IKhomishini Yobuqotho ye-ANC iyinkantolo yehlathi
LEX1LI kube yisonto lezigigaba kwipolitiki yakuleli. Kusuka ezifundazweni lapho labo abaqokwe njengoNdunankulu bebememezela amathimba abazosebenza nawo. Okuqaphelekile kuzo zonke izifundazwe kakhulu lezo eziholwa yi-African National Congress (ANC) wukwanda kwesibalo sabesifazane kanye nentsha. Lokhu kulekelelwe nayisinqumo salenhlangano sokuthi lapho uNdunankulu kungowesilisa uSomlomo kuzoba ngowesifazane. Esinye isigigaba esenzekile kube yisekisi eliyiKhomishini Yobuqotho ye-ANC eholwa nguMnu uGeorge Mashamba.
Le Khomishini iphenduke ihlaya nondabamlonyeni kwabanye ngendlela esebenze ngayo udaba oluthinta uMnu uDavid Mabuza kanye nabanye abaholi be-ANC. Esikhathini esedlule leKhomishini inike ikhadi elibovu abaholi ethe benze izinto ezifaka le Nhlangano ehlazweni. Okumangazayo ngalolu daba wukuthi leKhomishini kubukeka ikhiphe isinqumo noma iziphakamiso ingabanikanga abathintekayo ithuba lokuziphendulelala . Lokhu kufakazelwe wukuthi uma uMabuza ehoxisa ukufungiswa kwakhe wabe esecela ithuba lokuyobeka uhlangothi lwakhe. Uma lokhu kuyiqiniso umbuzo uthi bekukhona yini ubulungiswa kwase kuqaleni ukuthi iKhomushini ibe nombono ngomuntu kepha ingakaze imlalele?
Cishe iKhomishini kaZondo ebheke izinsolo zokugwamandwa kombuso iyisibonelo sekhomishini eqikelela ukuthi ubulungiswa buyenzeka ngoba ngeke nje umuntu athi uzibanibani wenze okuthile bese kuthathwa lokho njengeqiniso, umsolwa lapha uyanikwa ithuba lokubeka uhlangothi lakhe aze anikwe nethuba lokuphoa umbuzo loyo omnukayo. Lapha kwekaMashamba asizwa kuthiwa othe uMabuza noma uMnu uZizi Kodwa benze okuthile uyaphoswa ngemibuzo.
Okunye okumangazile wukuthi leKhomishini kaMashamba iphenduke ichibi noma ichopho lokulungisa abathile. Njengoba uMabuza, uMantashe, uMakwetla bebuyisiwe emuva kokusolwa yile Khomishini kusho ukuthi yona futhi esikhathini nje esiyizinsuku ezimbili isikwaze ukubahlanza bangaba nachashaza baba mhophe njengeqhwa. Uma kunje ubani ongaphika uma kukhona umuzwa wokuthi iKhomishini laMashamba isetshenziswe ukuhlamba ‘izono’ zabathile ukuze bakwazi ukucosha izikhundla kuKhabhinethi likaRamaphosa?
Ongathi le Khomishini iyinkantolo yehlathi!