Okwenzeka ezweni kukhombisa ukuthi akunamthetho
KUMBONO wephephandaba, Iphepha LaboHlanga kuMbasa wezi-2019, kuvela umuzwa wokunxenxa uHulumeni ukuthi asebenzise umthetho ukuvikela ingqalasizinda, nezakhiwo zokuhweba kanye neSintu sonkana ezweni.
Umbono nomuzwa ophusile kodwa ubuye ungikhumbuze isaga sesiNgisi esihumusheka kanje “Nero wadlala inkositini, iRoma ingqongqa”.
Ekungeneni kombuso lo esithi owentandoyeningi, amalungelo aba uchithi saka, kwase kuthi izakhamuzi zangabanazibophezelo. Lokhu kuholele ekutheni uMthetho wathuntubezeka kakhulu, waba umhlabelo kule nkululeko.
Sesiyilizwe elingenamthetho, lokhu kufakazelwa udlame ezikoleni, ukudlondlobala kwezidakamizwa esezibhuqabhuqe intsha njengoba iningi libonakala lingondingasithebeni ezitaladini zamadolobha, ukwebiwa kwemfuyo, ukubulawa kwabantu mihla namalanga njengoba nombiko wamaphoyiseni waveza.
Ukukhwabanisa komasipala, eminyangweni nasezikhungweni zikaHulumeni kuhlezi obala okwezinqe zesele. Umbiko kaMncwaningi mabhuku omkhulu kuHulumeni kaZwelonke waveza isithombe esibucayi ngamabhuku ezimali nokusebenza kwazo komasipala abaningi, akuthusanga ke ukuzwa umbiko othi uMsunduzi uyadunguzela (Bayede Vol 5 No. 13, 5/11 kuMbasa 2019). Kubi inkabi isiguqe nejoka, noma nini ingawa ngophondo.
Ngeshwa ke izinhlungu zokucindezelwa zavala labo ababengabaholi beNgabadi amehlo nengqondo, umthetho waba umhlabelo kule nkululeko yethu, kodwa lutho ukuzibophezela ezimisweni zokuphila ngenkambiso yoBuntu nobuqotho nokwazisa umthetho ezweni.
Asivumeni isimo esikuso namuhla siveza futhi siqhakambisa ubunjalo bethu ngokwezepolitiki, nangesimo somqondo nezinselelo noma iquga lodlame esadlula kulo, sangabe sesikhipha abantu iqunga.
Okulichilo elikhulu ke uMthethosisekelo lo esawethweswa kuhle kwezinkabi zifakawa ejokeni, awukaze ubasebenzele abeNgabadi kuleminyaka engamashumi amabili nanhlanu, ngaphandle kokufunzwa inkovu, ukunceliswa isithipha.
Ngesikhathi esifanayo, abawugwayi wokugxunyekwa badlondlobale ngokuphindaphindiwe kwezomnotho nakuwo wonke nje amazinga empilo. Lesisimo esibhekene nabeNgabadi sibucayi kabi, futhi sibeka lonke izwe engcupheni yokubheduka kodlame lwezomnotho olungashiya wonke umuntu ekhungathekile, uma izingqinamba ezibhene nabeNdabuko zingasukunyelwa futhi zimelwe ngokweqiniso.
Njengamanje asinamnotho osezandleni zabeNgabadi, ngaphandle kokuba izincelankobe komakhulubasi nosingabasi, okuyibona abalawula umnotho.
AbeNgabadi banesibophozelo sokwakha owabo umnotho, okuyisisekelo sawo umhlaba. Okwesibili, abeNgabadi emfundweni yamabanga aphansi naphezulu, kumele kuqikelelwe iningi lifunda amakhono, sayensi, ubuchwepheshe ezobunjiniyela nezolimo njengamalungiselelo okuzakhela imikhiqizo edingakalayo esiZweni.
Okwesithathu, ibhange laboHlanga liyadingeka, kade abeNdabuko bexetshulwa bengemkhoma amabhange amane abacindezeli kulelizwe, futhi basaqhubeka.
Ekugcineni owendabuko unesibophezelo sokugqabula amaketango engcindezelo amenza isinxibi nekhoboka eZweni lokhokho bakhe. Kukubo ke abeNgabadi ukuzikhulula, noma ukuzikhohlisa, ukuncela umbele ofile, ngesingankululeko siluthwa ngamaqola adl’izwe lethu ehlangane nabanye bethu abangamahlafun’egwavuma namagobamlomo, namakhoboka adla izimvuthu zomakhulubasi nosingabasi bawo. “Okwazibopha, kuyozikhulula”! Wena weNgabadi.