Imibandela nezibopho zomthetho wezobulungiswa
KUYAKHATHAZA ukubona ukuthi kusekukhulu ukungabi nalwazi nokunganaki ngezibopho nemibandela yomthetho okuhlose ubulungiswa nokuqeda ubandlululo emsebenzini. Kushaqisa kakhulu ukubona izenzo nezehlo eziphambana nalo mthetho kanye noMthethosisekelo imbala. Yingakho sibone kufanele ukuba silobe sikhumbuzane ngalesi sihloko.
Masiqonde ukuthi uMthethosisekelo iSahluko Sesibili unikeza amalungelo oluntu ayisisekelo kuwona wonke umuntu. ESigabeni 9 uMthethosisekelo ulawula ukuthi akunamuntu onelungelo lokubandlulula omunye umuntu ngokungenabulungiswa ngezizathu ezibaliwe noma ezingabaliwe. Noma ngabe lokho kubandlulula kusobala noma kugubezelekile, akuvumelekile ngaphansi koMthethosisekelo. oqhubeka uthi uHulumeni kumele makashaye imithetho evimbela zonke izigaba zobandlululo. Omunye wale mithetho ngovimbela ubandlululo ebudlelwaneni bokuqhashwa okuthiwa Umthetho Wezobulungiswa Kwezokuqhashwa onguNombolo 55 we-1998. Yiwo lo Mthetho esizoqxila kuwona kule mibhalo emayelana nobandlululo lwasemsebenzini. Ikhona eminye imithetho eqondene nalo ubandlululo kweminye imikhakha yempilo okuyilena: uMthetho Oqguqguzela Ubunye Nokuvimbela Ubandlululo Olungenabulungiswa (Promotion of Prevention of Unfair Discrimination Act); uMthetho Wodlame Lwasemakhaya (Domestic Violence Act)
Kunemibandela emine enqala ebekelwe bonke abaqashi abaqaguliwe ukuba mabayihloniphe benze okufunwa ngumthetho. Okokuqala ukuthi mabaxoxisane nabasebenzi nezinyunyana zabo mayelana nocwaningo lobulungiswa emsebenzini, nokwakha uhlelo lokwenzelela kunye nokwenza imibiko efuneka minyaka yonke edingwa nguMnyango Wezabasebenzi mayelana nohlelo lokwenzelela.
Okwesibili ukwenza ucwaningo lokuqagula ubandlululo nemigoqo evimbela ubulungiswa nokuthuthuka emsebenzini kwabasebenzi abaqaguliwe. Okwesithathu ukwakha ngokubambisana nabasebenzi nezinyonyana, uhlelo lokwenzelela abasebenzi abaqaguliwe. Okwesine ukubhala imibiko yaminyaka yonke ebhekiswe kuMqondisi Jikelele wezoMnyango Wezabasebenzi echaza ngenqubekela phambili minyaka yonke ohlelweni lwesenzelelo sezobulungiswa kubasebenzi abaqaguliwe.
Abaqashi abaqaguliwe yilabo abaqhashe abasebenzi abangaphezulu kwamashumi amahlanu sebebonke noma labo abaqashe abangaphansi kwamashumi amahlanu kodwa amabhizinisi abo angenisa ngonyaka imali engaphezulu kwaleyo enqunyiwe ngokwezimboni ezahlukene eqala emalini eyizigidi eziyisi-R6.
UMthetho uyaqhubeka uchaza ukuthi abasebenzi abaqaguliwe okumele benzelelwe ngabayizakhamuzi zaseNingizimu Afrika abampisholo (abohlanga); abesifazane bazo zonke izinhlanga; nalabo abanokukhubazeka emzimbeni noma enqondweni.
Ngokuxoxisana nabasebenzi nezinyonyana umqhashi oqaguliwe kumele makenze uhlelo lokwenzelela. Inhloso yohlelo ngukuvumelana ngezinyathelo zokuqeda ubandlululo nemigoqo evimbela intuthuko emsebenzini yabasebenzi abaqaguliwe. Le migoqo nobandlululo kungaba semaholweni angalingani ngokungenabulungiswa, emibandeleni yokuqhashwa engalingani nakuyo yonke inqubo yezokuqhashwa ebambezela ithunaze abasebenzi abaqaguliwe. Enye inhloso yohlelo ukuhlela kabusha umsebenzi ukuze kuphathwe bonke abasebenzi ngokulingana futhi nangenhlonipho yesithunzi soluntu kubona bonke abasebenzi. Inhloso yohlelo ukuqinisekisa ukuthi kuyo yonke imisebenzi nezigaba ezahlukene zemisebenzi abasebenzi abaqaguliwe nabo bamelelekile kusukela koqhashelwe ukuthanyela kuye kochwepheshe nezimenenja nabaqondisi benkampani imbala.
Uhlelo lokwenzelela kufanele lucacise lubale izinyathelo nezinjongo ezigqamile ezitshengisa ubulungiswa noma ukuqondisa konke obekungenabulungiswa emsebenzini okuhlukumeza labo abaqaguliwe. Kumele malube nezibalo zabasebenzi ngokwezinhlanga zabo kuwona wonke amazinga emisebenzi eyahlukene icacise ukuthi lakho kunezikhala zabasebenzi abaqaguliwe ziyovalwa kanjani nini.
Izikhathi zokwenza okufanele kulungiswe kumele nazo mazicace. Uhlelo kumele futhi lube nesikhathi esinqunyiwe ukuthi luyosebenza kuze kube nini okungaba yisikhathi esingengaphansi konyaka owodwa noma esifushane eminyakeni emihlanu.
Lumele ukuthi lube nenqubo yokuluhlola ukuthi luyasebenza yini uhlelo ukufeza izinjongo zalo njengoba zibhaliwe kulo. Umthetho uthi makukhonjwe othile osesikhundleni sokuphatha ozobhekana nokuqikelela ukusetshenziswa kohlelo okunguyena oyophendula uma lungenamiphumela ebhekekile uhlelo.
Okokugcina uhlelo lokwenzelela kumele malucacise inqubo yokuxazulula izingxabano ezidalwa ukungaboni ngaso linye ekusebenziseni lolu hlelo lwesenzelelo.
Abaqashi abaqaguliwe baphoqeke ukwenza imibiko yaminyaka yonke kuMqondisi Jikelele woMnyango Wezabasebenzi mayelana nokusebenza kohlelo lwesenzelelo ukutshengisa ukuthi zikhona yini izinguquko zobungcono ezenzekayo noma kazikho futhi kuchazwe lapho zingekho ukuthi kubangelwa yini lokho.
Abaqashi kumele imibiko beyixoxisane nabasebenzi nezinyunyana zabo. Uma umqashi ezohluleka ukwenza lo mbiko okumele awufake emnyangweni ngenyanga kaMfumfu minyaka yonke, kufanele makabikele uMqondisi kungakapheli inyanga kaNcwaba walowo nyaka abika ngawo futhi esho nezizathu ezimbambayo nokuthi useyowuletha nini-ke lombiko ngoba uyimpoqo yomthetho. Abaqashi abayizinkampani zomphakathi kumele lo mbiko ziwusicilele emibikweni eyenziwa ngaphansi komthetho wezinkampani minyaka yonke.
Uma umqashi kungumnyango noma inkampani kaHulumeni, uNgqongqoshe womnyango lowo engaphansi kwawo inkampani, kumele makawethulele iphalamende lombiko omayelana nezinhlelo zokwenzelela abasebenzi abaqaguliwe.
Bonke abaqhashi abathintekayo kulolu daba, kumele ukuthi kulombiko befake nombiko mayelana nokwehlukana noma ukungalingani kwemiholo abayiholela abasebenzi. Lo mbiko ufakwa kuKhomishini Yemibandela Yokuqashwa, futhi ucacisa ukuthi yehluke kangakanani imiholo eholelwa abasebenzi futhi kwenziwa yini yehluke; ukuze kuthi uma kunobandlululo emiholweni kuchazwe ukuthi luzoqedwa kanjani lolo bandlululo emiholweni.
Indlela yokuqikelela ukuthi uhlelo lokuqeda ubandlululo emsebenzini luyasebenza yini noma cha, iqala kubo kanye abasebenzi okumele mababikele umqhashi, izinyunyana, abahloli boMynango Wezabasebenzi nganoma yintoni engahambi ngokohlelo lobulungiswa noma lwesenzelelo. Kungumsebenzi kamhloli wezabasebenzi ukuba athathele umqashi izinyathelo uma engahambisi ngokohlelo futhi noMqondisi Jikelele unomsebenzi wokwenza izincomo kubaqhashi ukuba mabalungise noma yintoni ezinhlelweni zabo zokwenzelela emsebenzini. Izijeziso kumqashi oyisephulamthetho zixuba inhlawulo engaze ifinyelele ezigidini ezi-R 2,7 noma ingxenye engamaphesenti alishumi (10%) yengeniso lemali ebhizinisini lomqhashi oyisephulamthetho.
Esinye isijeziso ngesokuthi umqhashi oyisephula-mthetho ancintshwe ilungelo lokuthola imisebenzi yamathenda kaHulumeni noma uma esayithola inqanyulwe axoshwe kuyona. Yizikhulu zoMnyango Wezabasebenzi ezinelungelo lokujezisa futhi zimangalele umqhashi oyisephulamthetho ngaphansi kumthetho wokuqeda ubandlululo. INkantolo Yezabasebenzi yiyona enezwi elingujuqu emacaleni aphathelene nalezizindaba. Ngokulandelayo soke sibhekisis amacala amayelana nokwephulwa kwezibopho nemibandela yalo Mthetho.