UMkhrestu angawushaya indiva umthetho wePhalamende na
“AKUBE-yilowo nalowo azithobe phansi kwamandla ombuso, ngokuba akukho mandla ombuso angaveli kuNkulunkulu; lawa akhona amiswe nguNkulunkulu. Ngakho-ke omelana namandla ombuso umelana nesimiso sikaNkulunkulu; kepha abamelana nakho bayakwamukeliswa ukulahlwa.
Ngokuba ababusi abesabeki kwabenza okuhle kodwa kwabenza okubi. Kepha uyathanda yini ukungesabi amandla ombuso na? Yenza okuhle, uyakubongwa yiwo; ngokuba uyisikhonzi sikaNkulunkulu, kube kuhle kuwe. Kepha uma wenza okubi, yesaba ngokuba awuyiphatheli ize inkemba ngokuba uyisikhonzi sikaNkulunkulu, umphindiseli wokwehlisa ulaka kowenza okubi.
Ngalokho kuswelekile ukuwuthobela, kungabi kuphela ngenxa yolaka kodwa nangenxa kanembeza.
Ngokuba ngenxa yalokho nikhipha intela; ngokuba bayizikhonzi zikaNkulunkulu ezikhuthalela khona lokho. Nikani bonke okubafaneleyo; intela kofanele intela, inkokhiso kofanele inkokhiso, ukwesaba kofanele ukwesatshwa, udumo kofanele udumo.” KwabaseRoma 13:1-7.
Makhristu amahle, uMbhalo oNgcwele ucacile ukuthi yilowo nalowo muntu ufanele ukuzithoba phansi kombuso wezwe, ngoba “akukho-mandla ombuso angaveli kuNkulunkulu”.
Uzothi omunye: “Heyi mfundisi, iqembu elibusayo akulona iqembu lami. Ngokwezwi likaNkulunkulu, ngisafanele ukuthobela umbuso na?
Ngibe ngingavumelani nawo!” Impendulo yalo mbuzo ithi: Yebo, yize kunjalo ukuthi iqembu elibusayo akulona elakho ufanele ukuzithoba phansi kwamandla ombuso.
Kuyimfundiso yeBhayibheli lonke leyo. Sinabo ubufakazi ukuthi ngesikhathi uPawulu ebhala le ncwadi kwabaseRoma, kwabusa uKhesari owaba umhedeni, nowayengakholwa yiZwi likaNkulunkulu.
Kuchaza ukuthi yize umbusi ewumuntu ongakholwa yiZwi likaNkulunkulu, kufanele uzithobe phansi kwamandla ombuso. Nakwezinye izindawo eBhayibhelini sifunda okufanayo: “Thobelani izimiso zonke zabantu ngenxa yeNkosi, nokuba kuyinkosi njengokuba ingomkhulu, nokuba kungababusi njengokuba bethunywa yiyo, ukuze bajezise abenza okubi, babonge abenza okuhle, ngokuba injalo intando kaNkulunkulu ukuba ngokwenza okuhle nithulise ukungazi kwabantu abayiziwula njengabakhululekileyo, kodwa kungabi-njengabenza ukukhululeka kube yisigubuzelo sokubi kepha njengezinceku zikaNkulunkulu. Baziseni bonke, nithande abazalwane; mesabeni uNkulunkulu, niyazise inkosi.” I kaPetru 2:13-17.
Kusho ukuthi kucacile eBhayibhelini ukuthi uMkhrestu ufanele ukuthobela umbuso nemithetho yawo. emabandleni ethu, lapho singamalungu khona siyavuma okulandelayo mayelana nombuso: “Siyakholwa ukuthi uNkulunkulu wethu omuhle, ngenxa yokonakala kwesizukulwane sabantu, wamisa amakhosi, izikhulu nemibuso ngoba kuyintando yakhe ukuthi umhlaba ubuswe ngemithetho nemibuso, ukuze ukungazithibi kwabantu kunqandwe, konke kwenzeke phakathi kwabantu ngenhlalo enhle.
Ngenxa yale njongo wanika umbuso inkemba ukuphindisela kwabenza okubi, nokuvikela abakholekile (Rom. 13:1-4) Futhi isikhundla sawo akusiso nje esokunakekela nokwelusa phezu kokubusa kwabantu, kodwa futhi ukulondoloza inkonzo yebandla engcwele ukuthiya nokuchitha konke ukukhonza izithombe, inkonzo yamanga, nokubhubhisa umbuso womphikiKhrestu nokuqhubekisa umbuso kaJesu Khrestu, ukushumayelisa iZwi levangeli yonke indawo, ukuze uNkulunkulu ahlonishwe akhonzwe yilowo nalowo njengokuba eyala eZwini lakhe.
Futhi yilowo nalowo noma enasigaba siphi, enjani enasikhundla siphi, ufanele ukuzithoba phansi kwemibuso, ukuthela, ukuyihlonipha nokuyilalela kukho konke okungamelani neZwi likaNkulunkulu; ukuyikhulekela ukuze iNkosi iyihole kuzo zonke izindlela zayo, ukuze sihlale kahle nangokuthula ngokumesaba uNkulunkulu nangesizotha esipheleleyo (I Thim. 2)...” Kusho ukuthi, namabandla ethu ayafundisa ukuthi masilalele umbuso nemithetho yawo.
Uma ngabe umthetho oshaywa wumbuso umelana neZwi likaNkulunkulu kumelwe ukuthi enzenjani uMkhrestu na? NgokweZwi likaJehova uMkhrestu uyalelwa ukulalela umbuso, kodwa uma umbuso ulindele ngathi ukuze saphule umthetho kaNkulunkulu kumelwe ukuthi senzenjani na?
Siyavuma sithi: “Sifanele ukuzithoba phansi kwemibuso, ukuthela, ukuyihlonipha nokuyilalela kukho konke okungamelani neZwi likaNkulunkulu.”
Lokho kuchaza ukuthi uma kukhona umthetho oshaywayo omelene neZwi likaNkulunkulu, sifanele ukuwushaya indiva, singawugqizi qakala lowo mthetho. Bakwethu, mina nomkami sinabantwana abahlanu. Sinamantombazane amane, kukhona nendodana eyodwa.
Siyazithoba phambi kombuso weNingizimu Afrika, kodwa uma kuzoshaywa umthetho wokuthi masiyeke uswazi ekukhuliseni izingane zethu, sizimisele phambi kobuso bukaNkulunkulu ukuwushaya indiva lowo mthetho. Sicela ukuthi nisithandazele kuleso sinqumo esisithathile.
MaKhrestu, uJehova, uNkulunkulu oyedwa vo, Oziquntathu – uBaba, neNdodana, noMoya oNgcwele anibusise. Amen.