Uthinte isidleke seminyovu eNorth Korea egxibha uTrump
Sebeqalile ukumbeka amabala uBiden ofuna esobumengameli e-USA okwakamuva okokugxekwa ngabezindaba
UKUPHUMELA obala ngokuthi uzongenela umbango wesikhundla sikaMengameli wase-United States of America (USA) uma kuphela isikhathi sikaMengameli uDonald Trump sekwenze ukuthi uMnu uJoe Biden abhekwe ngisho nangendlela anyathela ngayo.
UBiden wayeyiPhini likaMengameli ngesikhathi sikaMnu uBarack Obama. Kukhona asebeqalie ukumbeka amabala ngokuthi angeke akwazi ukuphatha isikhundla ezikhulu kangaka njengoba umlando wakhe ekuziphatheni nakwabesifazane ungemuhle. Isizindalwebu esibizwa ngeKCNA saseNorth Korea sibhale ukuthi lo mholi muva nje wenze izinto eziwubudedengu futhi ezingenamqondo ngenxa yokuthi ufuna ukuphatha.
“Akukho nokuncane anakho okumbeka ezingeni lomholi, ingasaphathwa ke eyokuba usopolitiki,” kusho iheheba lo mbiko kulesi sizindalwebu. Uqhubeka umbiko ugxeka uBiden ngokuba nolimi oluqojemenokuhlambalaza uma ekhuluma ngabesifazane. Ngalokhu bebevusa isigameko esidala lapho kwaba nezonsolo zokuthi wachiliza kabuhlungu owesifazane wasebenzisa namagama alumelayo ngesikhathi ezama ukumthinta.
Umbiko uthi uzoba uMengameli onjani olalayo ePhalamende kukhulunywa ngesithombe sakhe esasabalala ezinkundleni zokuxhumana nabezindaba ngesikhathi ehuqa ubuthongo uMengameli u-Obama ethula inkulumo ngowezi-2011. Muva nje ubudlelwane phakathi komholi waseNorth Korea uKim Jong-un noMengameli uTrump buhle emuva kweminyaka la mazwe eyinkukhu nempaka.
Ukuhlangana kwalaba baholi emhlanganweni owawuyingqaphamlando eSingapore ngonyaka odlule. Baba ngoMengameli bokuqala abahola lawa mazwe abahlangana emuva kokujikijelana ngamazwi. Emuva komhlangano wabo basayina izivumelwano zokuzibophezela ekusebenzisaneni nasekuvuseleleni ubudlelwano babo. Okwakudala udungunyane phakathi kwalaba baholi udaba lokuhlolwa kwezikhali zenuzi. Isivumelwano abasisayina sasibophezela iNorth Korea ekusebenzeleni ukuqeda ukuhlola izikhali zenuzi.
Enye ingxenye yesivumelwano yayithi iWashington nePyongyang kumele basebenzisane kudalwe nokuthula ukuze kugwenywe ukungqubuzana kwangaphambili. Ukugxekwa kukaBiden kuyimizamo yokukhombisa ukuthi iNorth Korea yeseka uTrump njengoba engqungqutheleni abekhankaso kuyo uBiden eshiye angalazi ngoTrump. Ethula inkulumo ePhiladephia ngempelasonto edlule, uBiden wagxeka uTrump ngokusebenzisana nabantu ababiza ngabadayisi kubo ebala uMengameli waseRussia uVladimir] Putin naye uKim Jong-un”.
Ukuqina kobudlelwane phakathi kukaKim noTrump sekushintshe ngisho indlela abezindaba baseNorth Korea ababika ngayo ngoTrump.