Yazi kabanzi ngeGarnishee Order nemibandela
BANINGI abantu abazithola sebengene shi ezikweletini ngokubanjelwa imali emsebenzini bekhokha izikweletu abasuke bezenzile. Enye indlela yokuqoqa izikweletu kulabo bantu abasebenzayo abasuke sebehluleka ukumelana nazo ukusebenzisa iGarnishee Order. Engosini yanamuhla sibheka ukuthi isebenza kanjani iGarnishee Order nokuthi amandla okusebenza kwayo ahamba agcinephi.
Uma unesikweletu enkampanini ebhaliswe ngokusemthethweni eNingizimu Afrika, leyo nkampani noma umuntu osuke umkweleta imali angakwazi ukuya eNkantolo yeMantshi ukuze akwazi ukuthola iGarnishee Order. Eminye imibandela yeGarnishee Order ukuthi kubanjwe imali emholweni walowo osuke ekweleta ukuze kukhokhelwe leso sikweletu noma isondlo sengane.
Inkantolo eqondene nezondlo zezingane ingakwazi ukusebenzisa amandla ayo ukuxhumana ngqo nenkampani ukuze kubanjwe imali kulowo msebenzi. Ngaphambi kokubanjwa kwemali kumele kube nokuxhumana phakathi komsebenzi nenkantolo kuvunyelwane ngemali ezobanjwa. Esikhathini esiningi kuyaye kubhekwe ukuthi umsebenzi uhola malini, kubhekwe nezinye izindleko zakhe zanyanga zonke. Kuba yisimo esinzima uma umsebenzi esecabanga ngezindleko ezihambisana nokubanjelwa imali zinyanga zonke. Nakuba kunjalo nayo igarnishee order inemibandela ethile evikela umsebenzi obanjewa imali ukuze angathathelwa wonke umholo wakhe, kodwa akwazi ukuqhubeka nokuphila.
Okusemqoka ngeGarnishee
Order
Lo myalelo wokubanjelwa imali kusetshenziswa iGarnishee Order kumele ukhishwe yiMantshi ngalapho lowo obhekene nesikweletu esebenzela khona noma ehlala khona futhi umuntu uyanxuswa ukuba avele enkantolo. Ukwenza isibonelo nje, uma obhekene nezikweletu esebenzela eThekwini kumele kube yiNkantolo yeMantshi ekuleli dolobha ekhipha lo myalelo. Onesikweletu uyanxuswa ukuba avele enkantolo. Isizathu salokho ukuba anikwe ithuba lokuchaza ngesimo sakhe sezimali nokuveza ukuthi izikweletu abhekene nazo zisemthethweni yini.
Okungaphezu kwalokhu ukukunika ithuba lokuba utshele inkantolo ukuthi yimalini ongakwazi ukuyikhokha emholweni wakho ukuze kugcine kuphele isikweletu. Ngesikhathi esedlule abanezikweletu babengavikelekile futhi behlukumezeka ngoba kwakulula ukuthi izinkampani ezikweletwayo noma umuntu okweletwayo athole kalula iGarnishee Order. Kokunye kwakwenzeka nokuthi isicelo seGarnishee Order sifakwe enkantolo eqhelelene nendawo okweletayo asebenza kuyo noma ahlala kuyo, okuyisimo esasifaka ingcindezi yokuba angene kwezinye izindleko eya enkantolo ekude. Ngaleso sikhathi abakweletayo babenamathuba amancane okubeka uhlangothi lwabo, ngoba kwakwenzeka bagcine bengakwazanga nokuya enkantolo.
Esikhathini samanje konke lokho akusavumelekile. Uma inkantolo ikude nalapho uhlala khona okanye usebenza khona angeke ikwazi ukukhishwa iGarnishee Order. Kumele waziswe nangosuku lwenkantolo nokuthi ulindeleke ukuthi uvele nini kuyo. Phambilini kwakuba omabhalane benkantolo abakhipha imiyalelo ngokuvela komuntu okweletayo phambi kwayo, kodwa manje umthetho usugaya ngomunye umhlathi njengoba sekuyiziMantshi kuphela ezivumelekile ukuthi zingakhipha amaGarnishee Order.
IGarnishee Order akumele idlule ngaphezulu kwamaphesenti angama-25 omholo wakho, futhi kumele ikushiye nemali elingene ukuthi ungakwazi ukuziphilisa ngayo inyanga yonke. Kungenzeka ukuthi usuke wezwa ngezigameko lapho iGarnishee Order yayiyalela ukuba kuxetshulwe imali enkulu emholweni, umuntu agcine engasenalutho.
Uthini umthetho Ngonyaka odlule kwaphasiswa umthetho oqinisekisa ukuthi isimo esinjena asenzeki. Njengoba sichazile umthetho uthi kumele kuthathwe ingxenye yomholo wakhe engevile kumaphesenti angama-25. Leyo ngxenye yomholo ihlanganisa nalowo okusuke kungabanjwa lutho kuwo, kodwa awuyifaki imihlomulo njengomhlomulo wendlu, ukusebenza isikhathi esingaphezulu, neminye ehlukahlukene kuye ngokuthi ukuyiphi inkampani. IGarnishee Order ayikwazi ukukushiya ungenalutho emholweni wakho, uma ingaphezulu kwamaphesenti angama-25 noma usudonsa kanzima ungasakwazi ukuphila ngomholo osala nawo emuva kokubanjelwa imali, ungakwazi ukuxhumana neNkantolo yeMantshi okuyiyo eyikhiphile ukuze iyishintshe. Lapho udinga ukuthi ube nemininingwane yomholo wakho nezindleko zakhona, ungakwazi ukuthola imininingwane yenkantolo kuyona igarnishee order. Zikhona izindleko ongazikhokha, kodwa uma sezihlangene angeke zibe ngaphezulu kwesikweletu. Zikhona futhi izindleko ezihambisana nomthetho noma ikhomishini etholwa ngoqoqa isikweletu, kodwa nalapho futhi angeke zibe ngaphezulu kwesikweletu. Ukwenza isibonelo, uma ukweleta imali eyizi-R3000, izindleko ziyizi-R4000, imali ongahlawuliswa yona iyizi-R3000 kuphela. Uma ushiya lapho usebenza khona usuqala emsebenzini omusha kumele wazise inkantolo bese kukhishwa enye igarnishee order kumqashi omusha. IGarnishee Order isuke isasebenza uma usaqashiwe, entsha ingakhishwa uma ushintsha umqashi.
Okubalulekile ukuthi amaGarnishee Order asetshenziswa izinkampani ezisuke zikweletwa futhi ziba yisinyathelo sokugcina ekuqoqeni izikweletu. Kubalulekile futhi ukubheka isitatimende sakho ukuze wazi ukuthi imali ibanjwa nini nokuthi isikweletu siphela nini.