Owayengumlingisi usenguMengameli e-Ukraine
NJENGOBA emazweni amaningi emhlabeni kubanjwe ukhetho lukaMengameli kuqokwa izinhloko ezintsa zemibuso, uMengameli wase-Ukraine uMnu uVolodymyr Zelensky usayine umthetho wokuhlakaza iPhalamende wase ememezela ukuthi ukhetho olusha luzobanjwa zingama-21 kuNtulikazi.
Izizathu ezibekwe uVolodymyr ukuthi abantu base-Ukraine abasalethembi leli Phalamende ubona isidingo sokuba kukhethwe ubuholi obusha. Lo Mengameli ofungiswe kuleli sonto kulesi sikhundla wenze isimemezelo sokuhlakazwa kwePhalamende enkulumweni yakhe yokwamukela isikhundla.
Okumkhalisayo ukuthi amalungu amaningi ePhalamende anobuhlobo nowayenguMengameli wezwe wangaphambilini okwenza nokuthi angawathembi. Ekhuluma ngoLwesibili uthe unesibopho sokuhlakaza iPhalamende ngoba kusuka ngonyaka wezi-2016 akukaze kube khona ukuhlangana.
Noma eqhubekile nalesi sinqumo sakhe uZelensky, kodwa kube khona abashaya amakhala bephikisana nesinqumo sakhe. UNdunankulu noNgqongqoshe Wezangaphandle, bobabili abasondelene kakhulu nowayenguMengameli bamemezele ukuthi bayashiya
kuHulumeni njengophawu lokuhlonipha uZelensky.
Lo Mengameli oneminyaka engama-41 ngaphambi kokuba usopolitiki, wayengumdlali wengqayi. Uzokhunjulwa ngomdlalo owawukhonjiswa kuthelevishini edlala indawo kamengameli. Lo mdlalo wawubizwa nge, “Servant of the People.” Nakuba ebengenawo umlando wezepolitiki kodwa usebenzise ismo esikhona ezweni njengenkohlakalo okuthiwa inuka phu kuleli lizwe futhi sekuyiminyaka lempi inganqotshwa.
UZelensky unqobe ukhetho ngenyanga edlule ehlula imbangi yakhe enkulu uMnu uPetro Poroshenko ngesibalo esikhulu samavoti. UPoroshenko, wathatha umbuso esizwa ngamazwe aseMpumalanga eminyakeni emihlanu edlule.
Izwe lalibhekene nengcindezi ngaleso sikhathi kudlange nemibhikisho. Ngokombiko weUnited Nations sekufe abantu abazi-13 000 odlameni kuleli lizwe, kanti uPoroshenko kuthiwa ubehamba ngonyawo lonwabu ekulungiseni isimo ezweni. Kukhona abathi uZelenskiy akayiqondi ipolitiki nokwenza kwakhe kukhombisa ukuthi akakashintshi emsebenzini wakhe omdala wokuba ngusomahlaya. Uthi into ezoba seqhulwini ezinhlelweni zakhe ukuqeda impi yamavukelambuso ahambisana neRussia asempumalanga yeUkraine. Ngsikhathi semikhankas yakhe uzakhele ugazi kubantu ezibophezela ngokuthi uzolwa nenkohlakalo nezimpande zayo
Njengoba kushintshe ubuholi namaphoyisa aseqalile ukubonakala ezwelana nohulumeni. Kuleli sonto avimbe amalungu angama-180 kahulumeni abesebenzisana noMengameli omdala abezama ukuphuma ezweni kubona obekukhona noNdunankulu uVolodymyr Groysman uSomlomo u-Andriy Parubiy.
Izigidi zabantu baseUkraine zimamukele uZelenskiy ngoba ziyethemba ukuthi uzowamela amazwi akhe okulwa nenkohlakalo ezweni. Inhlolovo esanda kwenziwa yinhlangano iDemocratic Initiatives Foundation, iveze ukuthi abantu abangamaphesenti angama-91 bakuleli lizwe babona ukulwa nenkohlakalo kuyiyona ndlela engabuyisa isithunzi sezwe kuphinde kuboshwe nabathintekayo.