela yize bengenayo imali.
Bamjikela uParker bafuna umhlaba. Wavuma uParker kodwa wancenga ukuba bamshiye nezitolo, igaraji, nezinkukhu kodwa umphakathi wase-Eshowe wafuna konke. Umphakathi wawusushabashekela ukuba umlungu awunike ngisho nezitolo ezisemhlabeni wokhokho ufuna ukuziphathela. Wehluleka futhi sewuyazisola. Kumile utshani lapho okwakungamasimu amaolintshi usubona ngezimpawu emhlabathini ukuthi kwakulinyiwe kule ndawo.
Kwahluleka ngisho iNkosi uBhekabelungu Biyela ibabuza ukuthi uma behluleka babezokumela yini ukuyothenga nsuku zonke kude edolobheni Eshowe nokuyizindleko. Yawuxwayisa umphakathi nangobungozi bokuphikinkani. Okwalandela lapho kwaba wukuphela kwemisebenzi kanti iningi seliyamkhumbula uParker owayewusizo kakhulu emphakathini. Sebeyagqilazeka manje uma beyothenga edolobheni Eshowe ngoba bahamba ngamatekisi imizuzu engama-45.
KwaNongoma kwakunomlungu uBond owabe ewusizo kakhulu emphakathini wakhona. Kufakazelwa nguMntwana uNonhlanhla enkulumweni yakhe elotshwe ebhukwini elikhuluma ngomlando ogunyaziwe weNgonyama uGoodwill kaBhekuzulu, ethi; King of GOODWILL, eyabhalwa nguSolwazi u-OEHM Nxumalo,uSolwazi uC.T Msimang no-I.S Cooke.
NaseRichmond esigodini saseMgxobeleni kweseNkosi uMzwandile Mbeje okwabuye kwaqanjwa isikole kwathiwa iMzwandile Mbeje High School. Nakhona kwaba nesicishe sifane nesaseShowe.
EMgxobeleni kwakwakhe umlungu owayenamasimu ayetshale itiye. Kwakuqashwe umphakathi wakhona. Itiye lalihlakulwa uma selivuthiwe, lihluzwe bese lithunyelwa ezinkampanini ezigaya itiye. Bawufuna nakuyena umhlaba.
Bawuthola umhlaba emva kwalokho bakhetha ukwakha amadlelo emfuyo, yafadalala kanjalo indawo yamasimu etiye sekuphethe aboHlanga, kwaphela nemisebenzi. Kwamila utshani bokufulela izindlu nobungathandwa imfuyo. Abanye babo bantshontsha nempahla. AboHlanga bakuthanda kabi ukuzigwaza ngowabo. AboHlanga bamanje bavilapha ukudlula abasemandulo.
Indaba yokubuyiselwa umhlaba ayiyintsha njengoba bebonakala abanye beyithatha njengento eqalayo ukukhulunywa ngayo ngenxa yosomathuba ekubeni kwaqala ukuba kukhulunywe ngayo kusukela ngonyaka we-1996 sekuwuhulumeni wedemokhrasi. Emveni kancane konyaka wezi2000 abantu base beqalile ukuba uhulumeni ababuyisele umhlaba. Lokho kusaqhubeka njengoba sisababona bebuyiselwa imihlaba.