Kukhona okuthile esingakwenza ukwelekelela uHulumeni
IFUNGISIWE iKhabinethi ezosebenza ngokubambisana noMengameli Wezwe uMnu uCyril Matamela Ramaphosa. Kuhle sikuncome ukwenzeka kwezinto ngokushesha ukuze ukusebenza kwezwe kubuyele endleleni eyejwayelekile. Kunethemba lokuthi ongqongqoshe nabaphathiswa ezifundazweni bazosheshe balijwayele ijoka kungabi nabuhixihixi ekusebenzeni ngokubambisana ukuze kuthuthuke izwe kusimame nomnotho.
Kukho konke okukhulunyiwe kwethulwa abazobamba izintambo kuhulumeni kukhona inkulumo ethande ukusalela ngemuva. Abaphathiswe izikhundla bachazelwe ngendlela esobala ukuthi kulindelekeni kubo. Baphinde babekelwa nemiklamo okumele bayikhathule bachazelwa nangokubaluleka kokugwema inkohlakalo. Abangachazelwanga lutho ngeqhaza labo ekwelekeleleni abaphathiswa, ongqongqoshe neHhovisi likaMengameli yithina luquqaba olusemazingeni okuye kuthiwe ngaphansi.
Leli phephandaba libona ukuthi nathi bantu abaholwayo asimsulwa ezinkingeni uHulumeni azithola ebhekene nazo. Inkohlakalo ebikwa emiNyangweni kaHulumeni ayizenzekelanga kodwa njengemiphakathi sineqhaza esilibambile sigwazela izikhulu zikaHulumeni singcebeleka nazo kudliwa izimali zabakhokhintela. Uma singakwenzanga lokho sinecala lokuthi inkohlakalo ebiyenzeka phambi kwethu asizibikelanga iziphathimandla zomthetho ngenxa yokwesabela izimpilo zethu kodwa izwe saliyeka lisha.
Uma kuzoba nomehluko ekusebenzeni kwalo hulumeni ekade simvotela kuzodingeka siguqule indlela esenza ngayo izinto. Sinomsebenzi wokubika ngokwebiwa kwempahla kahulumeni ezikhungweni esisebenza kuzo. Sinomthwalo wokubambisana namaphoyisa ekulwisaneni nobugebengu obenzeka phambi kwamehlo ethu kodwa sesabe ukubika ngabo. Sineqhaza esingalibamba ekulwisaneni nokwebiwa nokulinyazwa kwengqalasizinda ngabantu asebabizwa ngamaphara abaziphulela umthetho ngonoqhakala izwe liphenduke kwamachanca kwampunzidlemini. Amakhoshi ezitimela ashiswa isidanasi ngabantu obabonayo ukuthi bayizithunywa zabathile abanezinhloso zabo kungumsebenzi wethu ukuwavikela ngokubika esikwaziyo kwabomthetho.
Ngaphezulu kwalokhu kuzodingeka sizifundise ukuzakha nokuzenzela. UHulumeni ngeke samthwalisa yonke into nalokho ngokwesiko nomlando okwakuyizinto okumele sizenzele zona singabantu. UHulumeni wethembisile ukulungisa ngokushesha udaba lokubuyiswa komhlaba. Indoda nendoda ayizimisele ukwakhela izingane zayo uphahla. Akube ngabakhubazeke ngempela abadinga ukwelekelelwa nguHulumeni. Imiphakathi yasezindaweni zakoEastern Cape ikhombisile ukuthi ukumema ilima kusasebenza namanje. Abantu besifazane bahlangene bazakhela imizi ngaphandle kosizo lukaHulumeni. Lesi yisibonelo esihle kithina sonke.