Iphupho likaZinhle kweyombhoxo
AKUSIYO into ejwayelekile ukuba isibhuda sizihlanganise nomdlalo wombhoxo. Ukuwubukela nje kukodwa kungamaqabuqabu, ayisaphathwa eyokuwudlala kodwa intokazi nyakwaNdawonde iyazifela ngawo. Kuthe uma iBAYEDE ifakana imilomo nayo yathi:”UNkulunkulu unokuthi akuvalele umnyango uzitshele ukuthi impilo yakho izoma kanti cha, ufuna ukubona ukuqina kwakho bese ekuvulela eminye nekuyiyo ezokulethela impumelelo.”
Okwenza uZinhle Ndawonde. asho la mazwi yingoba lo mdlalo ayikaze izicabange iwudlala kodwa muva nje igama layo ilona eligqamile kuwona.
Le ntokazi edabuka eChesterville kodwa yakhulela eNanda, uma ikhuluma ngokuqala kwayo ukudlala lo mdlalo ithi kuyihlaya kwazise yayingakaze iwucabange neze. “Lo mdlalo ngawuqala ngowezi-2006 ngifunda eParkhill Secondary School, inhloso yami ngangifuna ukudlala unobhutshuzwayo iwona engangiwazi kangcono. Kodwa kwathiwa awukho, kukhona umbhoxo ngabe sengithi angiwuzame kwabe sekuwukuqala kwami njalo. Angizisoli ngokuthi ngiqome ukudlala lo mdlalo, ngikhuluma nje sengihambe inqwaba yamazwe ngenxa yawo. Umuntu okunguyena engimbongayo ngakho konke uNkulunkulu, ngoba nguye
owangikhanyisela ukuthi ngiqome lo mdlalo,” kusho uZinhle.
Lo mdlali oneminyaka yobudala engama-30 oyibamba emumva enkundleni uthe lo mdlalo umsize ezintweni eziningi.
“Kujwayelekile ukuthi ingane ekhulele endaweni eyilokishi yenze izinto ezingalungile, kungekhona ngoba ikhule injalo kodwa ngenxa yokuthi lokho kukhohlakala kwenzeka phambi kwayo igcine isikwenza. Lo mdlalo iwona ongiqoqile kukhona konke okubhedayo, ngoba bengibuya esikoleni kumele ngijime bese ngenza izinto zasekhaya. Bengingenaso isikhathi sokwenza izinto ezenziwa yintsha. Okungijabulisayo sikhuliswe umama sibabili nodadewethu, abantu abaningi bebesibhekile ukuthi ingabe sophelelaphi ngenhlanhla ngaba yisibonelo esihle kudadewethu naye wafunda ukuba aziqoqe,” usho kanje uZinhle.
Unyaka okuyiwo aqala ukuthi azuze okuthize kulo mdlalo unyaka wezi-2008 nalapho aqokelwa eqenjini lesizwe labaneminyaka engama-20 wabe esesayiniswa yiqembu elikhulu lakulesi sifundazwe iSharks.
Izinto zakhe zibe sezithula kodwa eqhubeka edlala kumaSharks, nalapho ngonyaka wezi-2015 waqokwa njengokaputeni waleli qembu.
Ngonyaka wezi-2017 wabe eseba nenhlanhla ebizelwa eqenjini leSpringbok Sevens elalizoya kodlala eLondon.
Kuthe nyakenye izinto zenzeka engathi uyaphupha njengoba edlale imiqhudelwano emibili emikhulu. Leyo mqhudelwano iCommonwelath Games neRugby World Cup 7s.
Akagcinanga lapho udlale imiqhudelwano emibili yeHSBC World Rugby Series eHong Kong nase-Austraila. Uthe ebuya lapho esebizelwa eqenjini la badlali abali-15 iSpringbok Women’s 15 Tour, beyodlala eSpain, iseLondon, ise-Italy kanye naseWales.
Emasontweni amabili edlule ubeyingxenye yeqembu leSevens ebeliye eFrance emqhudelwaneni emibili.
“Ngicabanga umdlali obehambile waya eFrance ukhule kakhulu kulo mdlalo. Okwenza ngisho kanjalo sidlale imiqhudelwano emibili ngaphansi kwezinsuku ezinhlanu kodwa sakwazi ukuthi siyinqobe. Lokho kukhombisa ukukhula kweqembu ekutheni lingadla noma iliphi iqembu elingabhekana nalo,” kuchaza le ntokazi ethi umdlali ezifela ngaye uBrent Russell.
Le ntokazi imiqhudelwano eyibheke ngabovu i-Olympics ezoba ngonyaka ozayo eToyko, neNdebe YoMhlaba ezoba ngowezi-2021 eNew Zealand.
“Uma nginganqoba owodwa yale miqhudelwano ngosho ukuthi iphupho lami lifezekile. Kodwa engingajabula kakhulu uma nginganqoba iNdebe YoMhlaba,” kusho uZinhle.Uma engadlali umbhoxo usuke esebenza, uyiFire Fighter eKing Shaka Airport, uneqhuzu lemfundo kuSport Management.