URadebe ubonge uRamaphosa eshiywa kuKhabhinethi
UNGQONGQOSHE osebenze nabo bonke oMengameli bakuleli kusukela izwe lathola inkululeko ngowe-1994 uMnu uJeff Radebe uthi nakuba uMengameli uRamaphosa engambuyiselanga kwikhabhinethi yakhe kodwa uzoqhubeka ngokusebenza ngokuzikhandla kuleli zwekazi.
URadebe usebenze noMengameli uNelson Mandela, uMengameli uThabo Mbeki, uMengameli uJacob Zuma, uMengameli uKgalema Motlanthe noMengameli uRamaphosa kwaze kwaba isikhatho sokhetho ngasekuqaleni kwenyanga.
Izolo ukhiphe isitatimende ebonga ukwesekwa akutholile yonke le minyaka.
Uphathe iminyango eyisikhombisa ehlukene kusukela koWemisebenzi Yomphakathi, Owamabhizinisi kaHulumeni, Owezokuthutha, Owezobulungiswa Nokuthuthukiswa Komthethosisekelo, iHhovisi likaMengameli oWezamandla agcine kuwo ngaphansi kukaRamaphosa. “Ngiyaziqhenya ngolwazi engilutholile njengesisebenzi somphakathi nomnikelo engiwenzile kule minyaka ngisebenza kuhulumeni. Nginqamule zonke izinkalo zakuleli lizwe ngisezigabeni ezehlukene kuhulumeni ngabamba nezikhundla ezihlukene kwezepolitiki,” kusho uRadebe.
Uthe ipolitiki nokuphathwa kukahulumeni kusemithanjeni yegazi kuye njengoba ehlale iminyaka engama-25 ekuhulumeni engakwazi ukuhlala nezingane zakhe, nabathandiweyo bakhe, ngenxa yokuxinwa umsebenzi nokuzibophezela ezweni.
Eqhuba uthe ufisa ukubonga eMengameli uRamaphosa ngokumethemba ngokuthi amnike umsebenzi wokuba uNgqongqoshe Wezamandla.
Ubuye wabonga nabantu baseNingizimu Afrika abahlala bekhumbuza uHulumeni nsukuzonke ngokubaluleka kwenkululeko abayithola. Abanye ongqongqoshe abadala abangabuyanga uDkt uSiyabonga Cwele, uMnu uGugile Nkwinti, uMnu uDerrick Hanekom, uMnu uRob Davies.