Uguquko lokuqala olunqala lwezimboni
KUBALULEKILE ukuthi njengesizwe noma umuntu ngamunye abuke izinguquko ezenzekayo emhlabeni, ikakhulukazi emkhakheni womnotho, bese ezibuza ukuthi uphila kumiphi iminyaka. Phela kungenzeka ukuthi abanye bethu baphila eminyakeni engaphezu kwamakhulu amabili edlule, uma beqhathaniswa namazwe athile abalwa njengathuthukile. Kumele lokho kumkhathaze uHulumeni neziphathimandla zezwe, bese zenza imizamo yokuletha ulwazi oluzonikeza uholo olubheke phambili kumuntu nomuntu.
Uma kuthuthuka abambalwa, noma abebala elithile kuphela, noma abobulili obuthile bodwa, kuchaza ukuchema komkhankaso. Uma sibuka isithombe seNingizimu Afrika kuvele kucace bha ukuthi yiluphi uHlanga olusalele ngemuva. Umbuzo omkhulu ngothi, kuzokwenziwa njani ngalolo hlanga. Omunye umbuzo ngothi, lona lolo hlanga olusalele ngemuva luyazibona yini ukuthi lusalele ngemuva. Owesithathu ngothi, lolu hlanga luzimisele kangakanani ukuthuthuka lulingane nezinga eliphezulu elibekwe ngumhlaba. Le mibuzo ingabuzwa nangobulili.
Lokhu kumele sikubuke uma siqhathwa namanye amazwe abalwa njengasethuthukile ukuthi senza kanjani emidlalweni ethile. Kumele bese siyakuguqula lokho sibuke ukuthi simi kuphi uma siqhathaniswa namazwe ngokwezimboni. Mingaki imikhiqizo evela kuleli lizwe lethu edingwa ngamanye amazwe. Kanti futhi mingakanani imikhiqizo thina esiyilanda kwamanye amazwe, esingeke siphile kalula ngaphandle kwayo.
Ngelinye ilanga ngisesitolo ngangibuka ezinye izimpahla zokuhlanza amanzi. Omunye wezinsizwa ezaziseduze wangibuza ukuthi lamapayipi ngawokwenzani. Ngingakamphenduli waqhubeka wathi yena usemdala akasazimisele ukufunda lutho olusha. Wathi wenele ngolwazi
analo, akasazimisele ukufunda into angayifundanga esemncane. Wayezincokolela nje, ngoba phela ulwazi kwesinye isikhathi luyazingenela engqondweni. Ulwazi olusaluguquko luletha lolo hlobo lwenselelo kumuntu. Omunye ulwamukela ngezimhlophe izandla afunde indlela entsha yokuphila, kanti omunye uvele avale ingqondo ingamukeli lutho olusha.
Kuyingozi kumuntu nje ukuphila aze afike ezingeni lokungemukeli lutho olusha, afune kuphela ukwamukela lokho akwaziyo nakujwajwele. Angisayiphathi-ke eyobunzima obukhona uma lowo muntu engumholi. Ugcina engasafuni ukuboniswa.
Kungenzeka baningi abazibuzayo ukuthi, “Kazi babala besukela kuphi laba abakhuluma ngoguquko lwesine lwezimboni?” Phela ngisho ngoba empilweni kubalwa ngisho iminyaka. Uma sibala iminyaka sisuka emva kokufa kukaJesu wamaKhristu. Wonke umhlaba ubala iminyaka yempilo kusukela lapho. Namuhla nje sesikunyaka wezinkulungwane ezimbili neshumi nesishiyagalolunye afa wavuka uJesu Khrestu. Wonke amazwe asebenzisa lolu hlelo lokubala iminyaka. Manje-ke sekukhulunywa ngoguquko lwesine lwezimboni. Zehlukaniswa kanjani izikhathi zokuguquka kwezimboni?
Ngenkathi kuqala umhlaba yayingekho imishini le eseyikhona namuhla. Kwakuphoqelekile ukuba abantu baphile ngalokho okukhona. Babesebenzisa izinyawo ukuhamba, noma ngabe lide kangakanani ibanga; kwakugxotshwa noma kugaywe etsheni ukuze kudliwe noma kwakhiwa imithi ethile. Nomyalezo owawungenakudluliseka ngokukhuluma bukhoma wawudluliswa ngokumemeza; ungaboni namuhla sewuhamba ngohlelo oluwunyazi lokuhambisa umyalezo.
Omunye angayichaza impilo yomnotho ngokuthi kunabathile abahlale becabanga ukuthi yini abangase bayethule emphakathini, kusetshenziswe yona kuyekwe lena eseyijwayelekile. Empilweni nje, kunabantu abahlale bezikhathaza ngokubuka okukhona, bacabange ukuthi kungenziwa kanjani kube ngcono. Ngikhumbula iminyaka eyadlula sibhala ngokuchofoza umshini kubizwa ngokuthayipha. Kwakubukeka kahle ephepheni, futhi kwakumbeka ezingeni elihloniphekile umuntu othayiphayo, ngoba wayengabhali ngesandla. Kwaze kwaba nezindawo ezifundisa abantu ukuthayipha bakhokhe imali yokufunda.
Emva kweminyakana kwavela ikhompiyutha ibhala buthule, futhi ikunika nethuba lokulungisa amaphutha ngaphandle kokuhlikiza. Namuhla umuntu usebhala kumakhalekhukhwini aqede indaba ayithumele lapho efuna iye khona. Kwadingeka ukuthi labo abebefundisa ukuthayipha bajike bafundise ukusebenzisa ikhompiyutha, ngale kwalokho babezophelelwa wumsebenzi.
Kusobala ukuthi umhlaba awumile ndawonye, kodwa uyaguquguquka. Lokhu kuphoqa nezinguquko endleleni abantu abaphila ngayo. Kunezinkulumo ezijwayelekile kulezi zinsuku mayelana noguquko lwesine lwezimboni. Omunye uzobuza ukuthi kuze kube ngeyesine nje yamenyezelwa nini eyokuqala kuya kweyesithathu. Phela akusikho nje ukumemezela, kodwa wukukhumbuza abantu ukuba babheke futhi bacabange ngendlela entsha ukwenza lokho abakwenzayo.
Eminyakeni ye-1800, singakabikho sonke esiphila namuhla, muntu-thize wakha umshini ozokwenza umsebenzi obewenziwa wumuntu ngezandla zakhe. Lokhu kwaqala eYurophu, koBrithani. Isibonelo wukuthunga, kwaba nomshini wokuthunga oqhutshwa wumuntu. Lesi sikhathi saletha olukhulu uguquko ekusebenzeni kwezimboni. Kwayinyakazisa ingqondo nenhlalakahle yabantu, ikakhulukazi labo ababesebenza. Lokhu kuthathwa njengoguquko lokuqala oluthinta izimboni. Phela izimboni yiwona mgogodla womnotho ngoba yilapho kukhiqizwa khona.
Uma ngithi yaqala e-Europe kuhle kucace ukuthi nathi boHlanga sasiphila lapha e-Afrika kungekho nguquko etheni. Kwikhulunyaka leshumi nesishiyagalombili lwaqala uguquko e-Europe kwakhiwa imishini ezimbonini ezithile. Lokhu kwaqeda umsebenzi kwabanye, kwadingeka bafunde ukusebenzisa imishini uma befuna ukugcina imisebenzi yabo. Kwaqala ukusebenzisa istimu namanzi ukwenza izinto ezithile, njengokuhambisa abantu nezimpahla emanzini. Uma umhlabathi omi kuwo unyakaza awukwazi ukunganyakazi. Thina sesinyakaze kangakanani kusukela lapho?