Okufanele ajeziswe phakathi komyaleli nomyalelwa
UKWEDELELA nokungathobeli imiyalelo esemthethweni nelungile yomqashi kuyaxoshisa. Ngokomthetho, umqashwa unesibopho sokuthobela, ahloniphe umyalelo osemthethweni nolungileyo womqashi. Umqashwa akabophezelekile ukuthobela umyalelo ophambene nomthetho nongalungile okanye ongenanqondo. Umyalelo womqashi kumqashwa kufanele kube ngohambisana nombandela womsebenzi aqashelwe wona umqashwa. Umyalelo kufanele kube ngohambisana neziqondiso ezaziwayo zokuziphatha emsebenzini eziyingxenye yesivumelwano sokuqashwa. Ngumuntu onegunya nelungelo lokulawula nokukhipha lowomyalelo okufanele awundlulisele kumqashwa umyalelo. Kulesi simo-ke umqashwa ubophezelekile ukuhlonipha nokwenza lokho akutshelwayo ngokomyalelo, noma asebenze ngokomyalelo obhaliwe owaziwayo ngasosonke isikhathi esemsebenzini.
Inkiyankiya iba sekutheni ubani okufanele ajeziswe uma sekutholakala ukuthi umyalelo uphambene neziqondiso zasemsebenzini noma imibandela yokuqashwa? Umbuzo uthi kulesi simo ngabe umyaleli noma iphepha bamxosha ngaphandle kokumqondisa ubugwegwe noma ukumnikeza ithuba lokuzikhalela. Induna yona ayangajeziswa yaqhubeka nokusebebenza.
Eselithetha icala uKhomishana, umqashi wavuma konke okwenzeka wama ekutheni uyayethemba induna yakhe ukuthi yayingeke ikhiphe umyalelo ophambene neziqondiso nemibandela yokuqashwa ephathelene nezokuphepha emsebenzini. Le nduna yona ayibizwanga ukuzofakaza lapha ecaleni futhi umqashi akangakwazi ukuphikela induna ngoba wayengekho ngenkathi ikhipha umyalelo. Esecubungule bonke ubufakazi uKhomishana wavuna umqashwa wanquma ukuba ebuyiselwe emsebenzini futhi ekhokhelwe isikhathi sonke ayesesihlalile.
Isizathu esikhulu sesinqumo sikaKhomishana ukuthi kuleli cala ngumyaleli hhayi umyalelwa obekufanele ajeziswe. Umyaleli unejwayezi lokuthumela abaqashwa abasezingeni eliphansi abamesabayo ukuba benze umsebenzi wakhe, ngakho usebenzisa isikhundla sakhe ukwephula iziqondiso zomsebenzi. Okungenani umqashi bekufanele abajezise bobabili induna nomqashwa, kodwa yena wakhetha iphela emasini. Nalapho futhi bekungemsize umqashi, ubezolahlwa yicala lokuxosha okungenabulungiswa.
Kuyaziwa emthethweni wezabasebenzi ukuthi ukona okufananayo kufanele kujejiswe ngokufanayo. Noma ngabe kwenzeka esikhathini esendlule, noma ngabe kwenzeka njengamanje, ukona okukodwa makujeziswe ngesijeziso esifanayo kungakhethwa iphela emasini, futhi kungayi ngesikhundla, ngebala nokuthi ungumtakabani. Usho kanjalo uMthetho Wezobudlelwano Emsebenzini uNombolo 66 we-1995 ngaphansi koHla Lokuziphatha Kahle: Mayelana Nokuxoshwa. “Umqashi makajezise ngokuxosha ngendlela eyodwa ayeyisebenzise ezenzweni ezifanayo ngaphambilini, futhi kufanane kubasebenzi abehlukene abenza noma abenze ukona okufananayo”. Kanjalo futhi nomHlahlandlela Wokwahlulela Emacaleni Okuxoshwa uthi umahluleli makabheke ukuthi “Umthetho wokuziphatha ojeziselwayo, ubusetshenziswa ngendlela efananayo yini ngumqashi”.
Kodwa lo mbandela womthetho othi abenze ubugwegwe obufanayo kumele bejeziswe ngokufananayo kawusebenzi kwezinye izimo ezifana nalelicala. Inkantolo Yezabasebenzi ikuchazile lokho ecaleni unombolo JR 2416/15 le-ASSMANG (PTY) LTD T/A KHUMANI MINE elahlulele zili-17 kuNhlangulana wonyaka owendlule. Okwakwenzekile ukuthi induna yasemayini yahamba nethimba layo inqamula ebhulohweni okungahanjwa kulo ngezinyawo, lapho kuhamba khona izimoto kuphela. Ayangalalela uma beyikhuza abezokuphepha. Yaxosha yona yodwa induna.
Ecaleni eliphelele eNkantolo Yezabasebenzi, ibikhala ngokuthi yiyo yodwa eyayixoshiwe bonke abasebenzi abasethimbeni layo abangaxoshwa bona, kanti babenze ubugwegwe obufananayo. Yakuchitha lokho iNkantolo yachaza ukuthi lombandela kawunikezi imvume yokuba kwephulwe imithetho neziyalelo; akufanele kucashwe ngalombandela. Ukuthi abanye kabaxoshwangwa akusho ukuthi akonanga lomqashwa oyinduna. Futhi yena wayeyinduna enomthwalo okhulu oqagulwe ngumthetho wezokuphepha okwendlula Iababanye ababeyithimba lakhe lomqashwa.
Lo mbandela womthetho othi abenze ubugwegwe obufanayo kumele bejeziswe ngokufananayo INkantolo Yezabasebenzi yakhipha isinqumo esicacisa konke ngawwo. Lelo yicala elanqunywa mhla zili-11 kuMandulo ngowezi-2018, uNombolo: JR958/16 le JDG Trading (Pty Ltd t/a Supply Chain Services v The Commission for Conciliation Mediation & Arbitration. INkantolo yachaza kabanzi imibandela okumele mayibhekwe uma kunephuzu lokuthi ukona okufananayo kufanele kujejiswe ngokufananayo. Okokuqala yathi leliphuzu kaliqedi futhi kalilawuli ukuthi ukuxoshwa kunobulungiswa yini noma qha, okuyikhona okubalulekile. Okwesibili ukuthi ubugwegwe okukhulunywa ngabo bunamthelela muni ebudlelwaneni bokwethembana komqashi nomqashwa. Okwesithathu ukuthi umqashwa unakho yini ukuzisola nokuxolisa ngezenzo zobugwegwe, okufane akutshengise kuqala nje ukubonakala lobobugwegwe. Okwesine ukubaluleka kombandela wokuqashwa owephuliwe kulobo bugwegwe uma kuqathaniswa nebhizinisi lomqashi. Okwesihlanu isikhundla somsebenzi womqashwa owenze ubugwegwe. Okokugcina yisimo sonke okwenziwe kuso ubugwegwe Kanye nezimo zonke zomqashwa ezixuba nesikhathi asesisebenzile nomlando wokuziphatha kwakhe emsebenzini