Sebezilahle kuNdunankulu omusha kwaNodunga
EMUVA kwesikhathi kunezikhalo ngodaba loBukhosi esizweni sakwaNodunga eNumber 1, eMvoti lapho kusolwa khona uMnyango Wezokubusa Ngokubambisana Nezindaba Zomdabu nezinye izinhlaka ezengamele uBukhosi KwaZulu-Natal, ababhekele lesi sizwe sebephinde babhalela uNdunankulu omusha uMnu uSihle Zikalala, uMphathiswa woMnyango kanye neNhloko yawo ngenhloso yokuthi baphinde babheke ukuthi kubambephi.
Izolo ababhekelele lesi sizwe egameni likaMnu uBongumusa Zulu badlulisele incwadi kwiziphathimandla eMgungundlovu lapho benxusa khona ukuthi lolu daba lubhekisiswe. Ekuqaleni kwencwadi kubhalwe kanje,” NgoZibandlela zili-17 ngowezi-2016 isizwe sehlelwa ishwa lokwedlula emhlabeni kweNkosi yaso uQedisono Zulu. Kuthe sekwedlule isikhathi sokuzila, iNdlunkulu nomndeni bahlangana zili-17 kuNcwaba wezi-2017, badumba uMntwana weNkosi uNkanyiso Zulu ukuthi kube nguyena ozothatha isihlalo sobukhosi, futhi lokho kwabe kuyizifiso zikayise.
Ngasekugcineni kwencwadi umndeni uthi abaNtwana baluleka uMnu uMpungose ukuthi akasheshise enze okufanele nokudingekayo ukuze kubekwe iNkosi kodwa kuze kube yimanje akukenzeki lokho,” IBAYEDE isike yabika phambilini ngalolu daba lapho yatshelwa khona ngabomndeni ukuthi kwakuyizifiso zeNkosi uQedisono Zulu ukuthi uBukhosi buthathwe indodana yayo uMntwana uNkanyiso, owaze wakugcizelela nalokho encwadini ayibhala ngezinsuku zakhe zokugcina esibhedlela iKing Dinizulu kuMnu uZulu owayesondelene kakhulu naye.
UMnu uZulu nguye osebhalele uNdunankulu uZikalala incwadi futhi wayihambisa ngesandla emahhovisi aseMgungundlovu izolo. Leli phephandaba lisenayo nencwadi endala eyabhalwa iNkosi uQedisono isadla anhlamvana lapho ibalisa ngenye yamadodana ayo ibeka nezizathu zokuthi kungani ifuna iSihlalo sithathwe uMntwana uNkanyiso ichitha uMntwana uMlungisi. Lolu daba seluke lahlalelwa ngisho nasesigodlweni eLinduzulu zingama-28 kuLwezi wezi-2018 kukhona osebenzela uMnyango Wezokubusa Ngokubabisana Nezindaba Zomdabu uMnu uMpungose, umndeni wakwaNodunga kanye nabaNtwana baseNdlunulu nayilapho kwaphethwa khona ngokuthi uMntwana uNkanyiso ozothatha ozothatha iSihlalo soBukhosi.
Obambe isihlalo njengamanje uMphamandla Zulu owabekwa ngowezi-2006 emuva kokuba iNkosi yalahlwa icala lokubulala ngowezi-2004 eyaligweba iminyaka eli-18, kodwa yadedelwa ngoshwele ngowezi-2010 ngenxa yokuziphatha kahle ejele.
INkosi uZulu izamile ukubuyela esikhundleni ngowezi-2012 emuva kokudedelwa ngesikhathi sekuphela isikhathi seBambabukhosi lokho ikwenza ngokuhlanganyela noMnyango Wezokubusa Ngokubambisana Nezindaba Zomdabu nomndeni.
Nalo iBambabukhosi labhala incwadi livuma ukuba umfowabo abuyiselwe eSihlalweni emuva kokukhululwa ejele, kepha kwagcina ngokuthi kungabi khona izinyathelo ezithathwayo neNkosi yahlatshwa ukugula okwagcina ngokuthi kuyenele ngowezi-2016 ngaphambi kokuthi udaba lwayo luphothulwe njengeziphakamiso zomndeni ngokubambisana noMnyango nalo iBambabukhosi. Kukhona nencwadi eyabhalwa iBambabukhosi ngowezi-2014 liyibhekise kobephethe uMnyango Wezokubusa Ngokubambisana Nezindaba Zomdabu KwaZuluNatal uNkk uNomusa MaDube Ncube linxusa ukuba umfowabo abuyiselwe eSihlalweni. Amalungu omndeni nababesondelene neNkosi uQedisono bathi kuyabaxaka uma iBambabukhosi selingasafuni ukudedela iSihlalo siye kwabafanele ngoba nesikhathi sokubamba kwaso kudala saphela.
Emuva kwesikhathi eside uMnyango ungaphumeli obala ngokusayinisa uMntwana uNkanyiso ukuze athathe iSihlalo kube nokudideka emndenini nezinsolo zokuthi uMnyango uthatha izinhlangothi.
Ekhuluma naleli phephandaba phambilini uMntwana uNkanyiso wathi usezame izikhathi eziningi ukuxhumana noMpungose ebuza ukuthi udaba seluhambe lwafikaphi ngoba ebona isikhathi sihamba, kodwa uMpungose abike imbiba abike ibuzi. IBAYEDE yazibonela imiqhafazo ephakathi kwabo lapho uMntwana uNkanyiso ecela ukuba amchazele ngokuthi kubambephi ngaseMnyangweni.
Waveza nokuthi lolu daba selwehlukanise isizwe phakathi ngoba naso sifuna ukwazi ukuthi ubani iNkosi futhi nezinduna ziyalwazi. “Abanye abaNtwana nomndeni sebaze badikila ngenxa yokuthalalisa koMnyango. Okuningi esizweni akukho, ayikho inkantolo yeNkosi, ihholo lomphakathi alikho ngisho nezinye izigodi azivuseleliwe,” kubeka uMntwana uNkanyiso.
Wabuye wakhala kakhulu nangoSihlalo womndeni uMntwana uThabani Zulu ngakubiza ngokuxova umndeni njengoba kunguye onokuxhumana okukhulu neBambabukhosi. Waveza nokuthi ngendlela lo mbango oshube ngayo waze wahlaselwa ngamadoda ayelinganiselwa kwawayisishiyagalolunye zingama-24 kuMandulo ngowezi-2017 eThethe elokishini. “Ngatshelwa ukuthi kunamadoda ayengifuna, nalapho ngasizwa ukuthi ngifonelwe ngababengixwayisa ngokuthi ngingabe ngiseza. Ngathi uma ngifika endlini yami ngathola kupeqululwe yonke into kucaca ukuthi kukhona imininingwane ibifunwa emayelana neSihlalo soBukhosi. Udaba ngalubika ngisho nasemaphoyiseni.”
UNdlunkulu uGugu Mkhize ongudadewabo weNkosi uQedisono encwadini efungelwe ayisayinile iBAYEDE enayo ikhophi yayo uthi: “Emuva kokubona isikhathi sihamba nokuthi sibona sengathi uBukhosi buthanda ukuphuma endlini efanele ukuphatha sibe sesibhunga saqoka ukuthi uMntwana uNkanyiso Zulu kube nguye othatha izintambo zoBukhosi bakwaNodunga Number 1. Lokhu kuyisicelo sethu singuNdlunkulu ukuba iminyango efanele isilekelele ukuba uMntwana abekwe esikhundleni ngendlela enesizotha nobulungiswa.”
Abanye abaNtwana nomndeni sebaze badikila ngenxa yokuthalalisa koMnyango. Okuningi esizweni akukho, ayikho inkantolo yeNkosi, ihholo lomphakathi alikho ngisho nezinye izigodi azivuseleliwe