Amalungelo emindeni kusengabakhwekazi namanje
UKHETHO selufike lwedlula. Ludlula nezindodla zezethembiso ebezikade zenziwa ngamaqembu ezepolitiki ngenkathi ekhankasa. Kunomphako anikezwa wona amaqembu aya ePhalamende. Lo mphako umayelana nokuthi amaqembu aya ePhalamende alungise uMthethosisekelo wezwe laseNingizimu Afrika.
Isikhalo esikhulu ngenkathi kuyiwa okhethweni kwaba wukuthi uMthethosisekelo waseNingizimu Afrika awunawo amalungelo emindeni. Amalungelo akhona ngawezingane nabantu kodwa awemindeni do. Umphako anikezwe wona amaqembu aya ePhalamende owokuchibiyela uMthethosisekelo kufakwe amalungelo emindeni okungabakhwekazi njengamanje.
Osekuthanda ukuxaka-ke manje wukuthi ubani ozoqapha ngeso lokhozi ukuthi amaqembu asePhalamende ayawuchibiyela yini uMthethosisekelo. Okunzima kakhulu wukuthi akukho nezinkundla ezivulelekile okuthi uma amaqembu esesePhalamende bese ebizwa kuzoxoxwa nawo. Kuba lukhuni kakhulu ukuthinta abantu uthi ukhuluma nabo uma sebengaphakathi ePhalamende. Okunye okubuye kuhluphe
ngalaba abasePhalamende wukuthi bayakhohlwa uma sebesePhalamende. Akulula ukwazi isizathu sokukhohlwa kwabantu uma sebesePhalamende. Mhlawumbe njalo akukhona ukuthi bayakhohlwa. Cishe kuba kuningi kakhulu abakwenzayo nakho bese kuputshuka kusale okuqhamuka nabantu phaqa.
Ziningi izifundo ezifundwe kulolu khetho oselwedlule. Isifundo sokuqala esisifundile esengozi ebhekene nabomdabu abafundisa izingane zabo kulezi zikole ezixube izinhlanga. Iyesabeka imfundisoze egxishwa ezinganeni zomdabu kulezi zikole. Ngiyohlale ngiwancoma njalo amaBhunu uma kuziwa kokuphathelene nawo ngqo.
AmaBhunu ayalwa elwela ukuthi izingane zawo mazifunde ezikoleni lapho kufundwa khona ngesiBhunu nalapho kufundwa khona ubuBhunu bakubo. Asuke ebalekela izinto ezinjengalezi ezenzeka ezinganeni zabantu bomdabu. Imfundisoze egxishwa ezinganeni zaboHlanga kulezi zikole ezixube izinhlanga yenza ukuthi kusuke esinamathambo uma sekufike isikhathi sokuvota.
Njengoba kade kuvotwa nje izingane zomdabu bezehlukene iminxa emibili. Kukhona ezingazange zivote. Ubuthi uma uzibuza lezi ezingayanga ukuyovota ukuthi azivoti ngani zivele zikutshele insambatheka uqobo lwayo.
Eziningi zazo ubuzizwa zithi ngeke ziye ukuyovota ngoba kugcwele inkohlakalo kuleli zwe. Uma zikhuluma ngenkohlakalo zisho ziphimisa igama lesiNgisi zithi icorruption. Enye eneminyaka engamashumi amabili ngaze ngayibuza ukuthi iyithathapShi le nsambatheka ekhuluma ngayo. Yabamba yayeka yasiphula izidindi kuhle kwentombi seyehlulwe ngamazwi ensizwa lagcina liphumile iqiniso. Noma ingalibekanga ngembaba kodwa kwagcina kucacile ukuthi ukuphi umnyombo walokhu ekushoyo.
Njengoba ikhala ngenkohlakalo eyinqinda ukuthi iyovota le ngane, kwacaca ukuthi yilona vangeli abahlalelwa ngalo kulezi zikole. Kwadingeka ukuthi ngiyihlalele ngifundise ukuthi lisho ukuthini ilungelo layo lokuvota. Ngagcina sengiyibuza nokuthi njengoba ingavoti nje kuzoyiqeda yini inkohlakalo lokhu kungavoti kwayo.
Kwagcina kucacile ukuthi imfundisoze lena egcwele emakhanda ezingane eziningi zomdabu ezifunda ezikoleni ezixube izinhlanga. Omunye umunxa walezi zingane ezifunda kulezi zikole yilowo ongawafuni nokuwabona amaqembu aboHlanga. Lezi-ke zona ziyavota kodwa zivotela amaqembu abamhlophe. Okuseqinisweni linye iqembu labamhlophe ezilivotelayo. Ngeke uzitshele lutho lezi. Zikhuluma isiNgisi sodwa.bLesi simo sale minxa yezingane zomdabu ezifunda ezikoleni ezixube izinhlanga sibhebhethekisa okomlilo wothathe. Angiboni ukuthi usekhona ongakwazi ukusinqanda lesi simo. Okubuhlungu wukuthi oNtabakayikhonjwa laba ezabo izingane bayaziqhuba bayavota nazo kodwa lezi zomdabu zona azivoti. Esinye isifundo esitholakele kulolu khetho olwedlule wukuthi baningi abalubalubela ukuba ngoMongameli. Kuyaziwa ukuthi uMengameli wezwe uba munye kodwa kubonakale kungenjalo emva kokhetho. Kubonakale sekunabantu abashayela uMongameli umthetho bemtshela ukuthi ngobani okufamnle babe ngoNgqongqoshe. Ngiyakweshwama lokhu. Kuyaqala futhi asethembe ukuthi kuyagcina.
Kusale kancane ukuthi labo ngqeqe bavele banikeze uMongameli uhla lwabantu okumele babe ngoNgqongqoshe. Uma eke wabathambela laba bantu uMongameli kuyobe sebembambe ngamankwahla. Ngeke aphinde akwazi ukuthatha izinqumo ngokukhululeka. AmaZulu asuke esho into efana neyenziwa yilabo ngqeqe bosiyazi uma ethi ithi ingaba nkulu ingabe isazekeka.