Usuku lwe-Afrika ngolomkhuleko nokubonga
KULE NYANGA kugujwa usuku lweAfrika, kanti abanye bethu bayiqonda kahle kamhlophe imibhalo eminingi yasemandulo iyakuveza ukuthi abantu bokuqala abafika e-USA; e-England; eBrazil; e-India; eChina; eRome; eJapan; e-Australia kwakungaboHlanga base-Afrika, njalo njalo.
Uma kuthiwa um-Afrika ungowokuqala ukufika endaweni kumbe ezweni kusho ubudala bakhe emhlabeni, njengabantu bokuqala abafika emhlabeni, kwase kulandela ezinye izizwe. Ngakho-ke ukugubha usuku lwe-Afrika kusho izinto eziningi kubantu abehlukene. Kwabanye bethu kusho inselelo, njalo nje, yokuba sijule ngengqondo ukuze sikwazi ukufinyelela ezingeni lokubeka i-Afrika ezingeni eliyifanele phakathi kwamazwe omhlaba.
Enye yezinselelo ukuthi leyo njula yolwazi esayishiyelwa ngokhokho bethu baseKhemethi siyibuyisela kithina, sibe ngabanikazi bayo. Uma ngenza isibonelo nje: ingcebo yolwazi esayishiyelwa umqambi wendlela uHermes Trismegistus siyibuyisela kanjani ukuthi kube ngeyethu, ngemva kokuba yantshontshwa ngabezizwe, bayenza kwaba ngeyabo?. Yiqiniso, ngaphandle uma kukhona umbono ohlukile, ukuthi i-Afrika liyizwekazi eselakhululeka ngokwezepolitiki, kodwa inkululeko yalo ayikakagcwali
ncimishi uma kusesekhona izinto eziningi esizenza ngoba seyame kwabe zizwe.
Ngiyakuvuma ukuthi i-Afrika ngeke yabuyela esimweni sokukhululeka gelekeqe ngenxa yokuthi yaba miningi kakhulu iminyaka yengcindezelo.
Uma ubheka ubudala nenjula yengcindezelo yezwekazi i-Afrika, kusukela kufika amaGriki, amaRoma kanye nama-Arabhu, eNtshonalanga ye-Afrika, kuze kuzofika abelungu ababephuma emazweni amaningi aseNtshonalanga, yisikhathi lesi eside kakhulu.
Uma ngenza nje isibonelo: iNingizimu ne-Afrika ikhululeke nje zolo lokhu; iNamibia ikhululeke zolo lokhu; iZimbabwe ikhululeke zolo lokhu, kanjalo kanjalo. Izwekazi i-Afrika lagcina ukuba yilo ngokuphelele ngezikhathi kubusa iziNgonyama zaseKhemethi; kusabusa iNkosi uKush; kusabusa iNkosi uHhamu, kuze kuyofika kuNowa.
Ngenkathi iNkosi uHermes ivalelisa emhlabeni, seyiqedile ukwakha indlu yayo yokugcina, ebizwa namhlanje ngokuthi ngamaPhiramidi aseGiza, laphaya eKhemethi, seyiphindela kwelabaphansi, kwelamathongo, yilapho-ke kwaqala khona ukungena kwamanzi ngomsele e-Afrika. Ukuhlupheka nokuhlukumezeka nokuphundleka kwe-Afrika kanye nabantu bayo, kwaqala lapho kuze kube yinamhlanje. Uma kukhona umuntu ongum-Afrika ocabanga ukuthi ukhululekile, kusadingeka ukuthi aphinde acabangisise, azibuze imibuzo eminingi, azibheke macala onke. Ngikusho lokhu ngoba ngazi kahle kamhlophe ukuthi inkululeko isho izinto eziningi kubantu abaningi abahlukeneyo
Ukugubha usuku lwe-Afrika kuyisinyathelo sokubonga uMvelinqangi ukuthi wakha lelizwekazi lase-Afrika kanye nabantu balo, okuyizwekazi eliyinzala-zizwe zonke zomhlaba. Sigubha lolu suku nje lweAfrika sibonga uMvelinqangi owaphefumulela kwaboHlanga base-Afrika isikompilo abaphila ngaphansi kwalo, okuyilo olubenza babe yilokhu abayikho. Sigubha lolu suku ngoba sikhumbula amadlozi amakhulu ase-Afrika anjenge’ Nkosi enkulu uHhamu, iNkosi enkulu uKush, iNkosi enkulu u-Osiris, iNkosi enkulu uHeru, iNkosi enkulu uDehuti, yiNkosi uKhufu. Singekhohlwe yiziNdlovukazi zonke zaseKhemethi.
Singekhohlwe yiziNgonyama zonke ezazingababusi bezwe laseKhemethi, singekhohlwe aMakhosi amakhulu afana neNkosi enkulu uMnguni lapho kuvela khona isizwe sabeNguni. Singekhohlwe amaKhosi amaningi akha izizwe nemibuso eyahlukene yase-Afrika, imibuso efana noNigeria, i-Ethiopia, iKhemethi, iNubia, iCongo, iZimbabwe, iKenya, iLiberia, iGhana, iKwaZulu, nezizwe zaboHlanga, njalo njalo.
Sigubha lolu suku ngoba yithi ma-Afrika esazi ngokokuqala ngqa emhlabeni ukuthi kukhona uMvelinqangi. Amazwe omhlaba afundiswa yithi ma-Afrika ngoMvelinqangi.
I-Afrika akusilona nje izwekazi laboHlanga base-Afrika, kodwa liyizwekazi lo sikompilo lamaAfrika. Liyizwekazi eladlwengulwa ngabelungu ngoba bephethwe umhobholo, liyizwekazi eliletha ithemba kumuntu woHlanga wase-Afrika, njengoba isho imbongi ngala mazwi alandelayo: I-Afrika iyisiqalo nesiphetho sami; Ngingaba yini ngaphandle kwakho Afrika; Uyithemba lami Afrika; Uyisibuko sami Afrika; Uyimpilo nomhlengi wami Afrika; Phambili Afrika; Ngiphe incombo ngiyopheka Afrika; Ukuze ngibhekane nesimo engikuso; Ngilekelele Afrika nangu uNgcindi engisonta intamo; Lekelela Afrika nangu uNgcindi engiphundla; Ngiphundlekile kwaze kwaphundleka ngisho ingqondo. Ngiphakamise Afrika; Ngenyuse ngiye emazulwini lapho oNgcindi bengeke bangifumana; Ngikhala kuwe Afrika ngoba wena unguBaba noMa. Lalela imikhuleko yami Afrika.
Njengoba ngishilo ngasenhla, njengoba nembongi ingivumela kule nkondlo, umAfrika usaphundlekile ngokomzimba, ngokwengqondo nangokomphefumulo. Ngakho-ke nxa sigubha lolu suku lwe-Afrika, asiqonde ukuthi asigubheli khona ukukhululeka, kodwa sibonga uMvelinqangi owasidala saba yilokhu esiyikho, nokuthandaza kuye ukuba asiphe inkululeko ephelele.