Ilubalela iNFD iSummer Field Dynamos FC
ISEKELA mqeqeshi weSummer Field Dynamos okuyiqembu elizomela isifundazwe iKwaZuluNatal emdlalweni yokuhlungela ukungena kuNational First Division (NFD) ngesizini ezayo, uthi bayibheke ngabovu le midlalo yokuhlunga.
UMafa Zuma usho lokhu emveni kokuthi inhlangano ephethe ibhola kuleli iSouth Africa Football Associations (SAFA) iqhathe amaqembu ayisi-9 azoba kule midlalo. Kula maqembu kulindeleke amaqembu amabili okuyiwo azonyukela kuNFD.
Amaqembu adliwe izembe kuNFD kule sizini enamasonto amabili isongiwe iWitbank Spurs no-Ubuntu Cape Town.
“Ngesikhathi kuqala isizini sazitshela ukuthi silungiselela izinto ezimbili okuwukuthi sinqobe iligi kanye namaplayoff okungena kuNFD. Nebala iphupho lethu lokuqala lifezekile, manje siyongena emshikashikeni wokufeza elesibili okuwukuthi singene kuNFD. Abadlali esinabo siqale nabo isizini bonke bayazi yini esiyifisayo, yingakho ngingangabazi ukuthi iqembu esinalo liqine kakhulu, ngalokho ngesizini ezayo lingagijima kuligi engeyesibili kuleli,” kusho uMafa.
ISummer Field Dynamos iseqoqweni C, izovovana inkani neSteenberg United. Iqembu lesithathu lizophuma phakathi kweDondol All Stars neJDR Stars FC abasecaleni bobabili.
UMafa odabuka eChesterville ufike ngesizini yangowezi-2017/18 izinto zibheda kuleli qembu.
“Ngifika kuleli qembu belisendaweni ye-14 sekusele imidlalo embalwa isongwe isizini ngafika ngalikhuphula ngalibeka endaweni yesi-6 kulogi. Into eyangisiza ukufika kukaRonnie Gabriel okunguyena esabambisana naye mina ngabe sengiba isekela lakhe kwazise unesipiliyoni esingaphezulu kwesami. Sazitshela ukuthi isizini yangowezi-2018/19 iyona esizokwenza ezibukwayo ngayo,” kuchaza uMafa odume ngelikaWele.
Okwenza athi uGabriel unesipiliyoni yingoba uyena ngesizini yangowezi-2016/17 wanyusela Uthongathi FC kuNFD. Uyinyusa nje waqala ukuyiqeqesha idlala kuSAB League, waya nayo ku-ABC MOTSEPE League.
“Noma ngingeke ngikusho konke kodwa abadlali bayazazi zonke izinqinamba abazobhekana nazo lo mqeqeshi (uGabriel) abatshele ngazo. Sofuna ukuthi nakanjani sande isibalo samaqembu azodlala kuNFD aqhamuka kulesi sifundazwe. Sifuna nakanjani ukujabulisa isikhulu sethu esenze isiqiniseko ukuthi iqembu liba yimbumba isizini yonke,” kusonga uMafa.
Yize leli qembu liqhamuka esifundazweni iKwaZulu-Natal kodwa linabadlali abaqhamuka eKapa, iseMpumalanga, iseGauteng nakwezinye izindawo.
Abadlali okuyibo abayithemba baleli qembu ikhaya lalo eliseChatsworth, u-Ayanda Lubelo oyibamba esiswini wake wagijima kuBidvest Wits naku-University of Pretoria, uMndeni Zikalala naye odlala esiswini yena uke wadlalela iBaroka FC neReal Kings.
Omunye umdlali uLazola Kunene ubegijima eqenjini laseSwaziland iMbabane Swallows.
Nyakenye iqembu ebelimele lesi sifundazwe uMvoti FC kodwa izinto azihambanga kahle njengoba wahluleka ukungena kuNFD. Ezinye zezinto owazilimaza ukudlula emhlabeni kukaBheka Phakathi owayengumqeqeshi.
Umdlalo wokuqala uzoba mhla zinhlanu kuNhlangulana owesibili ube mhla ziyisi-6 le midlalo izobanjelwa e-Erka Park, eBellair.
Iqembu okungenzeka libe yingozi i-Arconbush United, nangesizini edlule ibiyingxenye yale midlalo kodwa yahluleka ukunqoba.