Ngokomthetho uma umuntu esengaphakathi ezweni uvikelekile
INTATHELI engeyokuzalwa eNigeria esizinze kuleli u-Adikunle Onwabi ephinde ibe ngumxhumanisi wabantu baseNigeria noHulumeni wakhona ithi okuyosiza ukuze kuphele ukushushumbiswa kwezidakamizwa nobunye ubugebengu obuhleliwe obenziwa ngabadabuka eNigeria kuleli ukuthi iNingizimu Afrika iqinise umthetho olawula ukungena nokuphuma kwabokufika ezweni.
Ukuphawula kuka-Onwabi kulandela izikhalo ngokuthi noma imithetho ekhuluma ngamalungelo abokufika ezweni kodwa kuningi okungenziwa nokungalandelelwa okugcina sekwenze abantu bangene baphume kalula ezweni ngaphandle kokulandela umthetho. Lolu daba lube sematheni ngoLwesithathu esiteshini somsakazo iSAFM. Iphuzu ebeliphambili bekuwukungacacisi komthetho ngokuhweba kwabokufika ezweni.
Umthetho eNingizimu Afrika usebenza ngezindlela ezehlukene kodwa konke ukusebenza kwawo kuncike kuMthethosisekelo owengamele izwe. Wonke umuntu wakuleli uvikelekile ngaphansi koMthethosisekelo kodwa kubalulekile ukuqonda umthetho ngokuhlaliswa kwabantu bokufika ezweni nokuhweba kwabo, kanjalo nokubahlinzeka ngendawo uma sekumele batholelwe enye indawo ngoba nabo banelungelo lokuhlaliswa okwesikhashana endaweni ethile.
NgokweSigaba 4 sePrevention of Illegal Eviction ne Unlawful Occupation of Land Act 19 we1998, uthi uma umuntu esehlale endaweni isikhathi esiyizinyanga eziyisithupha, inkantolo ingakwazi ukuthi imkhiphe kuleyo ndawo uma ibona lokho kufanelekile, inqobo nje uma kuzobhekwa zonke izimo. Okubalulekile ukuthi lowo osuke esuswa endaweni kubhekelelwe ukuthi yiyiphi enye indawo angakwazi ukubekwa kuyo.
Ecaleni likaChapelgate Properties v Unlawful Occupiers of Erf lowezi-2016 kwakuwukuthi uMasipala waseJohannesburgh unaso yini isibopho sokuzamela enye indawo abantu ababengene ngokungemthetho endaweni yenkampani iChapelgate Properties. Iningi labantu ababengene kule ndawo ngokungemthetho ababeyingxenye yamaphesenti angama-60 kwakungebona abaseNingizimu Afrika.
Okwakufakazela lokho ukuthi nezincwadi ezibagunyaza ukuba kuleli babengenazo. Umsebenzi weNkantolo waba lula ngoba yanquma ukuba basuswe. INkantolo yabuye yanquma ukuthi uMasipala utholele indawo abanye ababesusiswe okwakuvela ukuthi bayintula ngempela indawo, kodwa nalokho kwakunombandela ngoba kwakumele baveze ukuthi banazo izimvume zokuba seNingizimu Afrika.
Okunye okwabe kuwumbandela ngukuthi bazifakile izicelo zokungena ezweni njengababaleki. UMehluleli uJohan Prinsloo wakhipha isinqumo esithi abokufika kuleli futhi abangene ngokungemthetho abakwazi ukuthi bangashiywa ngaphandle ekunikezelweni ngezindawo zokuhlala zesikhashana. Konke lokhu ngokukaMehluleli kuncike eMnyangweni Wezasekhaya. Ekubhekeleleni abokufika kuleli abangene ngokungemthetho kuhle ukubanikeza izindlu zesikhashana kodwa lezo zindlu akumele zibe yindlela yokungena ezweni nokuzitholela izindlu zamahhala.
UMehluleli uPrinsloo wanquma ukuthi kubalulekile ukuthi kube nemibandela kulabo abangene ezweni ngokungemthetho uma bezotholelwa izindawo zokuhlala, ikakhulukazi futhi uma behlulekile ukunikezela kusenesikhathi ngamaphepha awubufakazi bokuthi bayilandela yonke imigudu efanelekile njengokufaka isicelo sokungena ezweni ngoba engumbaleki. UMasipala ungakwazi nawo ukufaka isicelo esiphuthumayo enkantolo sokuthi bangabhekelelwa ngendawo yokuhlala yesikhashana bagobe nje amadlangala.