UManuel ujabule ngesinqumo ecaleni le-EFF
Inkantolo inqumele ugwayi katiki leli qembu ukuba lihoxise zonke izitatimende elazenza ngalo mholi
EMUVA kokujabulela ukunqoba ukhetho lwakamuva elenze iqembu landa eZishayamthetho, i-Economic Freedom Fighters (EFF) ihlangabezane nembibizane ngesikhathi iNkantolo eNkulu iSouth Gauteng inxusa ukuthi ixolise kowayenguNgqongqoshe Wezezimali uMnu uTrevor Manuel iphinde imhlawule imali eyizi-R500 000 wamademeshe ngokumehlisa isithunzi. Inkantolo ithole ukuthi leli qembu lamehlisa isithunzi uManuel ngokukhuluma kwalo. Ukushuba kwesimo phakathi kukaManuel ne-Economic Freedom Fighters kulandela isitatimende esenziwa omunye wabaholi bayo uDkt uMbuyiseni Ndlozi, lapho asola khona uManuel ngokungena ngengalo nesiphanga ohlelweni lokuqashwa kukaMnu u-Edward Kieswetter esikhundleni sokuba uKhomishana omusha wakwaSars. Babemsola ngokuthi wakwenza lokhu ngoba uKieswetter ehlobene naye. I-EFF yaveza ukuthi izokwenza konke okusemandleni ukuguqula isinqumo sokuqashwa kukaKieswetter ngoba ikholwa ukuthi wangena esikhundleni ngokwenzelelwa ekubeni singamfanele.
Emuva kokuzwa lezi zindaba uManuel wakuchitha konke okwakushiwo ngaye nezinsolo ezazibekwa.
Waphendula kanje, “Konke abakushoyo akubambeki futhi akunasisekelo, ngizonikela enkantolo ngisebenzise umthetho ukuze bakuhoxise konke okungelona iqiniso abakushoyo ngami,” kusho uManuel. Kuze kufika kulesi sigaba nje, ngawo uNdasa uManuel wamxwayisa uDkt uNdlozi ngokuthi uma engawahoxisi amagama akhe uzozithola esenkingeni ngoba udaba uzolufaka enkantolo.
“Angikwazi ukuthi ngingahlohlolozwa ojahidada abahlala njalo befuna ukuba ngozwilakhe,” kusho uManuel ngoNdasa ngesikhathi udaba lusavela okokuqala.
Nakuba benawo wonke amalungelo okubeka uvo
lwabo ngokwenzeka kwaSars nokuqashwa kukaKhomishana wakhona, kodwa abanalo ilungelo lokungibeka amabala nokwenza izitatimende ezinokucwasa ngokwebala. Nginesiqiniseko sokuthi abanye abantu abakhona esitatimendeni sabo, nabo abathi benzelelwa beqashwa bayakwazi ukuziphendulela. Mina angeke ngisatshiswe ngozwilakhe abafuna ukusho noma yini ngegama lami,” wacashunwa ekhuluma kanje uManuel.
Ngesikhathi efaka icala enkantolo uManuel wayefuna ukuba izinkulumo ze-EFF ngaye zithathwe njengezihlambalazayo futhi ezimehlisa nesithunzi.
Okunye ayekufuna ukuba i-EFF izibophezele ukuthi izozisusa izitatimende ezimthukayo ezinkundleni zayo zokuxhumana iphinde inqunyelwe ugwayi katiki wokuthi ithathelwe izinyathelo ezinqala uma iphinda yenza iphutha elifanayo
UManuel wayengusihlalo wethimba elaliphonsa ngemibuzo ababefake izicelo zokuphatha kwaSars. Ngesikhathi sekuyithuba likaKieswetter lokuphonswa imibuzo wacela ukuhoxa ngoba ethi banobuhlobo. Encwadini yommeli kaManuel eyathunyelelwa i-EFF zimbili kuMbasa nonyaka, ummeli uDario Milo wayefuna ukuba leli qembu lipheze ukwenza izitatimende ezingelona iqiniso nezehlisa isithunzi uManuel kuzona zonke izinkundla zalo zokuxhumana nakwabezindaba futhi likwenze lokhu ngaphandle kwemibandela.
I-EFF yathi azilime ziyetsheni yingakho udaba uManuel alufaka enkantolo. Kwenye incwadi ummeli wayethi, “amalungu e-EFF uDkt uMbuyiseni Ndlozi noMnu uJulius Malema bangabantu abaziwayo emphakathini futhi nezinto abazishoyo abantu bayazithatha bazikholwe, yingakho izitatimende ezenziwa ngoManuel zinobungozi”.
Ngakolunye uhlangothi uManuel wathi okwenza lezi zitatimende zisabalale kakhulu ukuthi basebenzisa inkundla yokuxhumana iTwitter lapho i-EFF inabalandeli abangama-725. 000. Uthi lezi zitatimende zabuye zadluliswa futhi ngabantu abangama-237. Ephendula uMalema uthe uManuel akahambe ashone, abamsabi.
Uthe i-EFF ithi ifuna ukwazi ukuthi kungani acela ukuphuma uma sekuphonswa ngemibuzo uKieswetter. Izolo uManuel ujabulise okwengane emuva kwesinqumo senkantolo. Uthe angeke nanini leli qembu lamabharethi abomvu lavunyelwa ukwenza noma yikanjani nokuba ngozwilakhe.
“Ngiyajabula ukuthi iJaji libonile ukuthi i-EFF yayinephutha. Ngijabula nokuthi isinqumo senkantolo sikhomba nokuthi akumele bavunyelwe ukuqhubeka nokuziphatha ngale ndlela.”