Bamfanise nomafavuke njengedangabane
Abantu basincomile isinyathelo sikaRamaphosa sokumfaka emnyangweni nodume ngenkohlakalo yamathenda
UZAKHELE igama ngokuma kuze kube sekugcineni kulokho akholelwa kukho, ukulwa nenkohlakalo nokuba ngowesifazane onesibindi ongasabi ukuthatha isinqumo noma ngabe isimo sinjani.
Ngesikhathi uMengameli wezwe uMnu uCyril Ramaphosa ememezela ikhabhinethi yakhe ngoLwesithathu kusihlwa, akekho obecabanga ukuthi igama likaNkk uPatricia De Lille lingase libe khona ohlwini obelubhekwe ngabomvu. Kwabaningi obekubhekwe kuMengameli ukuthi uzobafaka yini ongqongqoshe bangaphambilini okwatholakala ukuthi banogcobho njengoNkk uBathabile Dlamini.
Ngesikhathi ememezela igama lika De Lille njengozophatha uMnyango Wezemisebenzi Yomphakathi Nengqalasizinda kushintshe izinto eziningi kwaba yilona daba olubeyindaba egudwini. Amalungu eqembu lakhe lakudala alilaxaze ngemizuzu yokugcina sekuzoyiwa okhethweni iDemocratic Alliance wasungula iGOOD Party awazikholwanga lezi zindaba. Ephawula umholi weDA uMnu uMmusi Maimane uthe akukho okubethusile ngokuqokwa kuka De Lille ngoba ubevele emdibi munye noKhongolose futhi nguye obewusiza nasemikhankasweni yakhe yokhetho.
UDe Lille waziwa njengomafavuke njengedangabane kwezepolitiki. Ngonyaka odlule wakhishwa inyumbazane iqembu lakhe limsola ngenkohlakalo. Noma esethathelwa izinyathelo
zokuqondiswa ubugwegwe nokusatshiswa ngokukhonjwa indlela esikhundleni sokuba iMeya yaseKapa akazange aphele amandla kodwa walwa kwaze kwaba sekugcineni nobuholi obuphezulu beqembu. Udaba waze waludlulisela enkantolo lapho afike anqoba khona. Kuyona yonke impumelelo nomzabalazo kwezepolitiki akazishayi isifuba kodwa uthi uyisisebenzi somphakathi.
“Izwe lethu lisesimweni esingesihle, kodwa maningi amathuba akhona okuthi uMnyango engiwuholayo uguqule izinto ukuze kukwazi ukuthi kukhule umnotho wezwe,” kusho uDe Lille. Ngisho neqembu elibusayo likwamukele ukuqokwa kwakhe. Khonamanjalo uHulumeni Wesifundazwe waseWestern Cape uthi ukuqokwa kukaDe Lille njengoNgqongqoshe kufana nesibusiso kuwo ngoba bazokwazi ukuthola umhlaba omningi. IDA eWestern
Cape ithi ukuqokwa kwakhe kuzoyihlomulisa.
Kusuka emenyezelwe kulesi sikhundla, ezinkundleni zokuxhumana igama lakhe beliphezulu kukhona abambiza ngesikhokho. Abanye bancome uRamaphosa ngokumqokela kulo mnyango odume ngenkohlakalo yamathenda, bethi uzokwazi ukulwa nenkohlakalo ngoba unomlando walokho.