Ningethembeli ezikhulwini nasendodaneni engenalusizo
“NINGETHEMBI ezikhulwini nasendodaneni yomuntu okungekho kuyo ukusiza. Umoya wakhe uyaphuma, yena abuyele emhlabathini wakhe; ngalona lolo suku amacebo akhe ayaphela. Ubusisiwe yena omsizi wakhe unguNkulunkulu kaJakobe, othemba lakhe likuJehova uNkulunkulu wakhe owenzile izulu nomhlaba, nolwandle, nakho konke okuphakathi kwakho, ogcina iqiniso kuze kubephakade.” AMAHUBO 146:3-6
Thina bantu sithanda kakhulu ukubeka ithemba lethu kubantu. Sithanda ukusiqokela abaholi nezikhulu abazolawula nabazobusa phezu kwethu, ukuze izinto zisihambele kahle la emhlabeni. Uma ubheka nje amaqembu ezombusazwe ahlukeneyo ezweni lethu, kungubufakazi bokuthi siyethemba izikhulu. Kukhona amaqembu asunguliwe ngabantu abambalwa nje, kanti abantu bayabalandela ngoba abanandaba nalokhu abakushoyo.
Cha, bathanda ukuphokophela nje abaholi labo. Kukhona abalandeli babaholi ezweni lakithi abangavumeli muntu ukukhombisa amaphutha nezono zabaholi babo. Kwangathi bangakubulala uma ulokotha nje ukuphawula ngalokhu okungahambi kahle kumholi wabo, uze uveze izici zakhe.
Kwangathi bamthatha njengonkulunkulu omncane. Kuguqulwe amazwi ezingoma eziculelwa uJesu Khrestu, kudunyiswe igama lomholi, kuculwe: “Akekho ofana nomholi; akekho ofana naye!” Abamdumisi uJesu Khrestu, cha, bayadumisa umuntu “omoya wakhe uyaphuma, yena abuyele emhlabathini wakhe”. Nakwezenkolo uma kukhona ukwehlukana noqhekeko ebandleni elithize kuvamile ukuthi kube ukungezwani kwabaholi.
Uma kusungulwa ibandla elisha, nabantu bayalandela umholi othandwa yibo. Kukhona amahlazo abaholi avikelwa ngezikhali nangezibhamu. Qaphela uma uzobuza umbuzo oqotho nje mayelana nokuthize okwenzeke empilweni yomholi wabo esikhathini esedlule. Bangakhipha umphefumulo wakho ufe nya!
Ngesikhathi mina nomndeni wami sisahlala eManzimtoti, wasisebenzela ugogo wakwaCele. Zambiza izingane uMama wakwaNdosi. Ngiyakhumbula ngelinye ilanga uMam’Ndosi wangifundisa ngolimi lwesiZulu isisho ebengingasazi, wathi: “Zafa ngamvunye!” Waze wangichazela incazelo yesisho. Imvu eyodwa egulayo iyakwazi ukubhubhisa nezinye izimvu eziningi bo! Umholi oyedwa vo, uyakwazi ukubhubhisa izwe lonke bakwethu, nezimpilo zabaningi.
Kuvumelekile na ukuthi sinamathelise ithemba lethu kubantu ngale ndlela esiyenza ngayo na? Izwi likaNkulunkulu liyaphika, lithi “Ningethembi ezikhulwini nasendodaneni yomuntu.”
Bakwethu, uma senzile lokhu okungafanele ukuthi sikwenze sabeka ithemba nokulangazelela kwethu kubantu, asiphenduke sivume izono zethu. Masisondeleni kuNkulunkulu, sifulathele yonke into, sizithobe phambi kwaKhe, siziphonse phambi kwaKhe.
Masivumeni bakwethu ukuthi inkinga enkulu kakhulu ekhungethe izwekazi lethu iAfrika, inkinga yobuholi.
Abaholi abaningi kwelikaNtu bacabangela bona bodwa, abanandaba nabavoti nezakhamizi zamazwe abo. Kahle-hle, akumangazi lokhu, ngoba Izwi likaNkulunkulu lisho obala ukuthi
“Akakho olungileyo, akakho noyedwa; akakho oqondayo, akakho ofuna uNkulunkulu.” Kodwa okwethusayo kakhulu bakwethu, yilokhu ukuthi izakhamizi zamazwe namazwe zibeka njalo ithemba lazo kulabo bantu abangakholwa kuJesu Kristu neZwi likaNkulunkulu. Kodwa senzenjani mfundisi? Kubuza omunye.
Bakwethu, uJehova uthembekile, Izwi laKhe liyiqiniso. Yingakho, uma sifuna ukubusiswa ezweni lakithi bakwethu, kumelwe ukuthi sizithobe kuqala, sivume lapho sethembe khona abantu nemibono yabo, kubuswe izwe lethu ngendlela ephambene ngqo nentando yoMdali wakho konke.
Ngempela, sifuna ukubuswa ngubani na? Ngabe sifuna ukubuswa nguNkulunkulu oZiquntathu, noma sifuna ukubuswa ngabantu abanamacebo aphela ngokushesha na? Kunjalo, uNkulunkulu uyasebenzisa abantu ukubusa izwe, abafana noDavide njalo njalo. Kodwa uma umthethosisekelo wezwe, nemithetho yawo ingahambisani neZwi laKhe elingcwele-ngcwele, asisabuswa nguYe bakwethu.
Siyabuswa ngabantu abangeke babusiswe wuYe. Ithemba lethu silibekephi na?
“Ubusisiwe yena omsizi wakhe unguNkulunkulu kaJakobe, othemba lakhe likuJehova uNkulunkulu wakhe owenzile izulu nomhlaba, nolwandle, nakho konke okuphakathi kwakho, ogcina iqiniso kuze kubephakade.”
Bakithi, izwe lethu lidinga inhliziyo entsha. Lidinga inhliziyo ethembela kuNkulunkulu ophilayo, hayi kubantu. Angeke asinike inhliziyo entsha na uMdali wethu? Ngabe uzolalela uma simncenga ukusithethelela izono zethu na? Mina ngiyanincenga bakwethu, bekani ithemba lenu kuNkulunkulu kaJakobe, nethembe uJehova kuphela, ngoba wuYe ogcina iqiniso kuze kube-phakade. Sicela kuYe inhliziyo entsha.
MaKhrestu, uJehova, uNkulunkulu oyedwa vo, Oziquntathu – uBaba, neNdodana, noMoya oNgcwele anibusise. Amen.