Inkulumo yokugcwaneka kaHelen Zille iyinselelo
KUSAXAKA ukuthi kudamane kuvela aboHlanga abathi umlando awubalulekile. Zonke izifundo zibalulekile. Kusukela emfundweni esemazingeni aphansi kuze kufike emanyuvesi kusemqoka ukwazi ukuthi into ethile yazuzwa ngubani, ngamuphi unyaka.
Kusengumlando ukukhuluma nokuhlaziya igama, unyaka, usuku, isikhathi nenyanga.
Angiqondile lapha ukubalula ngomlando kodwa bengixukuzisa ugebhezi lwaboHlanga ngoba phambilini ngake ngahlakula ngomlando. Engiqondene nakho manje njengeningi laboHlanga ezweni ilokhu kugcwaneka kanye nokugibela phezu kwendlu okwenziwe uNkk uHelen Zille obenguNdunankulu waseWestern Cape. Ukungazigqaji kwaboHlanga ngomlando wezwe labo, kwenze ukuba uNkk uZille aqhamuke nenkulumo ethi; Black Priviledge’ ezinkundleni zokuxhumana.
Akulona iphutha ukuceba kodwa-ke yena ukusho lokhu ngoba sekwaba nezicebi zaboHlanga ngokuphazima kweso kuHulumeni wedemokhrasi. Waze waphonselwa inselelo ngowayenguMvikeli
WoMphakathi u-Adv uThuli Mandonsela nabanye ukuba ahoxise amagama akhe. Wenqaba.
Uma ufundisisa le nkulumo kaHelen ubheka nasemlandweni uzothola ukuthi kuliqiniso esingeke salibalekela e-Afrika, eNingizimu Afrika nakweleNdlovukazi uMthaniya. Sekukaningi ngibalula ukuthi kuhle ukufunda. Izinto engizozibalula futhi ngezansi zimbalwa. Eqinisweni lonke uHelen uqhoshela abantu boHlanga abasePhalamende ukuthi baqhosha ngeziqu zemfundo ezaqhamuka ngomqondo wamaKoloni bebe bona aboHlanga bengakabi nemfundo asebeyisungulile neyehlukile kweyamaKoloni kanye namaBhunu. Buka nje ngoba abanye baBahlonishwa abasePhalamende baze bakhulume, babange umsindo bethi ngeke bona bazifundisa izingane ezikoleni zikaHulumeni. Izikole akhuluma ngazo ziwumqondo wamaKoloni namaBhunu.
Uxakeke ukuthi kwayena uMhlonishwa akaziboni ukuthi usePhalamende elakhiwa yiwo amaKoloni. Kwayena ugqoke amajazi eziqu, kuthiwe bafundile nokuyimfundo ewumqondo wamaKoloni. UHelen uhleka ngasese, bese ebadelela ngoba uyazi ukuthi kwale mfundo engaka abanayo aboHlanga abakakaziqambeli izinto okungezabo.
UHelen usakhuluma engihlale ngikubhala ukuthi njengoba abantu bengakaziqambeli noma bengakazisunguleli izinto ngokwabo, abelungu bayohlala beyicokofula i-Afrika. UHelen uyazi ukuthi aboHlanga bakhonze ukuthenga baqhoshelane ngezinto abangaziqambanga bona. Izinto ezinjena engihlale ngibalisa ngazo. UHelen ngeke awachukuluze amaJaphani kanye namaShayina ngoba anezinto aziqambela wona emhlabeni.
Abantu abakhumbule umlando ukuthi kwenzekani eNingizimu Afrika ngowe-1978. Ilapho nami bengizomvumela UNkk uHelen Zille ukube usikhumbuzile wangafihla mayelana nodaba ababe lubhale ngesihloko ngowe-1978 ekhasini lokuqala esasithi; Crisis in South Africa kwelinye lamaphephandaba esiNgisi ayeyilisebenzela eseyintatheli. Babebhale ngesingakubiza manje ngokuthi iWhite Priviledge ngenkathi abelungu bebamba uHulumeni ngobhongwane, ayazi amaBhunu ePhalamende ukuthi kwebiwa imali ngenkathi lisaholwa uBalthazar Johannes “B. J.” Vorster.
Kwaqhamuka i’Black Economic Empowerment, iBEE yamaBhunu’ engizothi kwakuyiWhite Ecomonic Empowerment, (WEE) yangowe-1978 nangaphambili.
Kwavela uMnu uLouis Luyt iBhunu elaliyiscebi kanti futhi wake wasungula elinye lamaphephandaba lesiNgisi okwakuthiwa iThe Citizen ngemali yabakhokhi bentela eyayiphuma ePhalamende. Ngiyakhumbula ukuthi uLuyt wake waba neLouis Luyt Breweries eyayiseNew Germamy ngasePinetown ngonyaka we-1973.
Akhona namanye amaBhunu aphenduka izinkinsela ngokukhulu ukushesha. Abanye boNgqongqoshe bamaBhunu bangena ePhalamende langowe-1994 likaHulumeni wedemokhrasi.
UNgqongqoshe ababayisisulu ngowe-1978 kwakunguDkt. uPetrus Cornelius ‘Connie’ Mulder woMnyango Wezokwazisa, noNobhala wawo uDkt. u-Eschel Rhoodie ababecasha ngezinhlelo ababethi bayazenza ukuze kuphume imali eningi. Enye imali yagcina yehle ngemilenze emadodeni ayesePhalamende futhi kuyavela ukuthi kwakufihlwe imali eSwiss Bank.
Babekhipha amarisithi ukuyokhipha imali esikhwameni esiyingodlamali kaHulumeni (State Treasury). Bethi imali yoMnyango Wezokuvikela owawuholwa uPieter Willem Botha. UBotha wayethi kwakuntshontshwa imali kaHulumeni egameni loMnyango wakhe Wezokuvikela Nokuphepha unganikwa lutho.
Waliqhumisa ithumba uPW Botha ukuthi kade yayintshontshwa imali ePhalamende kusukela ngo-1961 kuya kowe-1978. Phambilini ngabhala ukuthi ngeValue Added Tax, iVAT ukuthi yaqala ngowe-1991, okwakuqale kuyiGeneral Sales Tax, iGST yangowe-1978 ngenxa yokuntshontshwa kwemali.
UBotha esenguNdunankulu wasungula iKhomishini kaMehluleli uR P Botha Erasmus ngowe-1978 ukuphenya ngokubanjwa ngobhongwane kukaHulumeni.
Nakhu manje sineKhomishini kaMehluleli uRaymond Mnyamezeli Mlungisi “Ray” Zondo eyasungulwa uMengameli uCyril Ramaphosa ephenya ngokubanjwa ngobhongwane kwezinhlaka zikaHulumeni. Kuvelile ukuthi ukweba ePhalamende kwaqala ngowezi-2000 ekubeni iKhomishini yaqala ukulalela izethulo nobufakazi kusukela mhlazingama-20 kuNcwaba ngowezi-2018.