NGALO MYALEZO OYISILILO SISONGA IMIGUBHO NGEZWEKAZI
ABAKE balalele amahubo abalandeli bamaqembu ezepolitiki nginesiqiniseko sokuthi bake bayizwe impinda kula mahubo ethi “Angalila uma esibona sinjena”. Abaziyo bathi le mpinda bayihuba ngenhloso yokugcizelela ukuthi ziseningi izakhamuzi ikakhulukazi kwaboHlanga, ezisabhekene nobunzima bese liphinde libe yisikhumbuzo ngohambo olusasimele ukuze kuthiwe ngempela sesikhululeke ngokugcwele.
Kuye kuthi uma liculwa bese kubizwa amagama abaholi abehlukene bangaphambilini, ikakhulukazi labo abadume ngokuthi yibo abalwela inkululeko. Ake sisebenzise le mpinda ukuphawula ngokuthile esikubonayo ngezwekazi, kanye nokwenzekayo, okusenza sithi kukhona abangasekho ‘abangalila’ uma bebona okuthile okusenzeka nokungenzeki ezwenikazi labo.
OMengameli bamazwe ase-Afrika basekwa kufanele ngesinqumo abasithatha sokusungula umhlahlandlela
abawubiza nge Agenda 2063: The Africa We Want. Lo mhlahlandlela uqukethe izifungo, nezintshisekelo zabo zakho konke abathi bazokwenza ukuze kuthi mhla kufika owezi-2063 amazwe ehlukene nezwekazi lonkana libe selinokuthula, intuthuko, nobunye.
Ngamanye amazwi, lona bathi umhlahlandlela ozosetshenziselwa ukuthi izwekazi lizithole lisesimweni esihlelekile kunaleso elikuso namhlanje. Kepha abaholi, amaqhawe namaqhawekazi asemandulo ‘angalila’ uma ewuhlolisisa lo mhlahlandlela. ‘Bangalila’ ngoba i-Agenda 2063 ibala zonke izinhlaka okumele zibambe iqhaza ekwakheni izwekazi elehlukile, kepha ushiye ngaphandle aMakhosi noBukhosi bomdabu.
AMakhosi uNgungunyane, uMoshoeshoe, uSekhukhune kanye neSilo uCetshwayo abagcizelela emabuthweni abo ukuthi ayikho into ebaluleke ukwedlula ukulwela umhlaba noyifa kithina, ‘bangalila’ uma bebona ukuthi izindlu zoBukhosi ngokwehlukana kwazo ezisamile namuhla azibalwa kule Agenda.
Singeke sisasiphatha ‘isililo’ seziNdlovukazi ezinjengoAnna Nzinga waseBukhosini baseNdongo naseMatamba, uNgqumbazi wakulo leli likaMthaniya, noZewditu waseEthiopia, ngezindlela ezahlukene abakwazi ukuhaqa izihlalo zoBukhosi.
Lawa Makhosi nezizwe ababezivikela, ‘bangakulilela’ ngoba akuzwakali ukuthi kungani oMengameli bengasibonanga isidingo sokubalula iqhaza elingabanjwa izindlu zobuKhosi ngokwehlukana kwazo ekwakheni le-Afrika abathi bafisa ukuthi sonke siyibone ngowezi-2063.
Lapho elele khona uThomas Isidore Noël Sankara ‘angalila’ uma ebona kusalokhu kuqhubekile ukudicilelwa phansi kwamalungelo abesifazane, nokudlanga kokunukubezwa kwabo ngezikhathi zezimpi. Nguye phela owathi kuyobe ayikaphothulwa eyenkululeko uma abesifazane bengakakhululeki.
Angaphinde ‘alile’ uma ebona intsha kumazwe anjengo Central African Republic (CAR), i-Ningizimu Africa, iZimbabwe, iLiberia idwanguza emadolobheni ala mazwe ize ibalwe njengengxenye enkulu yalabo abaswele imisebenzi. ‘Wolila’ ajike azibuze ukuthi, labantu abasha abadabuka kumazwe anemihlabathi enothe ngendlela eyisimanga bahlulwa yini ukuyihlakula? Noma kungabe abazi ngendlela ayiqamba yokuthi intsha yiyo okumele ibambe iqhaza ekuletheni impucuko ezindaweni ezisamakhaya?
UMwalimu Nyerere ‘angalila’ uma engabona ukuthi kusekhona amazwe e-Afrika asalokhu ashaya indesheni kwawasenyakatho ngoba encenge imalimboleko eqhamuka kulawo mazwe. uMwalimu emveni kokwehla esikhundleni sokuba Mengameli eTanzania wahola inhlangano ebizwa ngeSouth Centre eyagadla kwezwakala ngemibhalo yayo eyayiqukethe iziphakamiso ezibukhali ngokungenziwa ngabaholi baseAfrika ukuze bazikhulule ejokeni lokukweleta amazwe asenyakatho.
UGamer Nasser wase-Egypt, ‘angalila’ uma ebona ukuthi izithukuthuku zemizamo yokwakha imbumbe phakathi kwesifunda se-Africa eseNyakatho nezwekazi lonkana ifiphaliswa ngababuya kulesifunda abangayigqizi qakala eyalobudlewano. Kunalokho, babonakala bebeka amathemba abo emazweni aphesheya.
USolwazi uCheik Anta Diop owayedabuka eSenegal ‘angalila’ uma ebona ukuthi kunamazwe e-Afrika asaqhubeka nokugqamisa ukuthi ayengamaKoloni eFrance (Francophone) noma e-England (Anglophone) okuyisihlava esilwa nemizamo yokwakha izwekazi elibumbene.
‘Angakhala’ ezimathonsi uma ephinde ebona ukuthi yiTanzania kuphela esabonakala ikwazi ukuqinisa ukusetshenziswa kolimi lomdabu eminyangweni kaHulumeni nakwezokuxhumana kunokuba kuncikwe kwezidabuka kwamanye amazwe.
Kepha ‘lesi sililo’ asisho ukuthi akunazinhlelo ezihamba kahle ezwenikazi. Kunalokho, siyisikhumbuzo, ikakhulukazi njengoba kuphothulwa imigubho yenyanga uMbasa, sokubaluleka kokungakhohlwa ibanga okusamele lihanjwe ukuze kufezeke izifiso zesizukulwane esikhona.
Isiyohlangana kuMbasa wezi-2020, nalapho kunethemba lokuthi imigubho yoSuku Lwe-Afrika izobe ihlanganisa nokuphela kwezimpi ezwenikazi. Lesi ngesinye sezethembiso zoMengameli abazenza mhla begubha iminyaka engama-50 kwasungulwa i-Organisation of African Unity (OAU).