The Maputo Connection: Ukuziphatha kwababhaci eMozambique
Umbhali: NguNadja Manghezi
INCWADI esiyethulelwa yiJacana Publishers nebhalwe nguNadja Manghezi ingenye yalezo ezimbalwa kakhulu ezenza sikwazi ukulunguza ngalena kwemingcele yaleli lizwe ukuze sizibonele ngamehlo engqondo inhlalo yamalungu e-African National Congress ekuzidingiseleni kwawo emazweni angomakhelwane.
Kulokhu incwadi inamathele ezweni laseMozambique nalo elalinezingxaki zalo zangaphakathi kodwa lakwazi ukufukamela abantu ababethutheleka ngamakhulu ngamakhulu ngenhloso yokuzobhaca ngenxa yesihluku samabhunu ikakhulukazi emuva konyaka we-1976 wezibhelu ezaziphikisana nokuphoqelelwa kokufundiswa kwaboHlanga ngolimi lwesibhunu.
Incwadi ihlanganisa izibhelu zaseSoweto zangowe-1976 nokunqoba kweFrelimo eMozambique.
Isihloko sencwadi esithi: The Maputo Connection, sikhomba ukusebenzisana kwe-African National Congress neqembu leFrelimo (iqembu elalwela laletha inkululeko kubantu baseMozambique) ngaphakathi eMozambique.
Incwadi ibuyisa inkumbulo yomzabalazo we-ANC kubhekenwe nempi kahulumeni wobandlululo lwamabhunu.
Iminyaka incwadi eyakhelwe phezu kwayo isukela kowe1960 kuya kowe-1990 kanti icacisa ngokusobala ukuthi incwadi ilihamba lonke ibanga lomzabalazo wenkululeko yakuleli kusukela uqalwa umzabalazo wezikhali kuvalwa nezinhlangano ezifana ne-ANC nePan Africanist Congress (PAC) kuze kube kukhululwa uDkt uNelson Mandela ejele nezinhlangano zaphinde zavulwa umlomo kukhululeka elakuleli.
Incwadi kaManghezi ishaya ingwijikhwebu ngokudalula ukudayiswa komzabalazo we-ANC wuHulumeni waseMozambique ekhululekile ngokusayina kwakhe isivumelwano saseNkomati noHulumeni wamaBhunu. Incwadi ingena kakhulu naseRhodesia ingakakhululeki ibe yiZimbabwe uma ixoxa ngesiwombe esingabanga yimpumelelo samabutho oMkhonto Wesizwe esaziwa ngeWankie Campaign.
IMatola Raid yangowe-1981 lapho umbutho wamagumgedlela aseSouth Afrika wahlasela izinkambu ze-ANC ngaphakathi eMozambique kwafa amalungu oMkhonto Wesizwe ayishumi nanhlanu kuyaxoxwa ngayo encwadini.
Engikuthandile ngencwadi wukwethula kwayo abantu esibabone sebeqhamuka njengabaholi eNingizimu Afrika esikhululekile.
Incwadi iyasilunguzisa sikwazi ukubona izimilo zabo nendlela ababephila ngayo ngaphandle kwemingcele yaleli lizwe kungakaphushwa ukuthi izwe liyoke likhululeke.
Ubuthakathaka nobuqotho babaholi sibubona besesemazweni angaphandle bengakangeni ngaphakathi kwaleli.
Kuyamangalisa ukufunda ngezinkinga eziningi ababeqa umngcele bephumela ngaphandle ababehlangabezana nazo nendlela ababezixazulula ngayo.
Ngaphezulu kwalokhu incwadi iphinde isibonise impilo yansukuzonke yamalungu e-African National Congress ngaphakathi eMozambique singakasayinwa isivumelwano saseNkomati ngonyaka we-1984.
Lena yincwadi esikhiphela ingonyuluka yezigameko umbhali azibona ngamehlo ngesikhathi sokuqhubeka komzabalazo i-African National Congress isekubhaceni eMozambique.
Iyincwadi ebhalwe ngesineke kusuka kuqala umzabalazo wezikhali ize iyosithi chaphasha ngaphesheya sekutholakale inkululeko yakuleli. Kule ncwadi umbhali wenze lukhulu ukusihlanganisela umlando ebesingenakuzibhalela wona uma besingeyona ingxenye yomzabalazo emazweni angaphandle.
Umbhali uNadja Manghezi yena ukwaze ukuyixoxa kahle nangesineke indaba ngoba wafika eMozambique iFrelimo isanda kunqoba impi yenkululeko.
Yena nomyeni wakhe babesekela ngokwepolitiki iMozambique baba yingxenye yempilo yomzabalazo ye-ANC ekudingisweni.
Wayeyingxenye yoPhiko Lwabesifazane neQembu Lezamasiko futhi kunguye obhekene nokuthungathwa kwezindlu eziphephile okwakuzobhaca kuzo amalungu e-ANC. Akukhulumayo kungumyalezo owethembekile oqukethwe kule ncwadi.
Ukufunda kwami incwadi iMaputo Connection kungenze ngaziqonda kangcono nezinye esengake ngazifunda ezikhuluma ngempilo ye-ANC isekudingisweni.
Lapha ngikhuluma ngezincwadi ezifana naleyo ebhalwe nguRaymond Suttner esihloko sithi: ANC Underground nekaJames Ngculu esihloko sithi: The Honour to Serve. Zonke izincwadi eziyilolu hlobo zenza sibaqonde kangcono abasiholayo ngokusinikeza imuva labo besesemzabalazweni wezikhali izwe lingakakhululeki.
Incwadi kaManghezi iphinde yangenza ngaqonda kangcono izincwadi ezibhalwe ngesikhathi samanje ezifana naleyo esihloko sithi: The President Keepers ebhalwe yintatheli uJacques Pauw ngokuveza impilo yabaholi nokuziphatha kwabo besengaphandle kwezwe, Incwadi iMaputo Connection ishicilelwe ngabeJacana kanti iyatholakala ezitolo ezidayisa izincwadi ezweni lonke.